ޔޫރަޕިއަން ފްރީ ޓްރޭޑް އެސޯސިއޭޝަންގައި ހިމެނޭ 4 ޤައުމާއެކު ވެވުނު ވިޔަފާރީގެ އެއްބަސްވުމާއެކު، އިންޑިއާއަށް 250 ބިލިއަން ޑޮލަރުގެ އިންވެސްޓްމަންޓް އަންނާނެކަމަށް އެގައުމުގެ ވިޔަފާރިއާއި ސިނާއަތާއި ބެހޭ ވަޒީރު ޕިޔުޝް ގޯޔާލް ވިދާޅުވެއްޖެއެވެ.

ޔޫރަޕިއަން ފްރީ ޓްރޭޑް އެސޯސިއޭޝަން (އެފްޓާ) ގައި ހިމެނެނީ ސްވިޓްޒަލެންޑް، ލިކްޓެންޝްޓައިން، ނޯވޭ އަދި އައިސްލެންޑް އެވެ. ގޯޔާލް ވިދާޅުވީ އެ 4 ޤައުމުގެ ވިޔަފާރިތަކަށް އިންޑިއާގައި ވަރަށް ގިނަ ދޮރުތައް ހުޅުވިގެންދާނެކަމަށެވެ. އިންޑިއާއާއި އެފްޓާ ގައުމުތަކާއެކު ވެވުނު އެއްބަސްވުމުގައި، އިންޓަލެކްޗުއަލް ޕްރޮޕަޓީއަށް ޚާއްސަ ސަމާލުކަމެއް ދީފައިވާއިރު، އީޔޫ އާއެކު ގާއިމްކުރުމަށް މަސައްކަތްކުރާ ވިޔަފާރީގެ އެއްބަސްވުންތަކަށްވެސް އިންޓަލެކްޗުއަލް ޕްރޮޕަރޓީއާއި ގުޅޭ މާއްދާތައް އިތުރުކުރައްވާނެކަމަށް ގޯޔާލް ވިދާޅުވިއެވެ.

އެމެރިކާގެ ރައީސް ޑޮނަލްޑް ޓްރަމްޕް، އެކި ޤައުމުތަކުން އެމެރިކާއަށް އެތެރެކުރާ މުދަލުން ނަގާ ޓެރިފް ބޮޑުކުރިއިރު، އިންޑިއާއިން އެތެރެކުރާ މުދަލުން 50 އިންސައްތަ ނެގުމަށް ނިންމެވިއެވެ. އެމެރިކާއާއި އިންޑިއާއަށް އަދި ވިޔަފާރީގެ އެއްބަސްވުމަކަށް އާދެވިފައިވާ ނުވާއިރު، އިންޑިއާއިން ގެންދަނީ އެތަން ފޫބެއްދުމަށް އެކިއެކި ޤައުމުތަކާއެކު މިނިވަން ވިޔަފާރީގެ އެއްބަސްވުންތައް ޤާއިމް ކުރަމުންނެވެ. އެގޮތުން މިހާރުވެސް އިނގިރޭސިވިލާތާއި، ޔޫ.އޭ.އީ އަދި އޮސްޓްރޭލިއާ އާއެކު އިންޑިއާއިން އެފް.ޓީ.އޭ އެއްގައި ސޮއިކޮށްފައިވާއިރު، އެހެން ގައުމުތަކާއެކުވެސް މިމަޝްވަރާތައް ކުރިއަށްދެއެވެ.