ހިޔާ އަދި ވިނަރެސްގެ އެޕާޓްމަންޓްތައް ހެދުމަށް ނެގި ލޯނުތައް ލުއިކޮށްދިނުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ބޭންކް އޮފް މޯލްޑިވްސްއަށް ދަންނަވައިފިއެވެ.

އެކްސްގައި ކުރެއްވި ޕޯސްޓެއްގައި ރައީސް ޑރ.މުއިއްޒު ވިދާޅުވެފައިވަނީ، ވިނަރެސް އަދި ހިޔާގެ އެޕާޓްމަންޓްތައް ނިންމުމަށް އާއްމުން ނަގާފައިވާ ލޯނުތަކުގެ އިންޓަރެސްޓް ކުޑަކޮށްދިނުމަށް އެދިފައިވާކަމަށެވެ. 

ރައީސް ވިދާޅުވީ ހިޔާ ފްލެޓްތައް ނިންމުމަށް ދޫކޮށްފައިވާ 535 ލޯނާއި، ވިނަރެސް ފްލެޓް ގަތުމަށް ދޫކޮށްފައިވާ 26 ލޯނަކީ، ސޯޝަލް އަދި އެފޯޑަބަލް ހައުސިންގ މަޝްރޫޢު ތަކަށް ދޫކޮށްފައިވާ ލޯނުތަކަކަށް ވުމާއެކު، މި ލޯނު ތަކަށް ލުއި ގޮތްތަކެއް ހޯދުމަށް ބީއެމްއެލް އާއެކު މަޝްވަރާކުރެވިފައިވާކަމަށެވެ. 

ރައީސް އެދިވަޑައިގަންނަވާފައި ވަނީ ހިޔާ ފްލެޓް ތަކުގެ ފިނިޝިންގ ލޯނަށް މިހާރު ކަނޑައަޅާފައިވާ ޕްރޮފިޓް (އިންޓަރެސްޓް) ރޭޓް %12 އިން %10 އަށް ކުޑަ ކުރުމަށާއި، ލޯނު ދެއްކުމަށް ދަތިވެ ޑީފޯލްޓް ވެފައިވާ ފަރާތްތައް ރެގިއުލަރައިޒް ކުރެވޭނެ ޕޭމަންޓް ޕްލޭނެއް ހައްދަވައި ދެއްވުމަށެވެ.

މީގެ އިތުރުން ވިނަރެސް ފްލެޓް ގަތުމަށް ދޫކޮށްފައިވާ ލޯނަށް މިހާރު ކަނޑައަޅާފައިވާ ޕްރޮފިޓް (އިންޓަރެސްޓް) ރޭޓް %9 އިން %8 އަށް ކުޑަ ކުރުމަށްވެސް ވަނީ އެދިވަޑައިގަންނަވާފައެވެ.

ރައީސް ވިދާޅުވީ އެ މިންވަރަށް ރޭޓްތައް ކުޑަކުރެވިދާނޭކަމަށް ބީއެމްއެލުން މައުލޫމާތު ދީފައިވާކަމަށެވެ. އެގޮތުން އޮންނަ އުސޫލްތަކުގެ ތެރެއިން ލޯނުތަކުގެ އިންޓަރެސްޓްރޭޓް ދަށްކޮށްދިނުމަށް މިހާރު އެދިވަޑައިގަންނަވާފައިވާކަމަށެވެ.