ކުރިއަށްއޮތް 2026 ވަނަ އަހަރަށް ލަފާކުރާ ދައުލަތުގެ ބަޖެޓް މަޖިލީހަށް ހުށަހެޅިއިރު، ޤައުމީ ދިފާއީ ބާރުގެ ބަޖެޓް ބޮޑުވި ސަބަބު، މާލީ ވަޒީރު މޫސާ ޒަމީރު ސާފްކޮށްދެއްވައިފިއެވެ.

ރައްޔިތުން މަޖިލީހުގެ ބަޖެޓް ދިރާސާކުރާ ކޮމިޓީގައި އިދިކޮޅު އެމްޑީޕީގެ މެމްބަރު ޢަބްދުލްޢަފޫރު މޫސާ (ގަޕޯ) މިއަދު ވަނީ  އެމްއެންޑީއެފާއި ފުލުހުންގެ ބަޖެޓް ބޮޑުކުރަންޖެހުނު ސަބަބާ ބެހޭގޮތުން ސުވާލުކުރައްވާފައެވެ. ގަޕޯގެ ސުވާލަށް ޖަވާބުދެއްވަމުން މާލީ ވަޒީރު މޫސާ ޒަމީރު ވިދާޅުވީ ޤައުމީ ދިފާއީ ބާރާއި ފުލުހުންގެ ބަޖެޓް މައިގަނޑުގޮތެއްގައި ބޮޑުވެގެން ގޮސްފައިވަނީ މިފަހުން މުސާރަތަކަށް ގެނައި ބަދަލާ ގުޅިގެންކަމަށެވެ.

މީގެ އިތުރުން ނޭޝަނަލް ސަރވިސް ޕްރޮގްރާމް ފެށުމާއި، އެ ޕްރޮގްރާމްގެ ތެރެއިން ނިކުންނަ ބައެއް ކުދިން ޤައުމީ ދިފާއީ ބާރުން ވަޒީފާގެ ފުރުސަތު ލިބިގެންދާއިރު، އެކަމަށްވެސް ބަޖެޓްކޮށްފައިވާކަން މިނިސްޓަރު ފާހަގަކުރެއްވިއެވެ.

މީގެ އިތުރުން އެމްއެންޑީއެފާއި ފުލުހުންގެ ހިދުމަތަކީ އެ ދެ ދާއިރާގެ ގޮތުން ކުރާ ހަރަދުތައް ބަޖެޓް ފޮތުގައި ހިމެނިފައިނުވި ނަމަވެސް އޮންނަ އާއްމު އުސޫލުތަކުގެ ތެރެއިން ހަރަދުތައް ކުރެވޭނެ ދެ އިދާރާކަން ވަޒރު ފާހަގަކުރެއްވިއެވެ.

ސަރުކާރުން އަންނަ އަހަރަށް ލަފާކުރި ބަޖެޓްގައި ޤައުމީ ދިފާއީ ބާރުގެ އިތުރުން ފުލުހުންނަށް ކަނޑައަޅާފައިވަނީ 2.8 ބިލިއަން ރުފިޔާއެވެ. މީގެ ތެރެއިން 414.4 މިލިއަން ރުފިޔާ ކަނޑައަޅާފައިވަނީ ކެޕިޓަލް ހަރަދުގެ ގޮތުގައެވެ.