ކ. ހުރާގެ ވަކި ސަރަހައްދެއް ފުޑް ސެކިއުރިޓީއަށް ޚާއްސަ ކުރުމަށްޓަކައި ދަނޑުވެރިކަމާއި ބެހޭ ވުޒާރާ އާއި ހުރާ ކައުންސިލާއި ދެމެދު މަޝްވަރާތައް ފެށިއްޖެއެވެ.
މިކަމާ ގުޅޭގޮތުން މިއަދު މިނިސްޓްރީގައި ބޭއްވި ބައްދަލުވުމުގައި މިނިސްޓަރ ޑރ. މަރްޔަމް މާރިޔާ އާއި މިނިސްޓްރީގެ އިސް ވެރިންގެ އިތުރުން ހުރާ ކައުންސިލްގެ ރައީސާއި މެންބަރުން ބައިވެރިވެވަޑައިގެންނެވިއެވެ.
މި ބައްދަލުވުމުގައި ވާހަކަފުޅު ދައްކަވަމުން މިނިސްޓަރ ޑރ. މަރްޔަމް މާރިޔާ ވިދާޅުވީ ފުޑް ސެކިއުރިޓީއަކީ މިއަދުގެ ސަރުކާރުން ވަރަށް އިސްކަމެއް ދެއްވާ ދާއިރާއެއް ކަމަށެވެ. އަދި މިކަމަށް ބޭނުންވާ ހުއްދަތަކާއި އެހެނިހެން ކަންކަން ހަމަޖެއްސުމުގައި ސަރުކާރުގެ ހުރިހާ އިދާރާތަކުންވެސް އިސްކަންދީގެން މަސައްކަތް ކުރަމުންދާކަން ފާހަގަކުރެއްވިއެވެ.
މާލެ ސަރަހައްދުގައި ފުޑް ސެކިއުރިޓީއަށް ޚާއްސަ ބިމެއް އޮތުމަކީ ރާއްޖޭގެ ފަތުރުވެރިކަމުގެ ދާއިރާއަށާއި އިޤްތިޞާދަށް ވަރަށް ބޮޑު މަންފާއެއް ކުރާނެ ކަމެއްކަން މިނިސްޓަރ ފާހަގަކުރެއްވިއެވެ.
އަދި ބައްދަލުކުރެއްވުމުގައި ފުޑް ސެކިއުރިޓީއަށް ވަކި ސަރަހައްދެއް ގާއިމްކުރުމަކީ އެރަށު ކައުންސިލުންވެސް ޝައުގުވެރިކަން ހުރި ކަމެއް ކަމަށާއި، އެކަމަށް ދެވޭނެ ހުރިހާ އެއްބާރުލުމެއް ކައުންސިލްގެ ފަރާތުން މިނިސްޓްރީއަށް ދޭނެ ކަމަށް އެ ރަށު ކައުންސިލުން ފާހަގަކޮށްފައިވެއެވެ. އަދި އެކަމަށް ބޭނުންވާ ބިމެއް ކަނޑައަޅައި، ކަމާގުޅޭ އިދާރާތަކުގެ ހުއްދަތަކަށް އަވަހަށް ހުށަހަޅުއްވާނެ ކަމަށްވެސް އެ ކައުންސިލުން ވަނީ ފާހަގަކޮށްފައެވެ.
Advertisement
This content is created and paid for by advertisers and does not involve Voice Journalists
