ކުރިއަށްއޮތް އަހަރަށް ލަފާކޮށް ސަރުކާރުން މިއަދު ރައްޔިތުންގެ މަޖިލީހަށް ހުށަހެޅި ބަޖެޓަކީ އެއްވެސް ހަޤީގަތެއް އެކުލެވިފައިނުވާ ބިލާހެއްގެ ގޮތުގައި އެމްޑީޕީގެ ރައީސް ޢަބްދުﷲ ޝާހިދު ސިފަކުރައްވައިފިއެވެ.

ސަރުކާރުން މިއަދު ވަނީ އަންނަ އަހަރަށް ލަފާކޮށް 64.2 ބިލިއަން ރުފިޔާގެ ބަޖެޓެއް ރައްޔިތުންގެ މަޖިލީހަށް މިއަދު ހުށަހަޅާފައެވެ. ބަޖެޓްގައި އެކުލެވިފައިވާ އަދަދުތަކާ ގުޅޭގޮތުން ޝާހިދު މިރޭ އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ އެ ބަޖެޓަކީ ހަޤީޤަތާ ދުރު އިގްތިސާދީ އަސާސްތަކުން ވަކިވެފައިވާ އިޖުތިމާއީ ހިދުމަތްތަކާ ދުރު ބަޖެޓެއްކަމަށެވެ.

ޝާހިދު ވިދާޅުވީ ދިރިއުޅުމުގެ ހަރަދުތައް ބޮޑުވުމާއި ވިޔަފާރި ކުރިއެރުން ދަށްވެފައިވާ މި ދަނޑިވަޅުގައި ކުރިއަށްއޮތް ތަނުގައި އާއްމު ހާލަތު ރަނަގޅުވާނޭކަމުގެ އެއްވެސް އުއްމީދެއް މި ބަޖެޓުން ފެންނަން ނެތްކަމަށެވެ. މި ސަރުކާރު ވެރިކަމާ ހަވާލުވުމަށްފަހު އެކުވެރި އެއްވެސް ދައުލަތަކުން އަދި ބައިލޭޓްރަލް ޕާޓްނަރަކުން މާލީގޮތުން އެއްވެސް އެހީތެރިކަމެއް ލިބިފައިނުވާކަމީ ސަރުކާރުގެ އިގްތިސާދީ އަދި ހާރިޖީ ސިޔާސަތު ފެއިލްވެފައިވާ ކަމުގެ ހެތްކެއްކަމަށް ޝާހިދު ވިދާޅުވިއެވެ.

ޝާހިދު ވިދާޅުވީ ބަޖެޓުން ވާނެ ރަނގަޅެއް ނެތްކަމަށާއި، އިތުރު އަހަރެއް ގެއްލުން ނޫންކަމެއް ނުވާނޭކަމަށެވެ. 

ސަރުކާރުން އަންނަ އަހަރަށް ލަފާކުރި ބަޖެޓާ ގުޅޭގޮތުން މާލީ ވަޒީރު މޫސާ ޒަމީރު ބަޖެޓް ހުށަހަޅުއްވައިދެއްވަމުން ވިދާޅުވެފައިވަނީ،  މިފަހަރުގެ ބަޖެޓުގައި ހިމަނާފައިވާ 9.3 ބިލިއަން ރުފިޔާގެ ސުކޫކާއި ބޮންޑު އަނބުރާ ދެއްކުމުގެ ޚަރަދު ނުލައި އަންނަ އަހަރުގެ ބަޖެޓަކީ 55.0 ބިލިއަން ރުފިޔާ ކަމަށެވެ.

މިއީ 2021 ވަނަ އަހަރު ސަރުކާރުން އިޝޫކޮށްފައިވާ 500 މިލިއަން އެމެރިކާ ޑޮލަރުގެ ސުކޫކުގެ އިތުރުން، އޭގެ ކުރިން އިޝޫކުރި 100 މިލިއަން އެމެރިކާ ޑޮލަރުގެ ބޮންޑެއް އަނބުރާ ދައްކަން ހަމަޖެހިފައިވާތީ، ދަރަނި އަނބުރާ ދެއްކުމުގެ ޚަރަދު ބޮޑުވުމުގެ ސަބަބުން އައި އިތުރުވުމެއް ކަމަށް ވަޒީރު ފާހަގަކުރެއްވިއެވެ.

މާލީ ވަޒީރު ވިދާޅުވީ މި ސަރުކާރަށް ވާރުތަވި ސުކޫކާއި ބޮންޑު އަނބުރާ ދެއްކުމުގެ ޚަރަދު ނުލައި މިއީ މި ހިނގާ 2025 ވަނަ އަހަރަށް ވުރެ ކުޑަ ބަޖެޓެއް ކަމަށެވެ. ނަމަވެސް މެދުރާސްތާގައި ދަރަނި އަނބުރާ ދެއްކުމުގެ ޚަރަދު ކުޑަވާނެކަމަށް ބެލެވޭތީ 2027 ވަނަ އަހަރު 56.8 ބިލިއަން ރުފިޔާ އަދި 2028 ވަނަ އަހަރު 57.0 ބިލިއަން ރުފިޔާއަށް ދައުލަތުގެ ބަޖެޓު ދަށްވާނެކަމަށް ލަފާކުރެވޭކަަމަށް ވިދާޅުވިއެވެ