ޕޭ ހާމަނައިޒޭޝަންގެ ތެރެއިން މިހާތަނަށް މުސާރަ ބޮޑުވެފައިނުވާ ސިވިލް ސާވިސްގެ މުވައްޒަފުންނާއި، ޖުޑީޝަރީގެ އަދި ކައުންސިލުތަކުގެ ހުރިހާ މުވައްޒަފުންގެ މުސާރައަށް ހެޔޮ ބަދަލުތަކެއް ގެނެސްފައިވާ ކަމަށާ 20,000 މުވައްޒިފުންގެ މުސާރަ މި މަހުން ފެށިގެން ބޮޑުވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ ވިދާޅުވެއްޖެ އެވެ.

ފުވައްމުލަކު ސިޓީއަށް ވަޑައިގެން އެ ރަށުގެ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން ރައީސް ވަނީ ޕޭ ހާމަނައިޒޭޝަންގެ ތެރެއިން މިހާތަނަށް މުސާރަ ބޮޑުވެފައިނުވާ ސިވިލް ސާވިސްގެ މުވައްޒަފުންނާއި، ޖުޑީޝަރީގެ އަދި ކައުންސިލުތަކުގެ ހުރިހާ މުވައްޒަފުންގެ މުސާރައަށް ގެނެސްފައިވާ ބަދަލާއި ގުޅޭގޮތުން ވާހަކަފުޅު ދައްކަވާފަ އެވެ.

ރައީސް ވިދާޅުވީ މި ބަދަލާއެކު ހުރިހާ މުވައްޒިފުންގެ އަސާސީ މުސާރަ ވަނީ ބޮޑުވެފަ އެވެ. ވިދާޅުވީ އެންމެ ކުޑަކޮށް އަސާސީ މުސާރަ ކަނޑައެޅިފައިވާ މުވައްޒިފުންނަށް ވެސް 7,000 ރުފިޔާއަށް ވުރެ ބޮޑު އަސާސީ މުސާރައެއް ލިބިގެންދާނެ ކަމަށެވެ.

"މުސާރައަށް ގެނެވުނު ބަދަލާއި ގުޅިގެން މުވައްޒިފުންގެ އާމްދަނީ އިތުރުވެގެންދާނެ. އޭގެ ސަބަބުން ދިިރިއުޅުމުގެ ފެންވަރު މަތިވުމުގެ އިތުރަށް މުވައްޒިފުންނަށް ފަހަށް ރައްކާކުރަން ލިބޭ އެއްޗެއް އިތުރުކުރުން މަޤްސަދަކީ," ރައީސް ވިދާޅުވި އެވެ.

ރައީސް ވިދާޅުވި ގޮތުގައި މުސާރައަށް މި ގެނައި ބަދަލުގެ ސަބަބުން ހުރިހާ މުވައްޒިފުންގެ ޕެންޝަން ފަންޑަށްވެސް ހެޔޮ ބަދަލެއް ގެނެވޭނެ އެވެ. އެގޮތުން ރިޔަޓާކުރާއިރު ރައްކާކުރެވޭ ފައިސާގެ މިންވަރު އިތުރުވާނެ ކަމަށް ވިދާޅުވި އެވެ.

އެމަނިކުފާނު ވިދާޅުވީ ސިވިލް ސާވިސްގެ މުވައްޒަފުންނާއި، ޖުޑީޝަރީގެ އަދި ކައުންސިލުތަކުގެ މުވައްޒިފުން ހިމެނޭހެން 20,000 ވުރެ ގިނަ މުވައްޒިފުންގެ މުސާރަ ވަނީ ބޮޑުވެފަ އެވެ.