260 އޭޓީއެމްއާއެކު ރާއްޖޭގެ މީހުން ދިރިއުޅޭ ހުރިހާ ރަށެއްގައި އޭޓީއެމް ބަހައްޓައި މިމަހު ނިމޭނެ ކަމަށް ބީއެމްއެލް އިން ބުނެފިއެވެ.

ރާއްޖޭގެ މީހުން ދިރިއުޅޭ ހުރިހާ ރަށެއްގައި އޭޓީއެމް ބެހެއްޓުމަށް ސަރުކާރުން ބީއެމްއެލްއާއި ގުޅިގެން ޤައުމީ މަޝްރޫއެއް ފަށައިފައިވަނީ މިދިޔަ ނޮވެމްބަރު މަހުގައެވެ. އެ މަޝްރޫއުގެ ދަށުން ރައީސް ޑރ. މުޙައްމަދު މުޢިއްޒު އދ. މަންދޫއަށް އިއްޔެ ކުރެއްވި ދަތުރުފުޅުގެ ތެރެއިން ވަނީ ބީއެމްއެލްގެ 250 ވަނަ އޭޓީއެމް ހުޅުއްވައިދެއްވާފައެވެ.

އެއާއެކު ބީއެމްއެލް އިން ބުނި ގޮތުގައި ބާކީ ރާއްޖޭގައި ނުހުޅުވި ވަނީ 10 ރަށެއްގެ އޭޓީއެމްއެވެ. އެއީ ލ. އަތޮޅުގައި 7 އޭޓީއެމް، އައްޑޫ ސިޓީގައި 2 އޭޓީއެމް އަދި ޅ އަތޮޅުގައި ޤާއިމްކުރާ އެއް އޭޓީއެމްއެވެ.

އިއްޔެ މަންދޫގައި އޭޓީއެމް ހުޅުވުމަށް ބޭއްވި ރަސްމިއްޔާތުގައި ބީއެމްއެލްގެ ހެޑް އޮފް ބްރޭންޑް އެންޑް މާކެޓިން ސްޓްރެޓްޖީ މުހައްމަދު ސައީދު ވަނީ މި އަހަރުގެ 8 މަސް ދުވަސްތެރޭ 95 ރަށުގައި ބަހައްޓައި ނިމިފައިވާކަން ފާހަގަކުރައްވާފައެވެ. އަދި އޭޓީއެމްތައް ނުބަހައްޓައި ހުރި ރަށްތަކުގައި 20 ދުވަހުގެ ތެރޭގައި އެޓީއެމްތައް ބަހައްޓައި ނިންމާލެވޭނެ ކަމަށް ވެސް ސައީދު ވަނީ ވިދާޅުވެފައެވެ.

ރާއްޖޭގެ މީހުން ދިރިއުޅޭ ކޮންމެ ރަށެއްގައި އޭޓީއެމްއެއް ބެހެއްޓުމަކީ ރައީސް މުޢިއްޒުގެ ރިޔާސީ ވައުދުފުޅެކެވެ. އެ ވައުދުފުޅާ އެއްގޮތަށް ގިނަ މަސައްކަތްތަކެއް ކުރެވޭއިރު، ލޯކަލް ޓޫރިޒަމް ކުރިއަރާފައިވާ ރަށްތަކުގައި ސަރުކާރުން ދަނީ ޑޮލަރު އޭޓީއެމްތައް ވެސް ބަހައްޓަމުންނެވެ.