ބަޖެޓް ކޮމިޓީގެ ބައްދަލުވުން މިއަދު އޮތުމާއެކު މިއަދަށް ރައްޔިތުންގެ މަޖިލީހުގެ ޖަލްސާ ނިންމާލައިފިއެވެ.

މަޖިލީހުގެ ޖަލްސާ މިއަދު ނިންމާލިއިރު މެމްބަރުން ބަހުސްކުރައްވަމުން ގެންދެވީ އަންނަ އަހަރަށް ލަފާކޮށް ސަރުކާރުން ހުށަހަޅާފައިވބާ ބަޖެޓާ ގުޅޭގޮތުންނެވެ. މިއަދުގެ ޖަލްސާ ނިންމަވާލެއްވިއިރު ފުނަދޫ ދާއިރާގެ މެމްބަރު މުހައްމަދު މަމްދޫހު ވާހަކަދައްކަވަމުން ގެންދެވިއިރު ވަކި ހިސާބަކުން މަޖިލީހުގެ ރިޔާސަތުގައި އިންނެވި ނައިބުރައީސް އަހުމަދު ނާޒިމް ވަނީ މިއަދު 13:00 ގައި ބަޖެޓް ކޮމިޓީ ބައްދަލުވުމެއް ބޭއްވުަމަށް ހަމަޖެހިފައިވާތީވެ، ޖަލްސާ ހުއްޓާލިކަން އިއުލާނުކުރައްވާފައެވެ. އަދި ދެން ބަޖެޓް ބަހުސް އޮންނަ ދުވަހެއްގައި މަމްދޫހަށް ފުރުސަތު ދެއްވާނޭކަމަށް ވަނީ ވިދާޅުވެފައެވެ.

ރައްޔިތުންގެ މަޖިލީހުގެ ޖަލްސާއެއް ދެން އޮންނާނީ މިމަހުގެ 16 ވާ އާދިއްތަދުވަހުގެ 09:00 ޖަހާއިރުއެވެ. އާއްމުގޮތެއްގައި އާދިއްތަދުވަހަކީ މަޖިލީހުގެ ޖަލްސާ ނޯންނަ ދުވަހެކެވެ. ނަމަވެސް މުހިންމު ކަމެއް އޮވެއްޖެނަމަ ޖަލްސާ ބާއްވައެވެ. ރައްޔިތުންގެ މަޖިލީހުގެ ތަޅުމުގައި މިހާރު އެންމެ މުހިންމު ކަމެއްގެ ގޮތުގައި ކުރިއަށްދަނީ އަންނަ އަހަރަށް ލަފާކޮށް ސަރުކާރުން ހުށަހެޅި ބަޖެޓަށް ބަހުސްކުރުމެވެ. 

ބަޖެޓް ބަހުސް މިހާތަނަށް ދިޔައިރު އިދިކޮޅު މެމްބަރުން ވަނީ ބަޖެޓަށް ވަރަށްބޮޑަށް ފާޑު ވިދާޅުވެ ވާހަކަދައްކަވާފައެވެ. ނަމަވެސް ސަރުކާރަށް ނިސްބަތްވާ މެމްބަރުން ދަނީ ބަޖެޓްގެ ދިފާއުގައި ވާހަކަދައްކަވަމުންނެވެ. 

އަންނަ އަހަރަށް ލަފާކުރާ ދައުލަތުގެ ބަޖެޓުން، ސްކޫކާއި ބޮންޑު އަނބުރައި ދެއްކުމުގެ ޚަރަދުނުލައި އަންނަ އަހަރުގެ ބަޖެޓަކީ 55 ބިލިއަން ރުފިޔާއެވެ. ބަޖެޓް ހުށަހަޅައިދެއްވަމުން ވަޒީރު ވިދާޅުވީ، 64.2 ބިލިއަން ރުފިޔާގެ އެ ބަޖެޓުން 9.3 ބިލިއަން ރުފިޔާއަކީ ސުކޫކާއި ބޮންޑު އަނބުރާ ދެއްކުމުގެ ޚަރަދު ކަމަށެވެ.