ދިރާސީ އަހަރަށް ކުދީން ނިކުންނާނީ އޭސީ ކުލާސްރޫމްތަަކަށް: ރައީސް
އަންނަ ދިރާސީ އަހަރަށް ކުދީން ނިކުންނާނީ އޭސީ ކުލާސްރޫމްތަަކަށް ކަމަށް ރައީސް ޑރ. މުހައްމަދު މުޢިއްޒު މިރޭ ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ އދ މަހިބަދޫ ރައްޔިތުންނާއި މިރޭ ބައްދަލުކުރެއްވުމަށް ބޭއްވި ޖަލްސާގައި ވާހަކަފުޅު ދައްކަވަމުންނެވެ. ރައީސް ވިދާޅުވީ އެމަނިކުފާނު އެންމެ އިސްކަން ދެއްވާ އެއް ދާއިރާއަކީ ތައުލީމީ ދާއިރާ ކަމަށެވެ. އެ ދާއިރާގެ ތަރައްގީއަށް ވަރަށް ގިނަ މަސަައްކަތްތައް ކުރައްވަމުން ގެންދަވާ ކަމަށް ވިދާޅުވި އެވެ.
ޚާއްސަކޮށް ކުދީންގެ ކިޔެވުމުގެ މާހައުލު ރަނގަޅު ކުރުމަށް ވަރަށް އިސްކަން ދެއްވާ ކަމަށް ވިދާޅުވި އެވެ. އެ ގޮތުން ކުދީން ކިޔަވާ ކުލާސްރޫމްތައް އޭސީކޮށް ފިނިކުރުމަށް ނިންމަވާ ފައްޓަވާފައިވާ މަޝްރޫއު ފާހަގަ ކުރެއްވި އެވެ. އެ މަޝްރޫއު ނިމި އަންނަ ދިރާސީ އަހަރަށް ކުދީން ނިކުންނާނީ އޭސީ ކުލާސްރޫމްތަަކަށް ކަމަށް އެމަނިކުފާނު ވިދާޅުވި އެވެ.
"މިއަހަރު ނިމެންވާއިރަށް ހުރިހާ ރަށެއްގެ ހުރިހާ ކްލާސްރޫމްތަކެއް އޭސީ ކުރާނެ. އެކަން ވަރަށް ރަނގަޅަށް އެޑިއުކޭޝަން މިނިސްޓްރީން އެބަ ގެންދަވާ. އިރާދަކުރެއްވިއްޔާ މި އަންނަ ދިރާސީ އަހަރަށް ކުދީން ރާއްޖޭގެ ހުރިހާ ސުކޫލަކަށް ނިކުންނާނީ އޭސީ ކުރެވިފައި ހުރި ކުލާސްރޫމްތަކަށް ކިޔަވަން," ރައީސް ވިދާޅުވި އެވެ.
ރައީސް ވިދާޅުވީ ތައުލީމީ ދާއިރާއިން ވަސީލަތްތައް ގާއިމުކުރުމުގެ މަސައްކަތް އެކި ރަށްރަށުގައި މިހާރުވެސް ވަރަށް ބާރަށް ކުރިއަށް ގެންދަވާ ކަމަށެވެ. އެ ގޮތުުން މުޅީން އަލަށް ފަށާފައިވާ މަޝްރޫޢުތަކާއި ހުއްޓިފައިވާ އެތައް މަޝްރޫއެއް ހިމެނޭ ކަމުގައި ވިދާޅުވި އެވެ.
Advertisement
This content is created and paid for by advertisers and does not involve Voice Journalists
