ރަސްމާލެއިން 15،000 ގޯތި ފުރަތަމަ ބުރުގައި ދެއްވާނެ ކަމަށާއި، 1250 އަކަފޫޓުގެ ޖުމުލަ 25،000 ގޯތި ރަސްމާލޭން ދެއްވުމަށް ކަނޑައަޅާފައިވާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.

ހޯމަދުވަހުގެ ރޭ ސޯޝަލް ސެންޓަރުގައި ބޭއްވި ރަސްމިއްޔާތުގައި ރައީސް ވިދާޅުވި ގޮތުގައި މި ސަރުކާރުން އަލަށް ފަށާ ބޯހިޔާވަހިކަމުގެ މަޝްރޫއު ވެގެންދާނީ މާލޭގައި ދިރިއުޅޭ މާލޭގެ ރަށްވެހިންނާއި، މާލޭގައި ދިރިއުޅޭތާ ގިނަ ދުވަސްވީ ރައްޔިތުންގެ އެންމެ ބޮޑު ކެކުޅުން ކަމުގައިވާ، ބޯހިޔާވަހިކަމުގެ މައްސަލަ ދާއިމަށް ހައްލުކުރާ މަޝްރޫއަށް ކަމަށެވެ.

ރައީސުލްޖުމްހޫރިއްޔާ ވިދާޅުވީ، ބޯހިޔާވަހިކަމަކީ މި ސަރުކާރުގެ އެންމެ މުހިއްމު ވައުދު ކަމަށާއި، ބޯހިޔާވަހިކަމާ ނުލައި އިޖުތިމާއީ މައްސަލަ އެއްވެސް އަދި އިގްތިސާދީ މައްސަލައެއްވެސް ހައްލު ނުވާނެ ކަމަށެވެ.

ހޯމަދުވަހުގެ ރޭ ސޯޝަލް ސެންޓަރުގައި ބޭއްވި ރަސްމިއްޔާތުގައި ރައީސް ވާހަކަފުޅު ދައްކަވަނީ -- 

ސަރުކާރުގެ ބޯހިޔާވަހިކަމުގެ ސިޔާސަތު ސިފަކުރައްވަމުން ރައީސުލްޖުމްހޫރިއްޔާ ވިދާޅުވީ، މިސަރުކާރުން ގޯތި ދެއްވާނީ ކަނޑަކުން ނޫން ކަމަށާ ގޯތި ދެއްވާނީ ހިކިފަސް ތަނުން ކަމަށެވެ. އެގޮތުން، މި ސަރުކާރުގެ އަމާޒަކީ ޑިސެންބަރު މަހު ހިއްކަން ފަށާ ބިންތައް އަންނަ އަހަރުގެ އޭޕްރިލް މަހުގެ ނިޔަލަށް ހިއްކާ ނިމެންވާއިރަށް ގޯތި ލިބޭ ފަރާތްތައް ކަނޑައަޅައި ނިންމުން ކަމަށެވެ.

އަދި އުންމީދަކީ ހަ މަސް ދުވަސް ތެރޭގައި މާލޭގައި ދިރިއުޅޭ ރައްޔިތުންނަށް ގޯތި ދެއްވުން ކަމުގައި އެމަނިކުފާނު ވިދާޅުވި އެވެ. އަދި ރަސްމާލެއިން 15،000 ގޯތި ފުރަތަމަ ބުރުގައި ދެއްވާނެ ކަމަށާއި، 1250 އަކަފޫޓުގެ ޖުމުލަ 25،000 ގޯތި ރަސްމާލޭން ދެއްވުމަށް ކަނޑައަޅާފައިވާ ކަމަށް ވެސް ރައީސް ވިދާޅުވި އެވެ.

ރަސްމާލެ ހިއްކުމުގެ މަަސައްކަތް ކުރަނީ --

މީގެ އިތުރުން، ބެންކް އޮފް މޯލްޑިވްސް އިން 3000 ހައުސިން ޔުނިޓުގެ މަޝްރޫއެއް ފަށާފައިވާ ކަމަށާ ބޭރުގެ އެކި ގައުމުތަކުގެ ދީލަތި އެހީގައި 4500 ހައުސިން ޔުނިޓު އެޅުމުގެ މަސައްކަތް ކުރައްވާނެ ކަމަށް ވެސް ރައީސުލްޖުމްހޫރިއްޔާގެ ވާހަކަފުޅުގައި ވިދާޅުވިއެވެ. އަދި، ރެންޓް ޓު އޯން މޮޑެލްގައި ކުރިއަށް ގެންދަވާ އިޖުތިމާއީ ބޯހިޔާވަހިކަމުގެ މަޝްރޫއުތަކުން ދެއްވާ ތިން ކޮޓަރީގެ ފުލެޓުތަކުގެ ކުލި 10،000 ރުފިޔާއަށް ވުރެ ބޮޑު ނުވާނެކަމުގެ ޔަގީންކަން ވެސް އެމަނިކުފާނު ދެއްވި އެވެ.

ސަރުކާރުގެ ބޯހިޔާވަހިކަމުގެ މަޝްރޫޢުތަކުގެ ތަފުސިލަށް ބައްލަވާލައްވަމުން ރައީސުލްޖުމްހޫރިއްޔާ ވިދާޅުވީ، މިހާރު 13 ރަށެއްގައި 825 ހައުސިން ޔުނިޓު އެޅުމަށް ސޮއިކުރެވިފައިވާނެ ކަމަށެވެ. އިތުރު މަޝްރޫއުތައް އަންނަ އަހަރުގެ ބަޖެޓުގައި ހިމަނުއްވާފައިވާނެ ކަމަށެވެ. އެގޮތުން، ބޯހިޔާވަހިކަމާ ގުޅޭ ގޮތުން އެމަނިކުފާނު ރަށްރަށުގައި ވެވަޑައިގެންފައިވާ ކޮންމެ ވައުދެއް، ކުރިއަށް އޮތް ތިން އަހަރުގެ ތެރޭގައި އަމަލީ މަސައްކަތް ނިންމައި، ރައްޔިތުންނާ ހަވާލުކޮށްދެއްވާނެ ކަމުގެ ޔަގީންކަންވެސް އެމަނިކުފާނު ދެއްވި އެވެ.

ރަސްމާލެ ހިއްކުމުގެ މަަސައްކަތް ކުރަނީ --

މާލޭގެ ބޯހިޔާވަހިކަމަށް އަލިއަޅުއްވާލައްވަމުން ރައީސުލްޖުމްހޫރިއްޔާ ވިދާޅުވީ، ފުރަތަމަ އަމާޒަކީ މި ސަރުކާރު ހަވާލުވިއިރު ފަށައި ނުނިމި ހުރި މަޝްރޫޢުތައް ނިންމައި ހަވާލުކުރުން ކަމަށާއި، އެ މަސައްކަތުގެ ތެރެއިން އެފްޑީސީގެ 4000 ފުލެޓު ލިބޭ 84 ފަރާތަކަށް ތަޅުދަނޑި ހަވާލުކޮށްފައިވާ ކަމަށެވެ. އަދި އަމާޒަކީ އަންނަ ރަމަޟާންމަހުގެ ކުރިން ހުރިހާ ފުލެޓުތަކެއް ނިންމައި ހަވާލުކުރުން ކަމުގައިވެސް އެމަނިކުފާނު ފާހަގަކުރެއްވި އެވެ.

މާލޭގެ ގޯތީގެ މައްސަލައާ ބެހޭ ގޮތުން ރައީސުލްޖުމްހޫރިއްޔާ ވިދާޅުވީ، ހުޅުމާލެއާއި ގުޅިފަޅު ފަދަ ހިއްކާފައި އޮތް ބިންތަކުން ގޯތި ދެވިއްޖެ ކަމަށާއި، ގިރާވަރުފަޅާއި ހުޅުމާލެ ފޭސް ތިނެެއް ގައި ބިން ހިއްކާ ނިމުމުން ގޯތި ދެއްވާނެ ކަމަށެވެ.