އިސްރާއީލްގެ ހައްދުފަހަނަ އަޅާފައިވާ ސިފައިން ފަލަސްތީނުގެ ޣައްޒާގައި ދިރިއުޅެމުންދާ ރައްޔިތުންނަށް މިފަހުން ނުކުރާ ޒާތުގެ ޖެއްސުމެއްކުރަން ފަށައިފިއެވެ.

އަލްޖަޒީރާއިން ބުނީ ހަނގުރާމަ ހުއްޓާލުމަށްފަހު ޢައްޒާގެ ރައްޔިތުން އެމީހުންގެ އަމިއްލަ ވަޒަނަށް އައިސް ސުންނާފަތިވެފައިވާ އެމީހުންގެ ގޯތި ގެދޮރު ސާފްކުރުމުގެ މަސައްކަތް ފަށާފައިވަނިކޮށް އިސްރާއީލް ސިފައިން ޣައްޒާގެ އެކި ސަރަހައްދުތަކަށް ކުނިއަޅަން ފަށާފައިވާކަމަށެވެ. އެގޮތުން މިއަދުވެސް ހަލާކުވެފައިވާ އިމާރާތްތަކުގެ ބޮޑެތި ބައިތަކާއި އެނޫންވެސް ކުނިބުނިތައް ގައްޒާތެރެއަށް ގެނެސް އަޅާފައިވާކަމަށާއި، މީގެ ތެރޭގައި ނުރައްކާތެރި ކުނިބުނިވެސް ހިމެނޭކަމަށް އެ ނޫހުން ބުންޏެވެ.

އަލްޖަޒީރާއިން ވަނީ ޔަހޫދީން ގައްޒާގެ ތެރެއަށް ކުނިއަޅާ ވިޑިއޯއެއްވެސް އާއްމުކޮށްފައެވެ.

ޣައްޒާއަށް އެންމެ ގަދައަށް ހަމަލާދިން ދުވަސްވަރު އިސްރާއީލް ސިފައިން ދިފާއުގައި ބޭނުންކުރި ބޮޑެތި މާސިންގާ ކޮންކްރިޓް ބެރިފަދަ ތަކެތި ޤައްޒާތެރެއަށް އުކާލަމުންދާއިރު، އިސްރާއީލް ސިފައިން ދަނީ އެމީހުންގެ މީހުނަށް ގައްޒާއަށް ކުނިއެޅުމަށް ހިތްވަރުދެމުންނެވެ. އެގޮތުން އިސްރާއީލްގެ އަމިއްލަ ކުންފުނިތަކަށް އެޤައުމުގައި އުފެދޭ ކުނިތައް ޣައްޒާސިޓީއަށް އެޅުމަށް އަންގާފައިވާކަމަށް އަލްޖަޒީރާއިން ވަނީ ބުނެފައެވެ. އިސްރާއީލް ސިފައިން މީގެ ކުރިންވެސް ފަލަސްތީނު ރައްޔިތުންނަށް މިގޮތަށް ޖެއްސުންކުރުމުގެ އަމަލުތައް ވަނީ ހިންގާފައެވެ. 

ނަމުގައި ހަނގުރާމަ ހުއްޓާލިކަމަށްބުނެ އިސްރާއީލުން ދަނީ ފަލަސްތީނު ރައްޔިތުންނަށް އެތައް ގޮތަކުން ދިރިއުޅެން ދަތިކުރަމުންނެވެ. އެގޮތުން އެންމެ ފާހަގަކޮށްލެވެނީ ފަލަސްތީނު ރައްޔިތުންގެ ޒައިތޫނި ދަނޑުތައް ހަލާކުކުރުމަށް ކުރަމުންގެންދާ މަސައްކަތްތަކެވެ.