ބޭރުގެ އެކި ފަރާތްތަކުން ނަގާފައިވާ ދަރަނީގެ ތެރެއިން އަންނަ އަހަރުގެ އޭޕްރިލްމަހު އެކަނިވެސް ރައްޖެއިން 600 މިލިއަން ޑޮލަރު ދައްކަންޖެހޭކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.

ސަރުކާރުން ވަނީ އަންނަ އަހަރަށް ލަފާކުރާ ދައުލަތުގެ ބަޖެޓް ރައްޔިތުންގެ މަޖިލީހަސް އިއްޔެ ހުށަހަޅާފައެވެ. ބަޖެޓް މަޖިލީހަށް ހުށަހެޅިއިރު އެންމެ ފާހަގަކުރެވިގެން ގޮސްފައިވަނީ ކުރީގެ ސަރުކާރުތަކުން ނަގާފައިވާ ދަރަނި އަނބުރާ ދެއްކުމަށް އަންނަ އަހަރުގެ ބަޖެޓުން އަހަމިއްޔަތުކަން ދީފައިވާ މިންވަރެވެ.

ބަޖެޓް ހުށަހަޅުއްވަމުން މާލީ ވަޒީރު ވިދާޅުވީ މި ސަރުކާރުން ވެރިކަމާ ހަވާލުވިއިރު، މެކްރޯ އިކޮނޮމިކް ހާލަތު އޮތީ ނާޒުކު ފައްތަރެއްގައި ކަމަށެވެ. އެގޮތުން 2017 ވަނަ އަހަރު، ދުނިޔޭގެ އިންޓަރެސްޓް ރޭޓް ދަށުގައި ހުރި ދުވަސްވަރު ދިވެހި ސަރުކާރުން ބޮޑު އިންޓަރެސްޓް ރޭޓެއްގައި ވިއްކި ބޮންޑް ރީފައިނޭންސް ކުރުމަށާއި ޚަރަދު ފައިނޭންސްކުރުމަށް މިދިޔަ ސަރުކާރުން 2021 ވަނަ އަހަރު ބޮޑު އިންޓަރެސްޓް ރޭޓެއްގައި ސްކޫކް ވިއްކާފައިވާކަމަށެވެ.

އެ ސުކޫކް އަންނަ އަހަރު އަނބުރާ ދެއްކުމުގެ ބިޔަ ޒިންމާ މިސަރުކާރުން އުފުލަންޖެހިފައިވާކަން ފާހަގަކުރައްވަމުން މާލީ ވަޒީރު ވިދާޅުވީ އެއްވެސް ރޭވުންތެރިކަމެއް ނެތި މަޝްރޫޢުތައް އެވޯޑްކުރުމާއި، ވަކިން ޚާއްސަކޮށް މަސައްކަތުގެ ފަންނީ އަދި މާލީ ޤާބިލުކަން ނެތް ކުންފުނިތަކަށް މަޝްރޫޢުތައް އެވޯޑުކުރުމުގެ ނަތީޖާއަކީ، ވަކި އުސޫލުތަކެއްގެ ތެރެއިން ބިލްތަކަށް ފައިސާދައްކަމުން ދިޔަ ނިޒާމަށް ބުރޫއަރައި، މަޝްރޫއުތައް މަޑުޖެހި، ހުއްޓިފައި ހުރުންކަމަށެވެ.

އަދުގެ ސަރުކާރުން ގެނައި ބަދަލުތަކާއެކީގައި މިއަދާ ހަމައަށް އެންމެ ބޮޑު އިސްކަމެއްދިނީ ދިވެހި ސަރުކާރުން އަދާކުރަންޖެހޭ އެންމެހާ ދަރަނިތަކާއި ޒިންމާތައް ގަޑިންގަޑިއަށް އަދާކުރަމުންކަން ފާހަގަކުރައްވަމުން ވަޒީރު ވިދާޅުވީ މިހިނގާ އަހަރުގެ ފުރަތަމަ 40 ހަފްތާގައި ވިދިވިދިގެން ސާޕްލަސްގައި ސަރުކާރު ހިންގާފައިވާކަމަށެވެ.

ވަޒީރު ވިދާޅުވި ރިޒާވް އެ މިންވަރުގައި ހުރި ނަމަވެސް، އަންނަ އަހަރަކީ، ނިމިދިޔަ ސަރުކާރުތަކުން ދައުލަތަށް އާމްދަނީ ލިބޭ މިންގަނޑާ އިދިކޮޅަށް، އަނބުރާ އެކީ އެއްފަހަރާ ދައްކާ ގޮތަށް ނަގާފައިވާ ޖުމްލަ 600 މިލިއަން އެމެރިކާ ޑޮލަރު ދެއްކުމުގެ ޒިންމާ އަދާކުރަންޖެހޭ އަހަރުކަމަށެވެ. މިފަދަ ބޮޑު ދަރަނީގެ ޒިންމާ އެކީ އެއްފަހަރާ އަދާކުރަން ޖެހުމުން އާންމު ދިވެހި ރައްޔިތުންނަށް އަދި އެކްސްޓާނަލް އޮބްޒާވަރުންގެ މެދުގައި ދިވެހިރާއްޖޭގެ މާލީ މުސްތަގްބަލާ މެދު ނުތަނަވަސްކަން އިހްސާސްވާނޭކަން ބަޖެޓް ހުށަހަޅަމުން މިނިސްޓަރު ފާހަގަކުރެއްވިއެވެ. 

އަންނަ އަހަރަށް ލަފާކުރާ ދައުލަތުގެ ބަޖެޓުން، ސްކޫކާއި ބޮންޑު އަނބުރައި ދެއްކުމުގެ ޚަރަދުނުލައި އަންނަ އަހަރުގެ ބަޖެޓަކީ 55 ބިލިއަން ރުފިޔާ ކަމަށް މާލީ ވަޒީރު ވަނީ ވިދާޅުވެފައެވެ. ވަޒީރު ވިދާޅުވީ، 64.2 ބިލިއަން ރުފިޔާގެ އެ ބަޖެޓުން 9.3 ބިލިއަން ރުފިޔާއަކީ ސުކޫކާއި ބޮންޑު އަނބުރާ ދެއްކުމުގެ ޚަރަދު ކަމަށެވެ. 

އޭގެ ތެރޭގައި ހިމެނެނީ 2021 ވަނަ އަހަރު ސަރުކާރުން އިޝޫކޮށްފައިވާ 500 މިލިއަން އެމެރިކާ ޑޮލަރުގެ ސުކޫކުގެ އިތުރުން، އޭގެ ކުރިން އިޝޫކުރި 100 މިލިއަން އެމެރިކާ ޑޮލަރުގެ ސަނީ ސައިޑް ބޮންޑު އަނބުރާ ދެއްކުންކަމަށް ވަޒީރު ވަނީ ވިދާޅުވެފައެވެ.

ކުރިއަށްއޮތް އަހަރު ވެގެންދާނީ ރާއްޖޭގެ ތާރީހުގައިވެސް އެންމެ ބޮޑު އަދަދަކުން ދަރަނިތައް ދައްކަންޖެހޭނެ އަހަރަށްކަމަށް މާލީ ވުޒާރާއިން ވަނީ މީގެކުރިންވެސް ބުނެފައެވެ. އެގޮތުން ބޭރުގެ އެކި ފަރާތްތަކުން ނަގާފައިވާ ލޯނުތަކުގެ އިންޓަރެސްޓާއެކު 1 ބިލިއަނަށްވުރެ ގިނަ ޑޮލަރު ބޭރުގެ އެކި ފަރާތްތަކަށް ދައްކަންޖެހެއެވެ.