އިޒްރޭލު ފިޔަވައި ހުރިހާ ޤައުމަކާއި ރާއްޖެއިން ގާތް ގުޅުން ބާއްވާނެ: ރައީސް
އިޒްރޭލު ފިޔަވައި ހުރިހާ ޤައުމަކާއި ރާއްޖެއިން ގާތް ގުޅުން ބާއްވާނެ ކަމަށާއި، ފަލަސްތީނު ރައްޔިތުންނަށް އަނިޔާ ދޭހާ ހިނދަކު ރާއްޖެއިން އިޒްރޭލު މީހުންނަށް މަރުޙަބާ ނުކިޔާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ މިރޭ ޕީއެންސީގެ ޖަލްސާގައި ސަޕޯޓަރުންނާއި މުޚާތަބުކުރައްވައި ވާހަކަފުޅު ދައްކަވަމުންނެވެ.
ރައީސް ވިދާޅުވީ ރާއްޖޭގެ ޚާރިޖީ ސިޔާސަތަކީ އެކުވެރިކަމާއެކު ގުޅުން ބަދަހިކުރަން ބޭނުންވާ ހުރިހާ ޤައުމަކާއެކު ކުރިއަށް ދިޔުން ކަމަށެވެ. އެ ސިޔާސަތުގެ ދަށުން އެންމެ ކައިރީގެ ޤައުމުތަކާއި، އެންމެ ދުރު ޤައުމުތަކާ ވެސް ގުޅުން ބަދަހިކުރެވޭނެ ކަމަށް ރައީސް ވިދާޅުވިއެވެ.
އެއީ އެންމެ ކައިރި ޤައުމުތައް ކަމުގައި ވިޔަސް، އެންމެ ދުރު ޤައުމުތައް ކަމުގައި ވިޔަސް، އެންމެ ކުދި ޤައުމުތައް ކަމުގައި ވިޔަސް، އެންމެ ބޮޑެތި ޤައުމުތައް ކަމުގައި ވިޔަސް އިޒްރޭލު ފިޔަވައި ހުރިހާ ޤައުމަކާއި މި ގައުމުން ގާތް ގުޅުން އޮންނާނެ. ފަލަސްތީނު ރައްޔިތުންނަށް ދޭ އަނިޔާ ދޭހާ ހިނދަކު މި ދިވެހިރާއްޖެއަކުން އިޒްރޭލު މީހުންނަކަށް ނެތް މަރުޙަބާ ކިޔުމެއް.
ރައީސް ޑރ. މުޙައްމަދު މުޢިއްޒު
އިޒްރޭލު ޕާސްޕޯޓު މަނާކުރެވުނީ ދިވެހި ރައްޔިތުން އެކަމަށް އެދޭތީ ކަމަށާއި، ފަލަސްތީނުގެ ރައްޔިތުން އަނިޔާވެރިކަމާއެކު މަރާ މީހުން ރާއްޖޭގެ ރީތި ގޮނޑުދޮށްތަކާއި މޫދުތައް ބޭނުންކުރާކަށް ދިވެހި ރައްޔިތުން ބޭނުން ނުވާކަމަށް ރައީސް ވިދާޅުވިއެވެ.
އަދި އިޒްރޭލުގެ ޕާސްޕޯޓު މަނާކުރަން އުޅުނުއިރު ޓޫރިޒަމަށް ގެއްލުންވާނެ ކަމަށް ބުނެ ގިނަ ފިއްތުންތަކެއް އެމަނިކުފާނަށް ކުރިމަތިވި ނަމަވެސް، މިއީ ޑިމޮކްރެސީއެއް ކަމުން، ޑިމޮކްރެސީގައި ކަންކަން ވާންޖެހޭނީ ރައްޔިތުން ބޭނުންވާ ގޮތަށް ކަމަށް ރައީސް ވިދާޅުވިއެވެ.
އަޅުގަނޑަށް ވަރަށް ގިނަ ފިއްތުންތައް އައި، ޕާސްޕޯޓު ބޭންކުރަން އުޅުނީމާ. ޓޫރިޒަމް ހަލާކުވާނޭ އެހެން ކަންތައްތައް ވާނޭ. އަޅުގަނޑު ޤަބޫލުކުރީ އެއީ އެކަން ވާނެ ގޮތް ނޫންކަމަށް، އެއީ މިއީ ޑިމޮކްރެސީއެއް، ޑިމޮކްރެސީގައި ކަންކަން ވާންޖެހޭނީ ރައްޔިތުން ބޭނުންވާ ގޮތަށް.
ރައީސް ޑރ. މުޙައްމަދު މުޢިއްޒު
ފަލަސްތީނުގެ ރައްޔިތުންގެ ނަސްލު ނައްތާލުމަށް، އިޒްރޭލުން ދޭ ހަމަލާތައް ހުއްޓާލަންދެން އިޒްރޭލު ޕާސްޕޯޓުގައި ރާއްޖެ އައުން މަނާކުރުމުގެ ބިލު ރައްޔިތުންގެ މަޖިލީހުން ފާސްކުރީ މިދިޔަ އޭޕްރީލް މަހުގެ 15 ގައެވެ. ރައީސް މުޢިއްޒު ވަނީ ހަމަ އެދުވަހު އެ ބިލު ތަސްދީގުކުރައްވައިފައެވެ.
ރާއްޖޭގެ މި ނިންމުމަށް ބައިނަލްއަޤްވާމީ ގިނަ ޤައުމުތަކުން ވަނީ މަރުޙަބާ ކިޔައިފައެވެ.
Advertisement
This content is created and paid for by advertisers and does not involve Voice Journalists
