އިންޑިއާގެ ވެރިރަށް ދިއްލީގެ ރެޑް ފޯޓުގައި ބާރުގަދަ އެއްޗެއް ގޮވައި، 10 މީހަކު މަރުވެ، އެތައް ބަޔަކު ޒަހަމްވެއްޖެއެވެ.

މި ހަމަލާ ދީފައިވަނީ އިންޑިއާ ގަޑިން މިއަދު އިރުއޮއްސި 06:05 ހާއިރުއެވެ. ހަމަލާއަށްފަހު ޒަހަމްވި ގިނަ އަދަދެއްގެ މީހުން ވަނީ އެލްއެންޖޭޕީ ހޮސްޕިޓަލަށް ގެންގޮސްފައެވެ. އަނިޔާވި ގިނަ މީހުންނަށް ސީރިއަސް ޒަހަމްތައް ލިބިފައިވާކަމަށް ރިޕޯޓްތައް ބުނެއެވެ.

ދިއްލީގައި ގޮއްވާލި މި ހަމަލާ ބޮޑަށް ވައްތަރީ، ބަޔަކަށް އަމާޒުކޮށްގެން ދިން ބޮމުގެ ހަމަލާއަކާކަމަށް އެޤައުމުގެ މީޑިއާތަކުން ވަނީ ސިފަކޮށްފައެވެ.

ހަމަލާއަށްފަހު އެ ސަރަހައްދުގެ ބައެއް މަންޒަރުތައް... ފޮޓޯ: އިންޑިއާ ޓުޑޭ

މި ހަމަލާއާއެކު މުޅި އިންޑިއާއަށް ކުއްލި ސިހުމެއް އައިސްފައިވާއިރު، ބޮޑުވަޒީރު ނަރެންދުރަ މޯދީ ވަނީ ހަމަލާ ދިންތާ ކުޑައިރުކޮޅެއްގެ ތެރޭގައި ދާހިލީ ވަޒީރު އަމިތް ޝާހަށް ގުޅައި ކަމާގުޅޭގޮތުން މުއާމަލާތްތައް ކޮށްފައިކަަމަށް އެޤައުމުގެ ނޫސްތަކުން ވަނީ ބުނެފައެވެ. މި ހަމަލާއާއެކު ދިއްލީގެ އިތުރުން ބައެއް ސިޓީތައް ވަނީ އެލާޓަށް ގެނެސްފައެވެ. މިގޮތުން ދިއްލީގެ ބައެއް މާކެޓްތައް ވަގުތުން ބަންދުކޮށް ފުލުހުން ވަނީ މަގުތަކަށް ނިކުމެ ފޯރިމަރަން ފަށާފައެވެ.

އަދި ހާއްސަކޮށް ދީނީ އަޅުކަންތައް ކުރުމަށް ހާއްސަކޮށްފައި ހުންނަ ހިސާބުތަކުގައި ސަލާމަތީ ފިޔަވަޅުތައް ވަނީ ވަރަށް ވަރުގަދަކޮށްފައެވެ.

ބައެއް ރިޕޯޓްތައް ބުނާގޮތުގައި އެ ހަމަލާ ދީފައިވަނީ ކާރެއްގައި ގޮވާތަކެތި ހަރުކޮށްގެންނެވެ. މި ހަމަލާގެ ތުހުމަތު އަދި އެއްވެސް ފަރާތަކަށް ކޮށްފައެއް ނުވެއެވެ.