ދީނީ ހޭލުންތެރިކަން އިތުރުކުރުމާއި ދީނީ އެކި މަސައްކަތްތަކުގައި ވަރަށް އިސް ދައުރެއް އަދާކުރަމުންދާ އަލީ ރަމީޒުގެ "މަންފާ" ޖަމިއްޔާ އިން ކުޅިވަރު އެކަޑަމީއެއް ވަނީ އުފައްދާފަ އެވެ. އެކަޑަމީގެ މަގާމުތަކަށް މެންބަރުން އިންތިހާބުކޮށް އެކަޑަމީގެ މަސައްކަތް ރަސްމީކޮށް މިހާރު ވަނީ ފަށާފަ އެވެ.

އެގޮތުން އެކަޑަމީގެ ފުރަތަމަ ދަތުރު ތ. ހިރިލަންދޫއަށް ކުރަން މިހާރު ވަނީ ނިންމާފަ އެވެ. 

މަންފާ އެކަޑަމީގެ މަގްސަދަކީ ދީނީ މިންގަނޑުގެ ތެރޭގައި ރާއްޖޭގައި ކުޅިވަރު ކުރިއެރުވުމަށް މަސައްކަތް ކުރުމެވެ. އެކަޑަމީގެ ޗެއާމަން އަދި މަންފާގެ ރައީސް އަލީ ރަމީޒު ވިދާޅުވި ގޮތުގައި އެކަޑަމީ ރަޖިސްޓްރީވެ އެކަޑަމީގެ މަގާމުތަކަށް މެންބަރުން އިންތިހާބުކޮށް މަަސައްކަތް މިހާރު ވަނީ ފަށާފަ އެވެ. އަދި ހިރިލަންދޫއަށް ކުރާ ދަތުރާއެކު އެކަޑަމީގެ މަސައްކަތްތައް ކުރިއަށް އޮތްތާ ފުޅާ ދާއިރާއެއްގައި މުޅި ރާއްޖޭގައި ހިންގާނެ އެވެ.

"އަޅުގަނޑުމެންގެ މަގްސަދަކީ ދީނީ އިމުގެ ތެރޭގައި ކުޅިވަރުގެ ހުރިހާ ހަރަކާތްތަކެއްވެސް ކުރިއަށް ގެންދެވޭނެ ކަން ބުނެދިނުން. އަދި އެކަޑަމީގައި ހިމެނޭ ކުޅިވަރުގެ ދާއިރާގެ ތަޖުރިބާކާރުންގެ އެހީތެރިކަމުގައި ކުޅިވަރުގެ ހުނަރުތައް ދަސްކޮށްދިނުން," އަލީ ރަމީޒު ވިދާޅުވި އެވެ.

މަންފާ އެކަޑަމީގެ ރައީސަކީ ވޮލީ ލެޖެންޑް މުހައްމަދު ސާޖިދު (ސާޖިދު ކޯޗް) އެވެ. ނާއިބު ރައީސުންގެ ގޮތުގަައި ފުޓްބޯޅަ ކޯޗް އަލީ ނިސްތާރު (ނިސްތާރު ކޯޗް) އާއި ކުޑަކުދީންނާއި ނުކުޅެދުންތެރިކަން ހުންނަ ކުދީންގެ ހައްގުގައި ވަރަށް ބޮޑަށް މަސައްކަތް ކުރައްވާ އިބްރާހިމް ރަމީޒު (އިބޭ) އާއި ޤުރުއާންގެ އިލްމުފެތުރުގައި ރާއްޖޭގައި އެންމެ ފުޅާ ދާއިރާއެއްގައި މަސައްކަތް ކުރައްވާ މުހައްމަދު ތައުފީގް އަލީ (ތާއްޕެ ސަރ) ހިމެނެ އެވެ.

ވޮއިސްއާ ވާހަކަ ދަައްކަމުން މަންފާ އެކަޑަމީގެ ރައީސް މުހައްމަދު ސާޖިދު ވިދާޅުވީ ހިރިލަންދޫގައި ކުރިއަށް ގެންދާ ހަރަކާތަކީ އެކަޑަމީގެ ވަރަށް ގިނަ ހަަރަކާތްތައް ކުރިއަށް ގެންދާނެ ޕްރަގްރާމެއް ކަމަށެވެ. އެގޮތުން ކުޅިވަރުގެ އެކި ޕްރަގްރާމްތަކާއި އަޤީދާއާ ނަމާދު ވޯކްޝޮޕާއި ކުޑަކުދީންގެ އެކިއެކި އިވެންޓައްވެސް ހިމެނެ އެވެ.

އެ އިވެންޓްތަކާއި ގުޅޭ ތަފާތު އެކި މައުލޫމާތުތައް ދަތުރުގެ ތެރެއިން ހާމަކުރަމުން ގެންދާނެ ކަމަށް ސާޖިދު ވިދާޅުވި އެވެ.

ސާޖިދު ވިދާޅުވި ގޮތުގައި މަންފާ އެކަޑަމީގެ ހަރަކާތްތައް ބޭއްވުމުގެ ފުރުސަތު ހުރިހާ ރަށަކަށްވެސް އޮންނާނެ އެވެ. އަދި އަތޮޅުތަކަށްވެސް އެ ފުރުސަތު ފަހިކޮށްދޭނެ އެވެ. އަދި ރަށްރަށުން ބޭނުންވާނަމަ ވަކިވަކި ޕްރަގްރާމްތައްވެސް ހިންގައިދޭނެ އެވެ.

"މިސާލަކަށް ރަށަކުން ބޭނުންވެދާނެ މުޅި ޕްރަގްރާމް އެއްކޮށް ކުރިއަށް ގެންދަން. އެ ފުރުސަތު އޮންނާނެ. އަދި ވަކީން ފުޓްބޯޅަ ނުވަތަ ވޮލީ ނޫނީ ކަސްރަތު ޕްރަގްރާމެއް ކުރިއަށް ގެންދަން ބޭނުންނަމަ އެ ފުރުސަތުވެސް އޮންނާނެ. މިފަދަ ކޮންމެ ޕްރަގްރާމެއްގައި އަޅުގަނޑުމެންގެ ފަރާތުން ހިމަނާނެ އަޤީދާއާ ނަމާދު ވޯކްޝޮޕް," ސާޖިދު ވިދާޅުވި އެވެ.

ސާޖިދު ވަނީ އެކަމަށް ޝައުގުވެރިވާ ފަރާތްތަކުން މަންފާ އެކަޑަމީއަށް އެކަން ހިއްސާކުރުމަށް އެދިފަ އެވެ.

މަންފާ އެކަޑަމީގެ މެއިލް އެޑްރެސް: [email protected]

ދީނީ ހޭލުންތެރިކަމަށް ވަރަށް ފުޅާކޮށް މަސައްކަތް ކުރަމުން އަންނަ ޖަމިއްޔަތުއްސަލަފު އުފެއްދުމުގައި އިސްކޮށް އުޅުއްވި އަދި އެ ޖަމިއްޔާގެ އިސް މަގާމުތަކެއް ފުރުއްވާ ދީނީ އެތައް މަސައްކަތްތަކެއް ކުރައްވާފައިވާ އަލީ ރަމީޒުގެ "މަންފާ" ޖަމިއްޔާ އިން ވަނީ އޭނާގެ ކުރީގެ މަސައްކަތްތައް އިތުރަށް ފުޅާ ކުރައްވާފަ އެވެ.

އެ ޖަމިއްޔާ އަށް އަދި މިވީ އަށެއްކަ މަސް ދުވަހެވެ. ނަމަވެސް މިހާ ކުރު މުއްދަތެއްގެ ތެރޭގައި މަންފާ ވެފައިވަނީ ރާއްޖޭގެ ދައުވަތުގެ މައިދާނުގެ އެއްވަނަ އަށެވެ. ވަރަށް ގިނަ ރަށްރަށަށް ދަތުރުކޮށް ތަފާތު ޕްރަގްރާމްތައް ދަނީ ހިންގަމުންނެވެ. އެ ޕްރަގްރާމްތަކަށް ހުރިހާ ރަށަކުން ވެސް ބޮޑު ތަރުހީބެއް ލިބެމުން ދެ އެވެ.

އަދި ވަރަށް ގިނަ ރަށްރަށުން މަންފާއަށް ވަނީ ރިކްއެެސްްޓްތައް ލިބިފަ އެވެ. އަންނަ އަހަރުގެ ފެށުމާއި ހަމައަށްވެސް މިހާރު އޮތީ ފުލްކޮށެވެ.

ދިވެހީންގެ ވަރަށް ލޯބްތަކާއި އިހްތިރާމެއް އޮތް އަލީ ރަމީޒު ގެންދަނީ ދައުވަތުގެ މައިދާނުގައި ވަަރަށް މުހިންމު ދައުރެއް އަދާ ކުރަމުންނެވެ. އެ މަސައްކަތަށް ވިހި އަހަރަށް ވުރެ ގިނަ ދުވަސްވީ އެވެ.