އަހަރެއްގެ ތެރޭގައި ދިއްފުށިން 23 ހެކްޓަރުގެ ބިން ހިއްކައި ނިންމާނަން: ރައީސް
ދިއްފުށީގެ ބިން ހިއްކުން ދެގުނަ ކުރާ މަޝްރޫއުގެ މަސައްކަތް އަހަރެއްގެ ތެރޭގައި ނިންމަވާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ކ. ދިއްފުށްޓަށް މިއަދު ވަޑައިގެން އެ ރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައި ރައީސް ވިދާޅުވީ، ދިއްފުއްޓަކީ ތޮއްޖެހިފައިވާ ބައިބޯ ރަށެއް ކަމުގައިވާތީ، އެ ރަށަށް ބިން އިތުރުކުރުމަކީ، އެ ރަށު ރައްޔިތުން އެތައް އަހަރެއްވަންދެން ކުރަމުންދިޔަ އުންމީދެއްކަމަށެވެ.
އަދި މިއަދު އެ ރަށުގައި ފެށި ބިން ހިއްކުމުގެ މަޝްރޫއުގެ ދަށުން 23 ހެކްޓަރުގެ ބިން އިތުރުކުރެވުމުން، ރަށުގެ ބިމުގެ ޖާގަ ގާތްގަނޑަކަށް ދެގުނައަށް އިތުރުވާނޭކަމަށާއި އެއާއެކު، އެ ބިމަކީ ބޯހިޔާވަހިކަމަށާއި، ފަތުރުވެރިކަމަށާއި އަދި އުމްރާނީ އެކި މަސައްކަތްތަކަށް ބޭނުންކުރެވޭނޭ މުހިންމު ވަސީލަތަކަށް ވާނޭކަމަށް ރައީސް ވިދާޅުވިއެވެ.
އެއާއެކު ރައީސް ވަނީ އެ މަޝްރޫއު ކުރިޔަށް އޮތް އެއް އަހަރުގެ ތެރޭގައި ނިންމަވާނެ ކަމަށް ވިދާޅުވެފައެވެ.
މިރަށަކީ 27 ހެކްޓަރުގެ ރަށެއް. ރަށަށް އިތުރު 23 ހެކްޓަރު މި މަޝްރޫޢުގައި އެބަ އިތުރުކުރެވޭ. އަޅުގަނޑު ދޭ ޔަގީންކަމަކީ މި މަޝްރޫޢު 1 އަހަރުދުވަހުގެ ތެރޭގައި ނިންމާނެކަމުގެ ޔަގީންކަން. މަސައްކަތް ފަށާފަވާއިރު މަޝްރޫޢު ހުއްޓުމެއް ނެތި ކުރިއަށް ގެންގޮސް ބިން ހިއްކާ، ހިއްކާ ސަރަޙައްދު ޙިމާޔަތްކޮށް 1 އަހަރުން ނިންމާނަން
ރައީސް ޑރ. މުޙައްމަދު މުޢިއްޒު
މީގެ އިތުރުން ދިއްފުއްޓަކީ ރަށު ފަތުރުވެރިކަން ކުރިއަރަމުން އަންނަ ރަރަށަކަށްވުމާއެކު، ދިއްފުށީގައި ޑޮލަރު އޭޓީއެމް ބަހައްޓާ ޚިދުމަތް ދޭން ނިންމާފަވާކަމަށްވެސް ރައީސް ވަނީ ވިދާޅުވެފައެވެ.
މިއަދު އެމްޓީސީސީއާއި ހަވާލުކުރި ދިއްފުށީގެ ބިން ހިއްކުމުގެ މަޝްރޫއުގެ ދަށުން، 22.97 ހެކްޓަރުގެ ބިން ހިއްކުމާއި، 710 މީޓަރުގެ ސަރަޙައްދެއްގެ ރިވެޓްމެންޓް ޖެހުމާއި، 670 މީޓަރުގެ ސަރަޙައްދެއްގައި ގްރޮއިން ޖެހުމާއި، މިހާރު ޖަހައިފައި ހުރި ގްރޮއިންއަށް 270 މީޓަރު އިތުރުކުރުމާއި އަދި މިހާރު ޖަހައިފައިހުރި ރިވެޓްމެންޓުގެ 300 މީޓަރު މަރާމާތުކުރުމުގެ މަސައްކަތް ކުރާނެއެވެ.
Advertisement
This content is created and paid for by advertisers and does not involve Voice Journalists
