ހިޔާ ޓަވަރުތަކުގައި ހިމެނޭ އެޕާޓްމަންޓްތަކުގެ އެއްބަސްވުމުގެ އިސްލާހު އަދި އަގަށް އައި ބަދަލު "މައި ހުޅުމާލެ ޕޯޓަލް" އިން މިހާރު ފެންނާނޭކަމަށް އެޗްޑީސީން ބުނެފިއެވެ.
އެޗްޑީސީން މިއަދު ބުނީ ހިޔާގެ ކުއްޔަށް ސަރުކާރުން ދިން ލުއިތަކާ ގުޅިގެން ފުރިހަމަ ކުރަންޖެހޭ ލިޔެކިޔުންތައް ފުރިހަމަ ކުރުމަށް، ހިޔާ ފުލެޓުތަކުގެ އެއްބަސްވުމުގެ އިސްލާހު އަދި ފުލެޓުތަކުގެ އަގަށް އައިސްފައިވާ ބަދަލުތައް "މައި ހުޅުމާލެ ޕޯޓަލް" އިން މިހާރު ފެންނަން ހުންނާނޭ ކަމަށެވެ. މިއީ ހިޔާ ފުލެޓު ލިބިފައިވާ ފަރާތްތަކަށް ސަރުކާރުން ދިން ލުއިތައް ރަސްމީކުރުމަށް ކުރެވުނު މުހިންމު މަސައްކަތެއްކަމަށް އެޗްޑީސީން ފާހަގަކުރިއެވެ.
އެޗްޑީސީން ބުނީ ހިޔާ ފުލެޓުގެ އެއްބަސްވުމުގައި ސޮއިކުރައްވާފައިވާ ފަރާތްތަކަށް މިހާރު މައި ހުޅުމާލެ ޕޯޓަލް ލިންކު މެދުވެރިކޮށް، އެއްބަސްވުމުގެ އިސްލާހުތަކާއި އަގަށް އައިސްފައިވާ ބަދަލުތައް ބަލާ، ފުރިހަމަ ކުރަންޖެހޭ ލިޔެކިޔުންތައް ފުރިހަމަ ކުރެވޭނޭކަމަށެވެ. މިކަމުގެ ސަބަބުން ފުލެޓުތަކުގެ ވެރިފަރާތްކަމުގެ ލިޔެކިޔުންތައް އަވަސްކުރުމަށް މަގުފަހިވެގެންދާނޭކަމަށް އެޗްޑީސީން ބުންޏެވެ.
ހިޔާ ފުލެޓުތަކުގެ އެއްބަސްވުމަށް ގެނެވުނު އިސްލާހުތަކާއި އަގަށް އައި ބަދަލުތަކުގެ ސަބަބުން، ފުލެޓު ލިބިފައިވާ ގިނަ ފަރާތްތަކަށް މާލީ ގޮތުން ލުއިތަކެއް ލިބިގެންދާނޭކަމަށްވެސް އެޗްޑީސީން ބުނެއެވެ.
ސަރުކާރުން ވަނީ 2023 ވަނަ އަހަރުގެ ޑިސެމްބަރުމަހު، 7 އަހަރަށް ހިޔާގެ ކުލި 3900 ރުފިޔާއަށް ކުޑަކޮށްފައެވެ. މެއިންޓަނަންސް ފީއާއެކު ހިޔާގެ އެޕާޓްމަންޓް ތަކަށް މިހާރު ދައްކަންޖެހެނީ މަހަކު 4900 ރުފިޔާއެވެ.
Advertisement
This content is created and paid for by advertisers and does not involve Voice Journalists
