ތިލަފުށީ ރީޖަނަލް ވޭސްޓް މެނޭޖްމަންޓް ފެސިލިޓީއަށް ގެންނަ ކުނި ވަކިކޮށްފައި ނުވާނަމަ، އެ ކުނި ބަލައިނުގަނެވޭނެ ކަމަށް މާލޭ ސަރަޙައްދުގެ ކުނި މެނޭޖްކުރުމުގެ ޒިންމާ އަދާކުރާ ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ބުނެފިއެވެ.
ވެމްކޯއިން ނެރުނު އިޢުލާނެއްގައި ބުނެފައިވަނީ، މުޅި ރާއްޖޭގައި ދުވާލެއްގެ މައްޗަށް އުފެދޭ ކުނީގެ 60 އިންސައްތަ އަކީ ތިލަފުށީ ފެސިލިޓީއަށް ގެނެވޭ ކުނި ކަމަށެވެ. ނަމަވެސް، ކަނޑައެޅިފައިވާ އުސޫލުތަކާ އެއްގޮތަށް ކުނި ވަކިކުރުމުގެ ބަދަލުގައި، ގިނަ ކަސްޓަމަރުން އަދިވެސް ކުނި ގެންނަނީ ވަރަށް ބޮޑަށް އެއްކޮށްގެންކަން އެ ކޯޕަރޭޝަނުން ފާހަގަކުރެއެވެ.
މިގޮތަށް ކުނި އެއްކޮށްގެން ގެނައުމުގެ ސަބަބުން، ރައްކާތެރި ގޮތުގައި ކުނި މެނޭޖްކުރުމަށް ބޮޑެތި ގޮންޖެހުންތަކެއް ކުރިމަތިވާ ކަމަށް ވެމްކޯއިން ބުނެއެވެ. ވަކިން ޚާއްޞަކޮށް، ދާދިފަހުން ތިލަފުށީގައި ހިނގި އަލިފާނުގެ ހާދިސާ މެދުވެރިވި އެންމެ ބޮޑު އެއް ސަބަބަކީވެސް ކުނި ވަކިނުކޮށް އެއްކޮށްފައި ހުރުން ކަމަށް އެ ކޯޕަރޭޝަނުން މައުލޫމާތުދެއެވެ.
ތިލަފުށީ ފެސިލިޓީއަށް ކުނި ގެންނަން ޖެހެނީ މައިގަނޑު ތިން ބަޔަކަށް ވަކިކޮށްގެންނެވެ. އެއީ:
ގާކުނި
ބޮޑެތި ކުނި
އެހެނިހެން ކުނި
ވެމްކޯއިން ބުނީ، ޚާއްޞަކޮށް ގާކުނި ހުންނަންވާނީ އެހެނިހެން ކުންޏާ އެއްނުވާނޭހެން ވަކިކުރެވިފައި ކަމަށެވެ. މިއީ ދެމެހެއްޓެނިވި ގޮތެއްގައި ކުނި މެނޭޖްކުރުމަށާއި، ކޯޕަރޭޝަންގެ މުވައްޒަފުންނާއި މުދަލުގެ ސަލާމަތްތެރިކަން ކަށަވަރުކުރުމަށް ކޮންމެހެން މުހިންމު ކަމެއް ކަމަށްވެސް ބުނެފައިވެއެވެ.
މީގެ އިތުރުން، އުސޫލާ ޚިލާފަށް ކުނި ގެންނަ ފަރާތްތަކަށް ޚިދުމަތް ފޯރުކޮށްނުދޭނެ ކަމަށާއި، ކުނި ވަކިކޮށް އިސްލާހުކުރުމަށް އަނބުރާ ފޮނުވާލެވޭ އުޅަނދުފަހަރުގެ މަޢުލޫމާތު ކަމާބެހޭ ފަރާތްތަކާ ހިއްސާކުރާނެ ކަމަށްވެސް ވެމްކޯއިން ވަނީ ބުނެފައިވެއެވެ.
ކުނި އުފުލާ އުޅަނދުފަހަރުގައި ކުނި ލޯޑުކުރަންވާނީ، އުޅަނދު ހުސްކުރާއިރު ކުނި ވަކިކުރެވޭ ގޮތަށް ކަމަށްވެސް އެ ކޯޕަރޭޝަނުން އިރުޝާދު ދެއެވެ. މިކަމާ ގުޅޭ އިތުރު މަޢުލޫމާތު ބޭނުންވާ ފަރާތްތަކުން ވެމްކޯގެ ހޮޓްލައިން 1666 އަށް ގުޅުމަށް އެދިފައިވެއެވެ.
Advertisement
This content is created and paid for by advertisers and does not involve Voice Journalists
