އެއާ އެމްބިއުލާންސްގެ ހަރަދުތަކަށް ދައުލަތުގެ ބައިތުލްމާލުން ކުރި ހޭދަ ރެކޯޑް މިންވަރަކަށް އިތުރުވެއްޖެއެވެ.

އެންސްޕާއިން އާއްމުކުރި ތަފާސްހިސާބުތަކަށް ބަލާއިރު، އަހަރުގެ މިހާތަނަށް އާސަންދަ މެދުވެރިކޮށް އެއ އެމްބިއުލާންސްގެ ހިދުމަތަށް މާލީ އެހީގެ ގޮތުގައި ވަނީ 85.1 މިލިއަން ރުފިޔާ ހަރަދުކޮށްފައެވެ. މިއީ މިދިޔަ އަހަރާ އަޅާބަލާއިރު 46 މިލިއަން ރުފިޔާގެ އިތުރުވުމެކެވެ. 

އާސަންދަ ސްކީމް މެދުވެރިކޮށް އެއާ އެމްބިއުލާންސްގެ ހިދުމަތްތައް ދިނުމަށް އެއްބަސްވުމުގައި ސޮއިކޮށްފައިވަނީ މިދިޔަ އަހަރުގެ ފެބުރުއަރީމަހުގެ 28 ވަނަ ދުވަހެވެ. އޭގެ ފަހުން ހިދުމަތް ފަށާފައިވަނީ މާޗްމަހުގެ 1 ވަނަ ދުވަހުން ފެށިގެންނެވެ. 

އެއާ އެމްބިއުލާންސްގެ ހިދުމަތް ފަށާފައިވަނީ މެޑިކަލް އިމަރޖެންސީގެ ޙާލަތްތަކުގައި، އެންމެ ކައިރި ޓާރޝަރީ ހޮސްޕިޓަލަކަށް ބަލިމީހުން އުފުލާގޮތަށެވެ. އެއާ އެމްބިއުލާންސް ހިދުމަތްދިނުމަށް މަތިންދާބޯޓު ފަރުމާކޮށްފައިވަނީ ޞިއްޙީ ފަރުވާ ދެވޭގޮތަށް ވަސީލަތްތަކާއިއެކުގައެވެ. މި ހިދުމަތަށް 15 މުއައްޒަފަކު ވަނީ ތަމްރީނުކޮށްފައެވެ. އެއަރއެމްބިއުލާންސްގެ ހިދުމަތުގައި މިހާރު ބޭނުންކުރަމުން އަންނަނީ، ޑޭޝް DHC-8-200 މަރުކާގެ ބޯޓެކެވެ. މި ހިދުމަތް 24 ގަޑިއިރު ލިބޭކަން ފާހަގަކޮށްލެވެއެވެ.

ސަރުކާރުން ދަނީ ތައިލެންޑް އަދި ދުބާއީއަށް އެއާ އެމްބިއުލާންސްގެ ހިދުމަތް ފެށުމަށް ތައްޔާރުވަމުންނެވެ. އެގޮތުން އެ ހިދުމަތް ފެށުމަށް ވަނީ ގަައުމީ އެއާލައިން -- މޯލްޑިވިއަންއާ މިމަހުގެ 16 ވަނަ ދުވަހު ހަވާލުކޮށްފައެވެ. ރާއްޖޭގައި އެއާ އެމްބިއުލާންސްގެ ޚިދުމަތް ފެށުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ