ތިމަރަފުށީގައި އިމާރާތްކޮށްފައިވާ ހައުސިންޔުނިޓްތަކުގެ އެއްބަސްވުމުގައި ސޮއިނުކުރާ ފަރާތްތަކަށް ފަހު ފުރުސަތު ދިނުމަށް ހައުސިން މިނިސްޓްރީން ނިންމައިފިއެވެ.

ހައުސިން މިނިސްޓްރީން މިއަދު އާއްމުކުރި އިއުލާނެއްގައި ބުނެފައިވަނީ، ސަރުކާރުގެ ބޯހިޔާވަހިކަމުގެ ސިޔާސަތުގެ ތެރެއިން، ތިމަރަފުށީގައި އިމާރާތްކޮށްފައިވާ 100 ހައުސިން ޔުނިޓް އެއްބަސްވުމުގައި ސޮއިކުރުމުގެ ކަންކަން ކުރިއަށްގެންދިޔަ ނަމަވެސް އަދިވެސް ސޮއިނުކުރާ ފަރާތްތައް ތިބިކަމަށެވެ. ހައުސިން ޔުނިޓް އެއްބަސްވުމުގައި ސޮއިކުރުމަށް ކަނޑައަޅާފައިވަނީ، މިހިނގާ އޮކްޓޯބަރުމަހުގެ 12 ވަނަ ދުވަހުން ފެށިގެން 16 ވަނަ ދުވަހުގެ ނިޔަލަށެވެ.

ހައުސިން މިނިސްޓްރީން ބުނީ އެއްބަސްވުމުގައި ސޮއިކުރުމަށް އެޕޮއިންޓްމަންޓް ހަމަޖެއްސުމަށް ހައުސިންގ ޔުނިޓް ލިބުނު ފަރާތްތަކަަށް މިނިސްޓްރީން ގުޅަމުންގެންދާނެ ކަމަށެވެ. ހައުސިން މިނިސްޓްރީން ބުނެފައިވަނީ މިއީ އެއްބަސްވުމުގައި ސޮއިކުރަން ދޭނޭ ފަހު ފުރުސަތު ކަމަށެވެ.

ތިމަރަފުށީގައި 100 ހައުސިން ޔުނިޓް އެޅުމަށް އެސްޖޭ ކޮންސްޓްރަކްޝަނާ ހަވަލުކުރީ 2022 ވަނަ އަހަރު 83 މިލިއަން ރުފިޔާގެ އަގަކަށެވެ.