ޕޭޕަލް ގެނައުމުގައި އުރީދޫއަށް މިހާހިސާބަށް އާދެވުނީ ސަރުކާރުން ދިން އެއްބާރުލުމުގެ ސަބަބުން: ހާލިދު
ޕޭޕަލްގެ ހިދުމަތް ރާއްޖެއަށް ގެނައުމުގައި މިއަދު އުރީދޫއަށް މިހާހިސާބަށް އާދެވުނީ ސަރުކާރުން ދިން އެއްބާރުލުމުގެ ސަބަބުންކަމަށް އުރީދޫ ފިންޓެކް މޯލްޑިވްސްގެ ސީއީއޯ އަދި މެނޭޖިންގ ޑިރެކްޓަރ، ޚާލިދު އަލް ހަމާދީ ވިދާޅުވެއްޖެއެވެ.
ރާއްޖެއަށް ޕޭޕަލްގެ ހިދުމަތް ގެނައުމަށް މަސައްކަތް ކުރަމުންގެންދާކަން އުރީދޫއިން ވަނީ ހާމަކޮށް އެކަން ރަސްމީކޮށް އިއުލާނުކޮށްފައެވެ. މިކަމާ ގުޅޭގޮތުން ދައުލަތުގެ މީޑިއާއިން ގެނެސްދިން ހޭޔަންބޯ ޕްރޮގްރާމުގައި ޕްރެޒެންޓަރު ކުރި ސުވާލަކަށް ޖަވާބުދެއްވަމުން ހާލިދް ވިދާޅުވީ އުރީދޫއިން ޕޭޕަލްގެ ހިދުމަތް ތައާރަފްކުރާ ފުރަތަމަ ޤައުމަކަށް ރާއްޖެ ވެގެންދާއިރު، މިކަމުގައި އަދުގެ ސަރުކާރުގެ ފަރާތުން ވަރަށް ރަނގަޅަށް އެއްބާރުލުން ދެމުންދާކަމަށެވެ.
މިގޮތުން ޕޭޕަލްގެ ހިދުމަތް ރާއްޖޭގައި ދެވޭނޭކަން ޔަގީންކަން ލިބިގެންދިޔައިރު، އެކަމުގައި އަދުގެ ސަރުކާރުން އިސްނަގައިގެން އުރޫދުއާއެކު މިހާތަނަށް ކުރި މަސައްކަތް ހާލިދުގެ ވާހަކަައިގައި ފާހަގަކުރެއްވިއެވެ.
އުރީދޫގެ ވެރިން، އިގްތިސާދީ ވަޒީރާއެކު... ފޮޓޯ: އުރީދޫ
ހާލިދު ވިދާޅުވީ ޕޭޕަލްގެ ހިދުމަތް ރާއްޖެއަށް ތައާރަފްކުރުމަށް މަސައްކަތްތައް ކުރަމުން ދިޔައިރު، ކުރިމަތިވި ކަންކަމުން އަރައިގަތުމަށް އިކޮނޮމިކް މިނިސްޓަރު މުހައްމަދު ސައީދާއެކު ވަރަށްގާތުން ކާމިޔާބު މަސައްކަތްތަކެއް ކުރެވިފައިވާކަމަށެވެ. ހާލިދު ވިދާޅުވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ 2.0 އަށް ވާސިލްވުމަށް ކުރެވޭ މަސައްކަތްތަކުގައި އުރީދޫއިންވެސް ދާނީ އެމަގުން ކަންކަން ކުރަމުން ކަަމަށެވެ. ޕޭޕަލް ގެނައުމަށް ކުރަންޖެހޭ މަސައްކަތް އަދިވެސް އެބަހުރިކަން ފާހަގަކުރައްވަމުން ހާލިދު ވިދާޅުވީ މިހާރު ކުރިއަށްދަނީ އެ މަސައްކަތްތައްކަމަށެވެ.
އުރީދޫ އެމްފައިސާ މެދުވެރިކޮށް ޕޭޕަލްގެ ހިދުމަތް ލިބިގެންދާއިރު، މަރުކަޒީ ބޭންކުން ވަނީ، އުރީދޫގެ ފިންޓެކް ކުންފުންޏަށް ބޭރުން ފައިސާ ގެނައުމުގެ ހުއްދަ ރަސްމީކޮށްދީފައެވެ.
ޕޭޕަލްގެ ހިދުމަތް ރާއްޖެއަށް ގެނައުމަށް ނިންމާފައިވާކަން ހާމަކުރަމުން އުރީދޫއިން މިދިޔަ ބުދަދުވަހު ބުނެފައިވަނީ ޕޭޕަލް އާއެކު ވުމަށް ހަމަޖެހިފައިވާ މި ޕާޓްނަރޝިޕްގެ ސަބަބުން ރާއްޖޭގެ ވިޔަފާރިވެރިންނާއި އަމިއްލަ ފަރުދުންނަށް ވެސް ބޮޑެތި ފައިދާތަކެއް ލިބިގެންދާނޭކަަށެވެ. އަންނަ އަހަރު ތައާރަފް ކުރުމަށް ހަމަޖެހިފައިވާ ޕޭޕަލް ޚިދުމަތާއިއެކު، ދުނިޔޭގެ އެކި ކަންކޮޅުތަކުގައި ޕޭޕާލް ގެ ޚިދުމަތް ގަބޫލުކުރާ ކޮންމެ ވިޔަފާރިއަކާއެކުވެސް ރާއްޖޭގައި ދިރިއުޅޭ ހުރިހާ ފަރާތްތަކަށްވެސް ވިޔަފާރިކޮށް، ޕޭޕަލް އަދި އެމްފައިސާ އެކްއުންޓް ތަކުން ފައިސާގެ މުއާމަލާތް ކުރެވިގެންދާނޭކަމަށް އުރީދޫއިން ބުންޏެވެ
ޕޭޕަލްގެ ހިދުމަތަކީ އެ ހިދުމަތަކަށް ދިވެހިން ވަރަށްބޮޑަށް އެދިއެދިތިބި ހިދުމަތެކެވެ. ހާއްސަގޮތެއްގައި މި ހިދުމަތް ލިބުމަކީ ދިވެހި ޒުވާނުން ވަރަށްބޮޑަށް އެދިއެދިތިބި ކަމެކެވެ. އޮންލައިން ވިޔަފާރީގެ އެންމެ ފުޅާ، ޕޭޕަލް ފަދަ ޕްލެޓްފޯމްތައް ދިވެހީންގެ އަތްމައްޗަށް ގެނެސްދެއްވައި، އުފެއްދުންތެރިކަމުގެ އިޤްތިޞާދު އިތުރަށް ފުޅާކޮށްދެއްވާނެކަމުގެ ޔަޤީންކަން ރައީސް ޑރ.މުހައްމަދު ވަނީ މިފަހުން ށ.ކޮމަންޑޫގައި ބޭއްވި ޖަލްސާގައިވެސް ދެއްވާފައެވެ.
Advertisement
This content is created and paid for by advertisers and does not involve Voice Journalists
