ހުޅުމާލޭގެ އެކި ހިސާބުތަކަށް 716 ވެހިކަލް ދޫކޮށްލާފައި އެބަހުރި: ފުލުހުން
ހުޅުމާލޭގެ އެކި ސަރަހައްދުތަކަށް 716 ވެހިކަލް ދޫކޮށްލާފައި ހުރިކަމަށް ދެނެގަނެވިފައިވާކަމަށް ފުލުހުން ބުނެފިއެވެ.
ހުޅުމާލޭގެ އެކި ސަރަހައްދުތަކުގައި ބޭނުންނުކުރާ އުޅަނދު ގިނަވަމުންދާ މައްސަލާގައި ފުލުހުން ވަނީ ހުޅުމާލޭގެ އެކި ސަރަހައްދުތަކުގައި، ހަލާކުވެފައިވާ އަދި ބޭނުންނުކޮށް ގިނަދުވަސް ވެފައިވާ އުޅަނދުތަކުގެ މައުލޫމާތު އެއްކުރުމަށް ހާއްސަ މަސައްކަތްތަކެއް ކުރިއަށް ގެންގޮސްފައެވެ.
މިކަން ކުރިއަށްގެންގޮސްފައިވަނީ މިދިޔަ އަންގާރަ ދުވަހުއެވެ. މިއީ ހުޅުމާލޭގެ މަގުތައް ތަރުތީބުކުރުމާއި މަގުތަކަކީ އަމާން ރައްކާތެރި ތަނެއްގެ ގޮތުގައި ބޭއްވުމަށް ކުރަމުންދާ މަސައްކަތުގެ ތެރެއިން ކުރެވުނު މަސައްކަތެއްކަމަށް ފުލުހުން ބުނެއެވެ. މިކަން ކުރިއަށްދިޔައީ އެޗްޑީސީއާއި، ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއާއި ކަމާގުޅުންހުރި އެހެނިހެން އިދާރާތައް ގުޅިގެންނެވެ.
ހުޅުމާލޭގައި ހުރި ބޭނުންނުކުރާތާ ގިނަ ދުވަސްވީ އުޅަނދުތަކެއް... ފޮޓޯ: ފުލުހުން
ފުލުހުން ބުނީ މި މަސައްކަތުގެ ތެރެއިން ހުޅުމާލޭގެ އެކި ސަރަހައްދުތަކުގައި 716 އުޅަނދު ހުރިކަމަށް ދެނެގަނެވިފައިވާކަމަށެވެ. މީގެ ތެރޭގައި ކާރާއި ސައިކަލުގެ އިތުރުން ޕިކަޕް އަދި ވޭން ހިމެނެއެވެ. މި މައުލޫމާތު ކަމާ ގުޅުންހުރި އިދާރާތަކާ ހިއްސާކޮށްފައިވާނޭކަމަށް ފުލުހުން ވަނީ ބުނެފައެވެ.
ހުޅުމާލޭގެ އެކި ސަރަހައްދުތަކުގައި އެއްވެސް ތަރުތީބެއްނެތި އުޅަނދުތައް ބަހައްޓާފައި ހުންނަ މައްސަލަ ބޮޑުވެފައިވާއިރު، އާއްމުން ބޭނުންކުރާ ބައެއް މަގުތަކުގައިވެސް ބޭނުންނުކުރާ އުޅަނދުތައް ބަހައްޓާފައި ހުންނަ މައްސަލަ ބޮޑުކަން އާއްމުން ފާހަގަކުރެއެވެ.
Advertisement
This content is created and paid for by advertisers and does not involve Voice Journalists
