ޓްރޭޑްމާކު ބިލް ގާނޫނަކަށް ވުމާއެކު، ޕޭޓަންޓާއިބެހޭ ބިލެއް އެކުލަވައިލުމުގެ މަސައްކަތް ފަށާފައިވާ ކަމަށް ސަރުކާރުން ހާމަކޮށްފި އެވެ.
އެ ނިންމުން ހާމަކުރައްވާ އިކޮނޮމިކް މިނިސްޓަރު މުހައްމަދު ސަޢީދު މިރޭ ވިދާޅުވީ ޓްރޭޑްމާކު ބިލް ގާނޫނަކަށް ވުމާއެކު، ޕޭޓަންޓާއިބެހޭ ބިލެއް އެކުލަވައިލުމުގެ މަސައްކަތް ވާލްޑް އިންޓަލެކްޓުއަލް ޕްރޮޕަޓީގެ އެކްސްޕާޓުންގެ އެހީގައި ކުރަމުންދާ ކަމަށެވެ.
"..އިރާދަކުރެއްވިއްޔާ، 2026 ގައި، ރާއްޖޭގައި މުޅީން އަލަށް އިންޓަލެކްޓުއަލް ޕްރޮޕަޓީއޮފީހެއް [ފިކުރީ މުދަލުގެ ހައްގުތައް ރައްކާތެރިކޮށްދޭ އޮފީހެއް] އުފެއްދޭނެ," ސައީދު ވިދާޅުވި އެވެ.
މިނިސްޓަރު ވިދާޅުވި ގޮތުގައި ކޮޕީރައިޓް ގާނޫނަށް ސަރުކާރުން ވާނީ ޒަމާނާ ގުޅޭ އަދި އުފެއްދުންތެރީންނާއި ފަންނުވެރީންގެ ބުރަ މަސައްކަތާއި ހައްގުތައް ހިމާޔަތްކޮށްދޭނެ ބޮޑެތި އިސްލާހުތަކެއް ގެނެސްފަ އެވެ. އަދި ވިދާޅުވީ ބާން ކޮންވެންޝަނުގައި ވެސް މިހާރު ދިވެހިރާއްޖެ އިން ބައިވެރިވެފައިވާ ކަމަށެވެ.
"މިއީ ކުޑަދުވަސްކޮޅެއްގެ ތެރޭގައި ކުރެވުނު މުހިއްމު ގިނަ މަސައްކަތްތަކެއް. ރައީސުލްޖުމްހޫރިއްޔާ ކަމުގެ ޒިއްމާ އާއި ރައީސް ޑރ. މުޢިއްޒު ހަވާލުވެވަޑައިގަތީ ކްރިއޭޓިވް އިންޑަސްޓްރީއެއް ރާއްޖޭގައި ގާއިމުކޮށްދެއްވާ، އެ އިންޑަސްޓްރީ ކުރިއަށް ގެންގޮސްދެއްވާނެކަމުގެ މުހިއްމު ވަޢުދުފުޅާއިއެކު," މިނިސްޓަރު ވިދާޅުވި އެވެ.
އަދި ވިދާޅުވީ މިއަދު ފެންނަމުން މިދަނީ އެ ވައުދުފުޅު ފުއްދެވުމުގައި އަމަލީގޮތުން ނަތީޖާ ނެރެދެއްވައި، ހަލުވިކަމާއެކު ހަރުފަތަކަށްފަހު ހަރުފަތެއް ކުރިއަށް ވަޑައިގަންނަވާ އުފާވެރި އަދި އުންމީދީ މަންޒަރު ކަމަށެވެ.
Advertisement
This content is created and paid for by advertisers and does not involve Voice Journalists
