ނަފްސާނީ ބަލިމަޑުކަމަކީ މިހާރު އިސްރާއީލަށް ކުރިމަތިވެފައި އޮތް ޤައުމީ މައްސަލައެއްކަމަށް އެޤައުމުގެ ޑިފެންސް މިނިސްޓްރީގެ ޑިރެކްޓަރ އޮފް ނިއުރޯޓެކްނޮލޮޖީ ޑިވިޝަނުގެ ޑިރެކްޓަރ ޑރ.އަލޯނާ ބާނޭއާ ވިދާޅުވެއްޖެއެވެ.

ތެލް އަވީވްގައި ކުރިއަށްދިޔަ އިންޓަރނޭޝަނަލް ޑިފެންސް ސަމިޓްގައި ވާހަކަ ދައްކަމުން އަލޯނާ ވިދާޅުވީ، އިސްރާއީލަށް މިހާރު ކުރިމަތިވެފައި އޮތް އެންމެ ބޮޑު މައްސަލައަކީ ނަފްސާނީ ދުލަހެޔޮކަމުގެ މައްސަލަކަމަށެވެ. ޤައުމެއްގެ ގޮތުގައި ކުރިއަރައިގެންދާން ބަލާއިރު އިސްރާއީލް މިވަގުތު އޮތީ ނަފްސާނީގޮތުން ވަރަށްބޮޑެތި މައްސަލަތަކެއްގެ ތެރޭގައިކަން އޭނާ ފާހަގަކުރެއްވިއެވެ.

ހާއްސަ ގޮތެއްގައި އިސްރާއީލް ސިފައިންގެ މެދުގައި ނަފްސާނީ މައްސަލަތައް މިއިން ޒަމާނަކު ނުފެންނަވަރަށް އެކަން އެބައޮތްކަމަަށް އޭނާ ފާހަގަކުރެއްވިއެވެ. އަލޯނާ ވިދާޅުވީ 2023 ވަނަ އަހަރުގެ އޮކްޓޯބަރުމަހުގެ 7 ވަނަ ދުވަހަށްފަހު އިސްރާއީލް ސިފައިންގެ ތެރޭގައި ނަފްސާނީ މައްސަލަތައް ކަންބޮޑުވާވަރަށް އިތުރުވުމުގެ ނަތީޖާއަކީ ހިނގަންނުޖެހޭ ނޭދެވޭ ކަންކަން ނިހާޔަތަށް އިތުރުވެގެން ދިއުންކަމަށެވެ.

އޭނާ ވިދާޅުވީ ޒަމާނީ އައު ހޯދުންތަކުގެ އެހީގައި ނަފްސާނީ މައްސަލައަށް ހައްލު ހޯދުމުގެ މަސައްކަތް ފަށާފައިވާކަމަށާއި، މިހާރުވެސް މިކަމަށް ހައްސަ އާލާތްތައް އީޖާދުކޮށްފައިވާކަމަށެވެ. މިގޮތުން އޭއައިގެ އެހީގައި ތެރަޕިކް ފަރުވާތައް ދިނުމުގައި ފުން ހޯދުންތައް ހޯދުމުގައި ބޭނުންކުރަމުން އަންނަ ޑިވައިސްތައް މިހާރުވެސް ބޭނުންކުރަމުން އަންނަކަން އޭނާ ފާހަގަކުރިއެވެ.

އިސްރާއީލުން ވަނީ ޑިފެންސް ދާއިރާއަށް އެހީތެރިވާ ކުންފުނިތަކަށް ފަންޑުކުރުމަށް ވޭތުވެދިޔަ އަހަރު އެކަނިވެސް އެއް ބިލިއަނަށްވުރެ ގިނަ ޑޮލަރު ހޭދަކޮށްފައެވެ.

ޑރ. އަލޯނާ ފާހަގަކުރެއްވި އޮކްޓޯބަރުމަހުގެ 7 ވަނަ ދުވަހަކީ ފަލަސްތީނުގެ މިނިވަންކަމުގެ ދިފާއުގައި މަސައްކަތްކުރާ ޖަމާއަތަކުން އިސްރާއީލާ ދެކޮޅަށް މި ފަހުގެ ތާރީހެއްގައި ކުއްލިއަކަށް އެންމެ ވަރުގަދަ ހަމަލާތަކެއްދިން ދުވަހެވެ. ރައްދުގައި އިސްރާއީލުން ވަނީ ފަލަސްތީނުގެ ޢައްޒާއަށް އަރައި ގަތުލު އާއްމުތައް ހިންގައި މުޅި ޣައްޒާއަށް އެއްގަމު މަގުންނާއި ވައިގެ މަގުން ހަމަލާތައްދީ މުޅި ޣައްޒާސިޓީގެ ކުރިއެރުން 20 އަހަރު ފަހަތަށް ޖައްސާލާފައެވެ. އިސްރާއީލުން ޣައްޒާއަށް ދިން މި ހަމަލާތަކަކީ މި ފަހުގެ ތާރީހުގައިވެސް އިންސާނިއްޔަތާ ދެކޮޅަށް ހިންގި އެންމެ ވަރުގަދަ ހަނގުރާމައިގެ ޖަރީމާތައްކަމަށް ބައިނަލްއަޤްވާމީ ޖަމާއަތްތަކުންނާއި އދ އިން ވެސް ވަނީ ބުނެފައެވެ.