ބޮޑެތި އިޤްތިޞާދުތަކުގެ ތެރެއިން އެންމެ ބާރަށް ކުރިއަރަމުން އަންނަ ޤައުމަކީ އިންޑިއާ ކަމަށް ވޯލްޑް ބޭންކުން ބުނެފިއެވެ.

ވޯލްޑް ބޭންކުން އަންގާރަ ދުވަހު ނެރުނު ރިޕޯޓުގައި ބުނީ އަންނަ މާލީ އަހަރު އިންޑިއާގެ އިޤްތިޞާދު ކުރިން ހީކުރިވަރަށް ވުރެ ރަނގަޅަށް، 6.5 އިންސައްތަ ކުރިއަރާނެކަމަށް ލަފާކުރެވޭ ކަމަށެވެ. ވޯލްޑް ބޭންކުން ކުރިން ލަފާކުރީ 6.3 އިންސައްތަ ކުރިއަރާނެކަމަށެވެ. އިޤްތިޞާދު ކުރިއަރާނެކަމަށް ލަފާކުރާ މިންވަރު މައްޗަށް ޖައްސާލާފައި މިވަނީ، އެތެރޭގެ ބާޒާރުގެ ވިޔަފާރި ރަނގަޅުވެ، ރަށްފުށު ސަރަހައްދުތަކުގެ ތަރައްޤީގެ ދުވެލި އަވަސްވުމުގެ އިތުރަށް ދާދިފަހުން ބޮޑުވަޒީރު ނަރެންދްރަ މޯދީ އިއުލާންކުރެއްވި ޓެކްސް ރިފޯމްތަކާއި ގުޅިގެންނެވެ.

ވޯލްޑް ބޭންކުން ނެރުނު ދެކުނު އޭޝިއާގެ ތަރައްޤީގެ އަދާހަމައިގައި، މިސަރަހައްދުގެ އެކި ޤައުމުތަކުގެ އިޤްތިޞާދު ކުރިއަރާނެކަމަށް ލަފާކުރަނީ އެކި މިންވަރަށެވެ. ބަންގްލަދޭޝްގެ އިޤްތިޞާދު 4.8 އިންސައްތަ ކުރިއަރާނެކަމަށް ލަފާކޮށްފައިވާއިރު، ބޫޓާންގެ ހައިޑްރޯޕަވަރ ޕްރޮޖެކްޓްތައް މަޑުޖެހިފައިވާތީ އިޤްތިޞާދު ކުރިއަރާނެކަމަށް ކުރިން ލަފާކުރި މިންވަރަށް ކުރިއަރާނެކަމަށް ލަފައެއް ނުކުރެއެވެ. އެހެންނަމަވެސް 2027 ވަނަ އަހަރު ކުރިއަރާނެކަމަށް ލަފާކުރެވެއެވެ.

ޖުމްލަކޮށް މިއަހަރު މި ސަރަހައްދުގެ އިޤްތިޞާދު 6.6 އިންސައްތަ ކުރިއަރާނެކަމަށް ލަފާކުރެވުނަސް، އަންނަ އަހަރު 5.8 އިންސައްތައަށް މަޑުޖެހިލާނެކަމަށް ވޯލްޑް ބޭންކުން އަންދާޒާކުރެއެވެ.