ޒަމާންތަކެއް ވަންދެން ހިނގި ހަނގުރާމަތަކަށްފަހު ގައުމު އާރާސްތުކުރުމަށް އަފްޣާނިސްތާނުން ކުރަމުންދާ މަސައްކަތުގައި އެހީތެރިވެ، އެގައުމުގެ ސިއްހީ ނިޒާމް ހަރުދަނާކުރުމަށް އެހީވުމަށް އިންޑިއާއިން އެއްބަސްވެއްޖެއެވެ.

ތާލިބާނުންގެ ޚާރިޖީ ވަޒީރު މައުލަވީ އާމިރް ޚާން މުއްތަޤީ އިންޑިއާއަށް މިހާރު ކުރައްވަމުން ގެންދަވާ ދަތުރުފުޅުގައި އެކަމާ ގުޅޭ އެއްބަސްވުންތަކުގައި އިންޑިއާ ސަރުކާރާއެކު ވަނީ ސޮއިކުރައްވާފައެވެ.

އިންޑިއާއިން ފޯރުކޮށްދޭ އެހީތެރިކަމުގެ ތެރޭގައި ކާބުލްގައި ތެލަސީމިއާ ސެންޓަރަކާއި ޑައިގްނޯސްޓިކްސް ސެންޓަރެއް ގާއިމްކުރުމާއި، އިންދިރާގާންދީ އިންސްޓިޓިއުޓް އޮފް ޗައިލްޑް ހެލްތުގެ ހީޓިންގ ސިސްޓަމް ބަދަލުކުރުން ހިމެނެއެވެ. މީގެ އިތުރުން ކާބުލްގެ ބަގްރާމީ ޑިސްޓްރިކްޓްގައި 30 އެނދުގެ ހޮސްޕިޓަލެއް އެޅުމާއި، ކާބުލްގައި ކެންސަރު ބަލީގެ މަރުކަޒަކާއި ޓްރޯމާ މަރުކަޒެއްގެ އިތުރުން އަފްޣާނިސްތާނުގެ 5 ސަރަހައްދެއްގައި 5 މެޓަރނިޓީ ހެލްތު ކްލިނިކްތަކެއް ގާއިމް ކުރަންވެސް އިންޑިއާއިން ވަނީ އެއްބަސްވެފައެވެ. ހަމައެއާއެކު އިންޑިއާއިން ވަނީ އަފްޣާނިސްތާނަށް 20 އެމްބިއުލާންސް ވެސް ހަދިޔާކޮށްފައެވެ.

އަފްޣާނިސްތާނުގެ ޚާރިޖީ ވަޒީރު މުއްތަޤީގެ މި ދަތުރުފުޅަކީ ތާލިބާނުން އަލުން އަފްޣާނިސްތާނުގެ ވެރިކަން އަތުލިފަހުން އެގައުމުގެ އިސް އޮފިޝަލަކު އިންޑިއާއަށް ކުރައްވާ ފުރަތަމަ ރަސްމީ ދަތުރުފުޅެވެ. މުއްތަޤީގެ މި ދަތުރުފުޅުގައި ދެޤައުމުގެ މެދުގައި ވިޔަފާރީގެ ގުޅުން ހަރުދަނާކުރުމަށް ޓްރޭޑް ކޮމިޓީއެއް އެކުލަވާލަންވެސް ވަނީ އެއްބަސްވެފައެވެ. އޭނާގެ މި ދަތުރުފުޅު މިމަހުގެ 16 ވަނަ ދުވަހާއި ހަމަޔަށް ދިގު ދެމިގެންދާނެއެވެ