ކެނެޑާގެ ޚާރިޖީ ވަޒީރު އަނީތާ އާނަންދު މި ފެށޭ ހަފްތާގައި އިންޑިއާއަށް ވަޑައިގަންނަވާނެއެވެ.
މިއީ މިއަހަރު ކުރީކޮޅު މަގާމާއި ހަވާލުވެވަޑައިގަތުމަށްފަހު އެކަމަނާ އިންޑިއާއަށް ކުރައްވާ ފުރަތަމަ ރަސްމީ ދަތުރުފުޅެވެ. އަދި މިއީ ކެނެޑާއާއި އިންޑިއާގެ ގުޅުން ވަރަށް ބޮޑަށް ގޯސްވުމަށްފަހު، މަޑުމަޑުން ރަނގަޅުވާން ފަށާފައިވާ ދަނޑިވަޅެއްގައި އެކަމަނާ ކުރައްވާ ދަތުރުފުޅެއްވެސް މެއެވެ.
ނިމުނު ސެޕްޓެމްބަރު މަހުގެ 29 ވަނަ ދުވަހު. އދގެ އާއްމު މަޖިލީހުގެ ހަވާސާގައި ނިއުޔޯކުގައި އަނީތާ އާނަންދު ވަނީ އިންޑިއާގެ ޚާރިޖީ ވަޒީރު ޑރ. ޖައިޝަންކަރާއި ބައްދަލުކުރައްވާފައެވެ. މި ބައްދަލުކުރެއްވުމުގައި، ދެގައުމުން އަނެއްކާވެސް ސަފީރުން ކަނޑައެޅުމަށް ނިންމި ނިންމުމަކީ ގުޅުން ރަނގަޅުވަމުންދާ ކަމުގެ ހެއްކެއްކަމަށް ދެ ބޭފުޅުންވެސް ފާހަގަކުރެއްވިއެވެ.
ޖޫން މަހު ޖީ-7 ގެ ބައްދަލުވުމުގެ ތެރެއިން ދެގައުމުގެ ބޮޑުވަޒީރުންވެސް ވަނީ ބައްދަލުކުރައްވާފައެވެ. އަދި މިދިޔަ މަހު، ކެނެޑާގެ ޚާރިޖީ ވަޒީރުގެ ނައިބު ޑޭވިޑް މޮރިސަން އާއި، ޤައުމީ ސަލާމަތާއި ބެހޭ މުޝީރު ނަތާލީ ޖީ. ޑްރޫއީން ވަނީ ދިއްލީއަށް ވަޑައިގެން، ދެގައުމުގެ ދެމެދުގައި ހުއްޓިފައިވާ މަޝްވަރާތައް އަލުން ފެށުމާއި ގުޅޭ މަސައްކަތް ކުރައްވާފައެވެ.
2023 ވަނަ އަހަރު އިންޑިއާއާއި ކެނެޑާގެ ގުޅުން ގޯސްވީ، އިންޑިއާއިން ޓެރަރިސްޓެއްކަމަށް ކަނޑައަޅާފައިވާ މީހަކަށް ކެނެޑާގައި ހަމަލާދީ މަރާލީ އިންޑިއާ އަޑީގައި އޮވެގެންކަމަށް ކެނެޑާގެ އޭރުގެ ބޮޑުވަޒީރު ޖަސްޓިން ޓްރޫޑޯ ތުހުމަތުކުރެއްވުމާއި ގުޅިގެންނެވެ.
Advertisement
This content is created and paid for by advertisers and does not involve Voice Journalists
