އަންނަ އަހަރަށް ލަފާކުރާ ދައުލަތުގެ ބަޖެޓު މާދަމާ ހުށަހަޅަން އެޖެންޑާކޮށްފިއެވެ.

މަޖިލީހުގެ މިއަދުގެ ޖަލްސާ ނިންމަވާ ލައްވަމުން މަޖިލީހުގެ ރައީސް އަބްދުއްރަހީމް އަބްދުﷲ ވަނީ، އަންނަ އަހަރަށް ލަފާކުރާ ދައުލަތުގެ ބަޖެޓު މާދަމާ މަޖިލީހަށް ހުށަހަޅާނެކަން އިއުލާނުކުރައްވާފައެވެ. 

އާންމުކޮށް މަޖިލިސް ބުރާސްފަތި ދުވަސްތަކުގައި ނުބާއްވާ ނަމަވެސް، ބަޖެޓުގެ މަސައްކަތަށް މާދަމާ ހެނދުނު 09:00 އަށް ޖަލްސާއެއް ވަނީ އެޖެންޑާކޮށްފައެވެ.

މާދަމާ މަޖިލީހަށް ބަޖެޓު ހުށަހަޅާ ނަމަވެސް، މަޖިލީހަށް ހުށަހަޅަނީ ކިހާވަރެއްގެ ބަޖެޓެއް ކަމެއް ސަރުކާރުން ހާމަކޮށްފައެއް ނުވެއެވެ. އެހެން ނަމަވެސް މި އަަންނަ އަހަރުގެ ބަޖެޓުގެ ބޮޑު ބައެއް އިސްކަންދޭނީ ޞިއްޙީ ދާއިރާއަށް ކަމުގައި ރައީސް ޑރ. މުޙައްމަދު މުޢިއްޒު ވަނީ ވިދާޅުވެފައެވެ.

އެގޮތުން ބަލިޖެހުމުގެ ކުރިން ބަލިން ރައްކާތެރިވުން ނުވަތަ ޕްރިވެންޓިވް ކެއަރ އަދި ބަލިޖެހޭ ހިސާބުން ދެވޭ ފަރުވާގެ ދާއިރާއިން ގިނަ މަޝްރޫޢުތަކެއް ކުރިއަށް ގެންދިއުމަށް 2026 ވަނަ އަހަރުގެ ބަޖެޓުގައި މަނުއްވާފައިވާނެ ކަމަށާއި، އެގޮތުން ރައްޔިތުންނަކީ ރައްކާތެރި ޞިއްޙަތެއް ލިބިގެންވާ ބަޔަކަށް ހެދުމަކީ ވަރަށް މުހިންމު އިންވެސްޓްމަންޓެއް ކަމުގައި ޤަބޫލުފުޅުކުރައްވާ ކަމަށް ރައީސް ވިދާޅުވެފައިވެއެވެ.

ރައީސް އެފަަދައިން ވިދާޅުވިއިރު، މި އަހަރުގެ ބަޖެޓުގެ ބޮޑުބައެއް ސަރުކާރުން އިސްކަންދިނީ ބޯހިޔާވަހިކަމަށެވެ. އެހެން ނަމަވެސް ބޯހިޔާވަހިކަމުގެ މަޝްރޫއުތަކަށް ޖެހި 1.8 ބިލިއަން ރުފިޔާގެ ތެރެއިން މިހާތަނަށް ޚަރަދުކުރީ އެންމެ ނުވަ އިންސައްތަ ކަމަށް ފިނޭންސް މިނިސްޓްރީގެ ހިސާބުތަކުން ދައްކައެވެ. 

އަދި މި އަހަރަށް ފާސްކުރި 56.6 ބިލިއަން ރުފިޔާގެ ބަޖެޓުގެ ތެރެއިން މިހާތަނަށް ޚަރަދުކުރީ 30 ބިލިއަން ރުފިޔާއެވެ.