ސްޕެޝަލް އިކޮނޮމިކް ޒޯން (އެސްއީޒެޑް) ޤާނޫނަށް ސަރުކާރުގެ ފަރާތުން ގެނައި އިސްލާހްތައް މުޅި މަޖިލީހުގެ ކޮމިޓީން މިއަދު ފާސްކޮށްފިއެވެ.

ސަރުކާރުގެ ފަރާތުން އެސްއީޒެޑް ޤާނޫނަށް އިސްލާހް ހުށަހެޅުއްވީ ބާރަށު ދާއިރާގެ މެމްބަރު އިބްރާހީމް ޝުޖާއު އެވެ. ބިލް ހުށަހަޅުއްވަމުން ސުޖާއު ވިދާޅުވެފައިވަނީ، މި ބިލް ހުށަހެޅުމުގެ މައިގަނޑު މަގްސަދަކީ ރާއްޖޭގެ ސިނާއީ، އިޖްތިމާއީ، އިގްތިސާދީ މާލީ އަދި އުމްރާނީ ތަރައްގީއަށް ބޭރުގެ އިންވެސްޓުމެންޓުތައް އިތުރުކޮށް، އެ އިންވެސްޓުމެންޓުތަކުން ރާއްޖެއަށް ލިބޭ ބޭރު ފައިސާ އިތުރުކުރުންކަމަށެވެ.

ބިލުގެ އިބްތިދާއީ ބަހުސަށްފަހު، މި ބިލް ފޮނުވާފައިވަނީ ބޮޑެތި ކަންކަން ނިންމާ މުޅި މަޖިލީހުގެ ކޮމިޓީއަށެވެ. މުޅި މަޖިލީހުގެ ކޮމިޓީން ވަނީ މި ބިލް ފާސްކޮށްފައެވެ. ބިލް ފާްކުރީ 55 މެމްބަރުންގެ ވޯޓާއެކުއެވެ. ނުފެންނަކަމަށް ވޯޓު ދެއްވީ 9 މެމްބަރެކެވެ.

އެސްއީޒެޑް ޤާނޫނަށް ހުށަހެޅި އިސްލާހުގެ ދަށުން އެސްއީޒެޑް ގާނޫނުގެ ގިނަ މާއްދާތަކަކަށް ވަނީ ބަދަލު ގެނެސްފައެވެ. އޭގެ ތެރޭގައި އެސްއީޒެޑްގައި ހިންގާ އިންވެސްޓްމަންޓެއްގެ އަގު 500 މިލިއަން ޑޮލަރަށްވުރެ ކުޑަ ނުވާގޮތަށް ބަދަލުކުރުން ހިމެނެއެވެ. މީގެ އިތުރުން އެ ޤާނޫނުގެ ނުވަ ވަނަ މާއްދާ އަދި 17 ވަނަ މާއްދާގެ ފަހަތަށް މާއްދާއެއް އިތުރުކުރުމާއި، 20 ވަނަ މާއްދާގެ ފަހަތަށް އަކުރެއް އިތުރުކުރުމާއި، 22 ވަނަ މާއްދާގެ ފަހަތަށް މާއްދާއެއް އިތުރުކުރުން ހިމެނެއެވެ. އަދި "ވިޔަފާރި ފައިދާއިން ނަގާ ޓެކްސް" މި އިބާރާތް "ވިޔަފާރި އާމްދަނީއިން ނަގާ ޓެކްސް" އަށް ބަދަލުކުރުން ވެސް ހިމެނެއެވެ.

މީގެ އިތުރުން މި ބިލް މިހާރު އޮތްގޮތުން ސަސްޓެއިނަބަލް ޓައުންޝިޕްގެ ގޮތުގައި ކަނޑައަޅާ ސަރަހައްދުގައި އިންޓަރގްރޭޓެޑް ޓޫރިޒަމްގެ އިތުރުން ރިއަލް އެސްޓޭޓް ވިޔަފާރިވެސް ކުރެވޭނެއެވެ.

މި ގާނޫނަށް ގެނެވޭ އިސްލާހުތަކާ ގުޅިގެން ހަދަންޖެހޭ ގަވާއިދުތައް، ގާނޫނަށް އަމަލުކުރަން ފަށާ ތާރީހުން ފެށިގެން ހަ މަސްދުވަހުގެ ތެރޭގައި ގެޒެޓްކޮށް ޝާއިޢުކުރަންޖެހެއެވެ.

.