ގެދޮރުވެރިޔާ ސްކީމްގެ ދަށުން ދޫކުރާ ފްލެޓްތަކަށް ހޮވުނު ފަރާތްތަކުގެ ތެރެއިން މިހާތަނަށް ގުރުއަތު ނުނަގާ ފަރާތްތަކުގެ ގުރުއަތުނެގުން މާދަމާ ބޭއްވުމަށް ތާވަލްކޮށްފިއެވެ.

މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރއިން މިއަދު ބުނީ ގެދޮރުވެރިޔާ ސްކީމުން ލިބޭ ފުލެޓްތައް ކަނޑައެޅުމަށްޓަކައި 2023 ވަނަ އަހަރުގެ ނޮވެމްބަރުމަހުގެ 16 ވަނަ ދުވަހު ކުރިއަށްގެންދިޔަ ގުރުއަތު ނެގުމުގައި، ފްލެޓް ލިބުމަށް ޝަރުޠުހަމަވާ ފަރާތްތަކުގެ ތެރެއިން، 73 ކުން ފެށިގެން މަތިން މާރކްސް ލިބި 2 ކޮޓަރީގެ ފުލެޓް ކަނޑައެޅުމަށްޓަކައި ގުރުއަތު ނަގާފައިނުވާ ފަރާތްތަކާއި، 76 އަކަށް ވުރެ މަތިން މާރކްސް ލިބި 3 ކޮޓަރީގެ ފުލެޓް ކަނޑައެޅުމަށްޓަކައި ގުރުއަތު ނަގާފައިނުވާ ފަރާތްތަކުގެ މެދުގައި މާދަމައިން ފެށިގެން ގުރުއަތުނެގުމަށް ހަމަޖެހިފައިވާކަމަށެވެ.

މިނިސްޓްރީން ބުނީ މި ގުރުއަތުގައި ދެމަފިރިންނަށް ވަކިން ފްލެޓްލިބޭ ޙާލަތުގައި، ދެމަފިރިންގެ ތެރެއިން އެއްފަރާތުން ފްލެޓް ދޫކޮށްލުމަށްފަހު، ފްލެޓް ލިބޭ އަދި ގުރުއަތު ނަގާފައިނުވާ ފަރާތްތައްވެސް ހިމެނޭކަމަށެވެ. ގުރުއަތު ނެގުމަށް ހަމަޖެހިފައިވަނީ، މާދަމާގެ 15:00 އިން ފެށިގެން މިނިސްޓްރީގައެވެ.

ގުރުއަތު ނެގުމުގެ ކަންކަން ހައުސިން މިނިސްޓްރީގެ މުއައްޒަފުން ކުރިއަށްގެންދާއިރު، ގުރުއަތު ނެގުމުން އެފަރާތްތަކަށް ލިބޭ ފުލެޓް ނަންބަރު ގެދޮރުވެރިން ޕޯޓަލްއިން އަޕްޑޭޓްކުރެވޭނޭކަމަށް މިނިސްޓްރީން ބުނެެއެވެ. މީގެ އިތުރުން ގުރުއަތު ނެގުން ކުރިއަށްދާ މަންޒަރު ދައުލަތުގެ މިޑިއާ އާއި މިނިސްޓްރީގެ ސޯޝަލް މީޑިއާ ޕްލެޓްފޯމްތަކުން ވަގުތުން ބްރޯޑްކާސްޓްކުރެވޭނޭކަމަށްވެސް ހައުސިން މިނިސްޓްރީން ވަނީ ބުނެފައެވެ.

ފަހި ދިރިއުޅުން ކޯޕަރޭޝަނުން މިހާރު ދަނީ ފްލެޓް އެގްރިމެންޓް ކޮށްފައިވާ ފަރާތްތަކަށް ތަޅުދަނޑި ހަވާލުކުރުމުގެ މަސައްކަތް ކުރަމުންނެވެ.