ރާއްޖޭގެ ކޮންމެ އަތޮޅެއްގައިވެސް، ދަތުރު ދިއުމަށް ޚާއްޞަ ރަށެއް ކަނޑައަޅުއްވާނެ ކަަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ އދ. މާމިގިލީ ރައްޔިތުންނާއި ބައްދަލު ކުރައްވާ ވާހަކަފުޅު ދައްކަވަމުންނެވެ. އދ އަތޮޅުގެ މީހުން ދިރިއުޅޭ 10 ރަށަށް މިއަދު ހެނދުނު ފެއްޓެވި ދަތުރުފުޅުގެ ފަސް ވަނަ ރަށެއްްގެ ގޮތުން މިއަދު އިރޮއޮއްސުނު ވަގުތު ރައީސް ވަނީ މާމިގިއްޔަށް ވަޑައިގެންފަ އެވެ.
އަދި އެ ރަށުގެ ރައްޔިތުންނާއި ބައްދަލު ކުުރުމަށް މިރޭ ޖަލްސާއެއް ބޭއްވެވި އެވެ. ވަރަށް ގިނަ ބަޔަކު ބައިވެރިވި މި ޖަލްސާގައި ރައީސުލްޖުމްހޫރިއްޔާ ވަނީ، ރާއްޖޭގެ މީހުން ދިރިއުޅޭ ރަށްރަށަށް އެމަނިކުފާނު ކުރައްވަމުން ގެންދަވާ ދަތުރުފުޅުތަކުގައި އެންމެ އާންމު ހުށަހެޅުމެއްގެ ގޮތުގައި އިވިވަޑައިގަންނަވާ އެއް ހުށަހެޅުމަކީ ދަތުރުދާން ޚާއްޞަ ރަށެއް ހަމަޖެހިގެންދިއުމަށް ރައްޔިތުން އެދޭ އެދުން ކަމުގައި ވިދާޅުވި އެވެ.
ރައީސް މިރޭ ވިދާޅުވީ ރާއްޖޭގެ ކޮންމެ އަތޮޅެއްގައިވެސް، ދަތުރު ދިއުމަށް ޚާއްޞަ ރަށެއް ކަނޑައެޅިގެންދާނޭ ކަމަށެވެ. އެ ރަށް ވެގެންދާނީ ހަމަޖެހޭ ވަކި އުސޫލެއްގެ މަތިން، ފަތުރުވެރިކަމުގެ ބޭނުމަށާއި، އާންމު ރައްޔިތުންގެ ބޭނުންތަކަށްވެސް ގޮސް އުޅެވޭނޭ ރަށަކަށް ކަމުގައި އެމަނިކުފާނު ވިދާޅުވި އެވެ. އަދި މިކަމަށް ބޭނުންވާ ކަރުދާހެއް ތައްޔާރު ކުރައްވައި، ވަޒީރުންގެ މަޖިލީހަށް ހުށަހެޅުއްވުމުގެ މަސައްކަތްތައް މިހާރުވެ ސް ކުރައްވަމުން ގެންދަވާ ކަމުގައި އެމަނިކުފާނު ވިދާޅުވި އެވެ
Advertisement
This content is created and paid for by advertisers and does not involve Voice Journalists
