ފުލުހުންގެ ބެލުމުގެ ދަށުގައި އޮތް ފޯނަކުން ފޮޓޯއެއް ލީކުވެފައިވާކަމަށް ބުނާ ވާހަކަ ދޮގުކޮށްފި އެވެ.

ފުލުހުން މިރޭ ނެރުނު ބަޔާނުގައި ބުނެފައިވަނީ އެ ހިދުމަތުން ތަހުގީގު ކުރާ މައްސަލަތަކާއި ގުޅިގެން ބެލުމުގެ ދަށަށް ގެނެވޭ ހެކި, ޑިޖިޓަލް ވަސީލަތްތައް ހިމެނޭހެން ބެލެހެއްޓުމުގައި ބައިނަލްއަގްވާމީ މިންގަނޑުތަކާއި އެއްގޮތް ހަރުދަނާ އުސޫލުތަކެއް ގާއިމުކޮށްފައިވާ ކަމަށެވެ.

މި އުސޫލުތަކުގެ ދަށުން އެ ތަކެއްޗާއި އޭގައި ހިމެނޭ މައުލޫމާތުގެ ރައްކާތެރިކަން ވަނީ ފުރިހަމައަށް ކަށަވަރު ކުރެވިފައި ކަމަށާ އެހެން ކަމުން ފުލުހުންގެ ބެލުމުގެ ދަށުގައިވާ އެއްވެސް މޯބައިލް ފޯނަކުން މައުލޫމާތު ލީކުވުމުގެ ފުރުސަތު ނޯންނާނެ ކަމަށެވެ.

"ވީމާ ހެކީގެ ގޮތުގައި ހިފެހެއްޓިފައިވާ ފޯނެއްގައި ހުރި ފޮޓޯ އެއް ނުވަތަ ވީޑިއޯއެއް ލީކުވެފައިވާ ކަމަށް ކުރާ ތުހުަމަތުތަކަކީ އެއްވެސް ހަގީގަތެއްް އެކުލެވިގެން ނުވާ ދޮގު ތުހުމަތެކެވެ,"

ފުލުހުން ބުނީ އެ ހިދުމަތުން ތަހުގީގުތައް ކުރިއަށް ގެންދަނީ ޕްރޮފެޝަނަލް ކަމާއެކު ގާނޫނީ ހަމަތަކުގެ މަތީން ހެކީގެ ރައްކާތެރިކަން ކަށަވަރު ކޮށްގެން ކަމަށެވެ. އަދި އެ ހިދުމަތުގެ މަސައްކަތްތަކުގައި އިންސާނީ ހައްގުތަކަށް އިހްތިރާމް ކުރުމާއި ޕްރޮފެޝަލަން މިންގަނޑުތައް ހިފެހެއްޓުމަކީ އަބަދުވެސް އިސްކަންދޭ ކަންކަން ކަމަށެވެ.

މިފަދަ ބަޔާނެއް ނެރުނީ ފުލުހުން ބަލަމުންދާ މައްސަލައެއްގެ ތަހުގީގަށް އެމްޑީޕީ އެކްޓިވިސްޓެއްގެ ފޯނު ހިފަހައްޓާފައި ވަނިކޮށްއެ ފޯނުގައި ވާ ފޮޓޯއެއް ލީކުކޮށްލާފައިވާ ކަމަށް ތުހުމަތުކުރުމުންނެވެ. މީގެ ކުރީން ޒުވާނުން ބޭއްވި މުޒާހަރާއެއްގެ ތެރެއިން ހައްޔަރުކުރި އެ ޒުވާނާ ވަނީ އޭނާގެ ފޯނުން ފޮޓޯ ލީކުކޮށްލީ ފުލުހުން ކަމަށް ތުހުމަތު ކޮށްފަ އެވެ.