އދ. ފޮފަޅަގައުއަކީ، އެއަތޮޅު ކުނބުރުދޫގެ ބައެއްގެ ގޮތުގައި ރައީސް ޑރ. މުޙައްމަދު މުޢިއްޒު ކަނޑައަޅުއްވައިފިއެވެ.
ރައީސް އެފަދައިން ނިންމަވައިފައިވަނީ އދ. އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން އެ އަތޮޅު ކުނބުރުދޫއަށް ވަޑައިގެން އެ ރަށުގެ ރައްޔިތުންގެ އެދުމުގެ މަތިން، މިއަދު ނެރުއްވި އެމަނިކުފާނުގެ 28/2025 ވަނަ ޤަރާރުންނެވެ.
އެގޮތުން އެ ނިންމެވުން ނިންމަވައިފައިވަނީ ކުނބުރުދޫގައި ހުރި ބިމާއި ވަސީލަތްތައް މަދުވުމުގެ ސަބަބުން އެ ރަށުގެ ރައްޔިތުންނަށް އާމްދަނީ ހޯދޭނެ މަގުފަހިކުރުމަށާއި، ބޯހިޔާވަހިކަމަށް ދިމާވެފައިވާ މައްސަލަތަކަށް ހައްލެއް ގެނެއުމުގެ ގޮތުން ކަމަށް ރައީސް އޮފީހުން ބުންޏެވެ.
އެގޮތުން އެ ޤަރާރުގެ ދަށުން 2010/7، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ ދަށުން، 2025 ފެބުރުވަރީ 5 ގައި ދިވެހި ސަރުކާރުގެ ގެޒެޓުގައި ޝާއިއުކޮށްފައިވާ، ރައީސްގެ ޤަރާރު ނަންބަރު 2025/2އަށް ވަނީ އިސްލާހު ގެނެސްފައެވެ.
އަދި އެ ޤަރާރުގެ ޖަދުވަލުގައި ހިމަނުއްވާފައިވާ ދިވެހިރާއްޖޭގައި މީހުން ދިރިއުޅޭ ރަށްތަކުގެ ލިސްޓު، މިހާރު ވަނީ އަޕްޑޭޓްކޮށްފައެވެ.
Advertisement
This content is created and paid for by advertisers and does not involve Voice Journalists
