ހެޔޮ އަގުގައި އާންމުންނަށް ގެދޮރުވެރިކަން ފޯރުކޮށްދިނުމުގެ ގޮތުން ރާއްޖޭގެ ބޭންކުތަކުން އަޅަން ކަނޑައަޅައިފައިވާ ހައުސިން ޔުނިޓުތަކުގެ ތެރެއިން ބީއެމްއެލްގެ ޔުނިޓުތައް އަޅާނެ ބިން ސަރުކާރުން ހަވާލުކޮށްފިއެވެ.
މިއަދު އެކަމަށްޓަކައި ބޭއްވި ޚާއްސަ ރަސްމިއްޔާތެއްގައި ސަރުކާރުގެ ފަރާތުން އެ ބިން ހަވާލުކުރީ އެ މަސައްކަތަށް ބީއެމްއެލްއިން އުފެއްދި ސަބްސިޑިއަރީ ކުންފުނި ކަމުގައިވާ ބީއެމްއެލް އެފޯޑަބަލް ހޯމް ލީޒިން ޕްރަައިވެޓް ލިމިޓެޑް(ބީއެމްއެލްއޭ)އާއިއެވެ.
ބީއެމްއެލްއިން މިއަދު ސޮއިކުރި ހައުސިން ސްކީމަކީ އާންމުންނަށް ގެދޮރުވެރިކަން ފުޅާކޮށް، ހެޔޮ އަގުގައި ގެދޮރު ލިބޭނެ މަގު ފަހިކޮށްދިނުމަށް އެމްއެމްއޭއިން ތައާރަފްކޮށް، ލާޒިމުކޮށްފައިވާ ގަވާއިދުގެ ދަށުން ޤާއިމްކުރާ ސްކީމެކެވެ. މި ގަވާއިދުގެ ދަށުން ރާއްޖޭގެ ހުރިހާ ކޮމާޝަލް ބޭންކުތަކުން ޖުމްލަ ލޯން ޕޯޓްފޯލިއޯގެ 10 އިންސައްތަ އާއި 15 އިންސައްތަ ދެމެދުގެ އަދަދެއް މި ސްކީމަށް ޚާއްސަކުރަން ޖެހެއެވެ.
ބީއެމްއެލްއިން ވަނީ އެކަމާއި އެއްގޮތަށް، އެމްއެމްއޭގެ ހުއްދައާއެކު ޝަރީޢާގެ ހަމަތަކާ އެއްގޮތްވާ ގޮތަށް ހިންގާނެ ސަބްސިޑިއަރީ ކުންފުންޏެއް ކަމަށްވާ ބީއެމްއެލް އެފޯޑަބަލް ހޯމް ލީޒިން ޕްރައިވެޓް ލިމިޓެޑް އުފައްދާފައެވެ. މި ކުންފުނި އުފައްދާފައިވަނީ އައިއެންއޭއެޗް ގަވާއިދުގެ 4(އޭ)(1) ވަނަ މާއްދާގެ ދަށުންކަމަށް ބީއެމްއެލް އިން ބުންޏެވެ.
އެގޮތުން އެ ބިމުގެ އެއްބަސްވުންތަކުގައި ސަރުކާރުން ފަރާތުން ސޮއިކުރެއްވީ މިނިސްޓާ އޮފް ކޮންސްޓްރަކްޝަން ހައުސިން އެންޑް އިންފްރާސްޓްރަކްޗާ ޑރ. އަބްދުﷲ މުއްތަލިބެވެ. ބީއެމްއެލްގެ ފަރާތުން ސޮއިކުރެއްވީ ބީއެމްއެލްއޭގެ އެމްޑީ ހަސަން ޝާމެވެ.
އެ އެއްބަސްވުމުގެ ދަށުން، ހުޅުމާލެ ފުރަތަމަ ފިޔަވަހި އަދި ދެވަނަ ފިޔަވަހީގެ އިތުރުން، ވިލިމާލެއިން ވެސް ބިން ވަނީ ހަމަޖައްސައިފައެވެ.
އެ ރަސްމިއްޔާތުގައި ވާހަކަފުޅު ދައްކަވަމުން ބީއެމްއެލްގެ ސީއީއޯ މުހައްމަދު ޝަރީފް ވިދާޅުވީ، ރާއްޖޭގައި ބޭންކްތަކުން ދޫކޮށްފައިވާ ލޯނުގެ 52 އިންސައްތަ ހިއްސާކުރާ ބޭންކްގެ ހައިސިއްޔަތުން، އެ މަސައްކަތުގައި ބީއެމްއެލްގެ ޒިންމާ ވަރަށް ބޮޑުކަމަށެވެ.
އެހެންކަމުން އެ މަސައްކަތަށް ކުރުމަށް ބީއެމްއެލްއޭ އުފައްދައި، އެ ކުންފުނި މެދުވެރުކޮށް އެ މަސައްކަތް ކުރިޔަށްގެންދިޔުމަށް ނިންމާފައިވާ ކަމަށް ޝަރީފު ވިދާޅުވިއެވެ. އަދި އެ ކުންފުނީގެ ބޭނުމަކީ ހައުސިން ޔުނިޓްތައް ތަރައްގީކުރުމަށްފަހު އެ ތަންތަން ކުއްޔަށްދީ، އެ ކުލީގެ މުއްދަތު ހަމަވުމުން އެ ފަރާތަކަށް އެތަން ހިބަކޮށްދިނުން ކަމަށްވެސް ޝަރީފު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
