ނިއުޔޯކް ސިޓީގެ މޭޔަރުކަމުގެ މަގާމް ޑިމޮކްރެޓިކްގެ ކެނޑިޑޭޓް ޒަހްރާން މަމްދާނީ ކާމިޔާބުކުރައްވައިފިނަމަ، ނިއުޔޯކަށް ދަތިކުރާނޭކަމަށް އެމެރިކާގެ ރައީސް ޑޮނާލްޑް ޓްރަމްޕް އިންޒާރު ދެއްވައިފިއެވެ.
ނިއުޔޯކްގެ މޭޔަރު ހޮވުމަށް ބާއްވާ އިންތިހާބު ކުޑަތަންވެގެން އަންނައިރު، ހިޔާލު ހޯދުމުގެ ނަތީޖާތައް ދައްކާގޮތުން މޭޔަރުކަމަށް އިންތިހާބުވުން އެންމެ ގާތީ ރިޕަބްލިކަންގެ ކެނޑިޑޭޓެއްގެ ގޮތުގައި ހުންނެވި އުމުރުން 34 އަހަރުގެ މަމްދާނީއެވެ. ނިއުޔޯކްގެ މޭޔަރުކަމުގެ މަޤާމަށް މަމްދާނީ ކުރިމަތިލައްވާނޭކަން އިއުލާނުކުރި ހިސާބުން ފެށިގެން ޓްރަމްޕް އަންނަނީ އޭނާއާ ދެކޮޅަށް ފާޅުގައި އިންޒާރުތައް ދެއްވަމުންނެވެ.
ޓްރަމްޕްގެ ސޯޝަލް މީޑިއާ ޕްލެޓްފޯމްގައި ވިދާޅުވެފައިވަނީ އެމެރިކާގެ ނިއުޔޯކް ސިޓީގެ މޭޔަރުކަމަށް މަމްދާނީ އިންތިހާބު ވެއްޖެނަމަ، އެ ސިޓީއަށްދޭ މާލީ އެހީ ވަރަށްބޮޑަށް މަދުކުރާނޭކަމަށެވެ. ފެޑަރަލް ފަންޑުން ނިއުޔޯކް ސިޓީއަށް މިހިނގާ އަހަރު 7.4 ބިލިއަން ޑޮލަރު ދީފައިވާއިރު، ޓްރަމްޕް ގަބޫލުކުރައްވާގޮތުގައި މަމްދާނީއަކީ ކޮމިޔުނިސްޓް ވިސްނުން ގެންގުޅުއްވާ ބޭފުޅެކެވެ. އެހެންކަމުން އެފަދަ ބޭފުޅެއްގެ ދަށުގައި ނިއުޔޯކް ސިޓީ ހިންގަމުންދާނަމަ، އެފައިސާ ދިނުމުގެ ބޭނުމެއްނެތްކަމަށް ޓްރަމްޕް ވަނީ ވިދާޅުވެފައެވެ.
މުސްލިމް އާއިލާއަކަށް ނިސްބަތްވާ މަމްދާނީއަކީ ޔުގެންޑާއިން އެމެރިކާއަށް ހިޖުރަކުރި އިންޑިއާ ދަރިކޮޅުގެ މީހެކެވެ. މަމްދާނީއަކީ ފާޅުގައި ފަލަސްތީނަށް ތާއީދުކުރާ އިސްރާއީލާ ދެކޮޅު ބޭފުޅެކެވެ. ޓްރަމްޕް މަމްދާނީ އާ ދެކޮޅުވުމުގެ އެންމެ ބޮޑު ސަބަބަކީ ސީދާ އެމެރިކާ ދަރިކޮޅުގެ މީހަކަށް ނުވުމާއި، މުސްލިމަކަށް ނިސްބަތްވުމުގެ އިތުރުން އޭނާގެ ސިޔާސަތުތައް އިސްރާއީލާ ދެކޮޅުވުމެވެ. އަދި އެމެރިކާއިން އިސްރާއީލަށް ހަތިޔާރު ދިނުމާއި އަސްކަރީ ކަންކަމުގައި ވާގިވެރިވުމަކީވެސް މަމްދާނީ ފާޅުގައި ދެކޮޅު ހައްދަވަމުން އަންނަ ކަމެކެވެ.
ނިއުޔޯކް ސިޓީގެ މޭޔަރުކަމުގެ މަޤާމަށް ކުރިމަތިލައްވާފައިވާ ބޭފުޅުންނަށް ބަލާއިރު، އެންމެފަހުން ހިޔާލު ހޯދުމުގެ ނަތީޖާތައް ދައްކާގޮތުން އަދިވެސް ކުރީގައި އުޅެނީ މަމްދާނީއެވެ. ފަހުން އިންތިހާބަށް އަމިއްލަ ގޮތުން ނިކުންނެވި ކޫމޯ އަދި ރިޕަބްލިކަންގެ ކެނޑިޑޭޓް ކާޓިސް ސްލިވާ އުޅެނީ މަމްދާނީއަށްވުރެ މާބޮޑަށްވެސް ފަހަތުގައެވެ.
ހިޔާލުހޯދުމުގެ ޕޯލް: އޭޖޭ ލެބްސް/ނިއުސް އޭޖެންސީ
އެމެރިކާގެ ނިއުޔޯކްގެ މޭޔަރުކަމުގެ މަޤާމަށް އިދިކޮޅު ޑިމޮކްރެޓިކުން ވާދަކުރައްވާނޭ ބޭފުޅެއް ކަނޑައެޅުމަށް ނެގި ވޯޓު މަމްދާނީ ކާމިޔާބުކުރެއްވީ ނިއު ޔޯކް ސްޓޭޓްގެ ކުރީގެ ގަވަރުނަރު ކަމުގެ މަޤާމު ފުރުއްވާފައިވާ އެންޑްރޫ ކޫމޯ އާ ވާދަކޮށެވެ. އޭނާއަކީ އިސްރާއީލާއި އެމެރިކާގެ ބޮޑެތި ވިޔަފާރިވެރިންގެ ވަރަށްބޮޑު މަދަދުވެރިކަމެއް ލިބިގެން ނިކުތް ބޭފުޅެކެވެ.
ނިއުޔޯކް ސިޓީއަށް މޭޔަރަކު ހޮވުމަށް ބާއްވާ އިންތިހާބުގެ ވޯޓުލުން ކުރިއަށްދާނީ ރާއްޖެގަޑިން މިއަދު ހަވީރެވެ.
Advertisement
This content is created and paid for by advertisers and does not involve Voice Journalists
