ކުރިއަށްއޮތް 2026 ވަނަ އަހަރުގެ ބަޖެޓް އެކުލަވާލާފައިވާނީ އަންނަ ޖީލްތަކަށް ބުރަ އުފުލަން ނުޖެހޭނޭގޮތަށްކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ.

ރައްޔިތުންގެ މަޖިލީހަށް އަންނަ އަހަރަށް ލަފާކުރާ ބަޖެޓް ހުށަހަޅުއްވައިދެއްވަމުން މާލީ ވަޒީރު ވިދާޅުވެފައިވަނީ، މި ސަރުކާރު ވެރިކަމާ ހަވާލުވިއިރު ބޮޑު ދަރަންޏެއް ވާރުތަވިއެއްކަމަކު، ސަރުކާރުން ބަޖެޓް ތައްޔާރުކޮށްފައިވާނީ އެކަމުގެ ބުރަ އަންނަން އޮތް ޖީލުތަކަށް އުފުލަން ނުޖެހޭފަދަ ގޮތަށްކަމަށެވެ. 

އެގޮތުން 2026 ވަނަ އަހަރުގެ ދައުލަތުގެ ބަޖެޓަކީ ފިސްކަލް އަދި ދަރަނީގެ ދެމެހެއްޓެނިވިކަން އިއާދަކުރުމަށް ގިނަ ފިޔަވަޅުތަކެއް ހިމަނާފައިވާ ބަޖެޓެއްކަން ވަޒީރުގެ ވާހަކާގައި ފާހަގަކުރެއްވިއެވެ.

ވަޒީރު ވިދާޅުވީ މި ބަޖެޓަކީ ރައްޔިތުންގެ އާންމު ދިރިއުޅުމާ ގުޅިފައިވާ ސިއްހަތު، ތައުލީމު އަދި ހަކަތަ ފަދަ މުހިންމު އަސާސީ ހިދުމަތްތަކަށް ދެމެހެއްޓެނިވި ހައްލުތަކެއް ގެނެސްދޭނެ ފަދަ ގޮތަކަށް ފަރުމާކޮށްފައިވާ ބަޖެޓެއްކަމަށެވެ. އެގޮތު ގައުމީ ތަރައްގީގެ މުހިންމު ލަނޑުދަނޑިތަކަށް ހަގީގީ ކުލަވަރު ގެނުވާނެ ފަދަ ބަޖެޓަކަށް އަންނަ އަހަރުެގ ބަޖެޓް ވެގެންދާނޭކަމަށް ވަޒީރު ވިދާޅުވިއެވެ.

އަންނަ އަހަރަށް ލަފާކުރާ ދައުލަތުގެ ބަޖެޓުން، ސްކޫކާއި ބޮންޑު އަނބުރައި ދެއްކުމުގެ ޚަރަދުނުލައި އަންނަ އަހަރުގެ ބަޖެޓަކީ 55 ބިލިއަން ރުފިޔާއެވެ. ބަޖެޓް ހުށަހަޅައިދެއްވަމުން ވަޒީރު ވިދާޅުވީ، 64.2 ބިލިއަން ރުފިޔާގެ އެ ބަޖެޓުން 9.3 ބިލިއަން ރުފިޔާއަކީ ސުކޫކާއި ބޮންޑު އަނބުރާ ދެއްކުމުގެ ޚަރަދު ކަމަށެވެ.

ސަރުކާރުތަކުން ކޮންމެ އަހަރަކު ހުށަހަޅާ ބަޖެޓްގައި އާއްމު ގޮތެއްގައި އެކުވެރި ދައުލަތްތަކާއި ޖަމިއްޔާ ޖަމާއަތްތަކަށް ލިބޭ ހިލޭ އެހީއަށް ބަރޯސާވާގޮތަށް އޮންނަ ނަމަވެސް ސަރުކާރުން އަންނަ އަހަރުގެ ބަޖެޓް އެކުލަވާލާފައިވަނީ ބޭރުގެ ހިލޭއެހީއަށް ބަރޯސާވާން ނުޖެހޭގޮތަށް ބަލައިގެންކަމަށް ފިނޭންސް މިނިސްޓްރީގެ ބަޖެޓް އޮފިޝަލުން ވަނީ ފާހަގަކޮސްފައެވެ.