އެމްއެންޔޫއިން ލ. ހުޅިމެންދޫގައި ތަރައްގީކުރުމަށް ހަމަޖެހިފައިވާ ރިސޯޓާއި ހޮޓެލް ސްކޫލްގެ މަޝްރޫއު ކުރިއަށް ގެންދިއުމަށް މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)އާ މިއަދު ހަވާލުކޮށްފިއެވެ.
މި މަޝްރޫއު އެމްއޭސީއެލްއާ ހަވާލުކުރުމަށް ދެ ފަރާތުގެ މެދުގައި ސޮއިކުރެވުނު އެއްބަސްވުމުގައި، އެމްއޭސީއެލްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އިބްރާހިމް ޝަރީފް މުހައްމަދެވެ. އަދި އެމްއެންޔޫގެ ފަރާތުން ސޮއިކުރެއްވީ ޑެޕިއުޓީ ވައިސް ޗާންސެލަރު ރަހީމާ އަބްދުއްރަހީމެވެ.
މި އެއްބަސްވުމުގައި ސޮއިކުރެވުނީ ރައީސް ޑރ. މުހައްމަދު މުއިއްޒު ލ. އަތޮޅަށް ކުރައްވަމުން ގެންދަވާ ދަތުރުފުޅުގައި މިއަދު ހެނދުނު މާމެންދޫގައި ބޭއްވި ޖަލްސާގައެވެ.
ހުޅިމެންދޫގައި ރިސޯޓަކާއި ޓްރެއިނިން ސްކޫލެއް ތަރައްގީކުރުމަށް ޓޫރިޒަމް މިނިސްޓްރީން އެމްއެންޔޫއާ ހަވާލުކޮށްފައިވަނީ 2022 ވަނަ އަހަރުގެ ނޮވެމްބަރު 10 ވަނަ ދުވަހުއެވެ. ރައީސް ޑރ. މުޙައްމަދު މުޢިއްޒު ވިދާޅުވި ގޮތުގައި މި މަޝްރޫއުގެ މަގުސަދަކީ ޓޫރިސްޓުންނަށް ޚިދުމަތް ދިނުމުގެ އިތުރުން، ހޮސްޕިޓަލިޓީ ދާއިރާއިން ފަންނީ މީހުން ބިނާކުރުމެވެ.
އަދި މި މަޝްރޫއުގެ ދަށުން ހުޅިމެންދޫގައި ތަރައްގީކުރާނީ ފަސްތަރީގެ ރިސޯޓެއް ކަމަށާއި، އެތަނުގައި ގާއިމުކުރާ ހޮޓެލް ސްކޫލަކީ ހޮސްޕިޓާލިޓީ ދާއިރާގެ ފަންނީ މީހުން ބިނާކުރުމަށް ތަރައްޤީކުރެވޭ އެންމެ މަތީ ފެންވަރުގެ ތަނަކަށް ވާނެ ކަމަށް ވެސް ރައީސް ވިދާޅުވިއެވެ. ރައީސް މުއިއްޒު ވިދާޅުވީ މި މަޝްރޫއުގެ ސަބަބުން ހުޅިމެންދޫއާއި ލ. އަތޮޅާއި މުޅި ރާއްޖޭގެ ފަތުރުވެރިކަމުގެ ސިނާއަތަށް ފައިދާކުރާނެއެވެ.
މަޝްރޫއު އެމްއޭސީއެލްއާ ހަވާލުކުރުމަށް ނިންމާފައިވަނީ، އެ ކުންފުންޏަކީ މިހާރުވެސް މި ދާއިރާގެ މަސައްކަތްތައް ކުރަމުންދާ ކުންފުންޏަކަށް ވެފައި، މ. އަތޮޅުގައި ސިންގަޕޫރުގެ ޗަންގީ އެއަރޕޯޓް ސާވިސަސް ކުންފުންޏާ ގުޅިގެން މަޑިފުށި ޕްރައިވެޓް އައިލެންޑް ރިސޯޓް ހިންގަމުން ގެންދާތީއެވެ.
Advertisement
This content is created and paid for by advertisers and does not involve Voice Journalists
