ކޮވިޑް-19 ވެކްސިންތަކާ ގުޅިގެން އެކި އުމުރުފުރާގެ މީހުން މަރުވިކަމަށް ބެލެވޭ މައްސަލަތަކެއް ފެންމަތިވެފައިވާތީ، އެ ވެކްސިނުގެ ރައްކާތެރިކަމާގުޅޭ ދިރާސާއެއްގެ ތަހުގީގުތަކެއް އެމެރިކާގެ އެފް.ޑީ.އޭ އިން ފަށައިފިއެވެ.

އެމެރިކާގެ ޑިޕާޓްމަންޓް އޮފް ހެލްތު އެންޑް ހިޔުމަން ސާވިސަސް (އެޗް.އެޗް.އެސް) އިއްޔެ މިކަން އިއުލާންކޮށްފައި ވީނަމަވެސް، މި ތަހުގީގުގައި ހިމެނޭނެ އުމުރުފުރާތަކާ ބެހޭގޮތުން އަދި އެއްވެސް ތަފްސީލެއް ދީފައެއް ނުވެއެވެ. ނަމަވެސް، އެފް.ޑީ.އޭގެ ކޮމިޝަނަރު މާޓީ މަކަރީ މީގެ ކުރިން ވަނީ، ޒުވާނުންގެ ތެރެއިން މިފަދަ މަރުތައް ހިނގާފައިވޭތޯ ބަލަމުންދާ ކަމަށް ބުނެފައެވެ.

މިދިޔަ މަހު، އެފް.ޑީ.އޭގެ ޗީފް މެޑިކަލް އެންޑް ސައިންޓިފިކް އޮފިސަރު ވިންތޭ ޕްރަސާދު ވަނީ އެ އޭޖެންސީގެ މުވައްޒަފުންނަށް ފޮނުއްވި މެމޯއެއްގައި، ކޮވިޑް ވެކްސިންތަކުގެ ސަބަބުން މަދުވެގެން 10 ކުދިންގެ ހިތް ދުޅަވެގެން މަރުވެފައިވާކަމަށް ބުނެފައެވެ. އަދި ވެކްސިންގެ ކަންކަން ބެލެހެއްޓުން ހަރުދަނާކުރުމަށް ރާވާފައިވާ ކަމަށްވެސް އެ މެމޯގައި ހާމަކޮށްފައިވެއެވެ.

ކަންމިހެން ހުރި ނަމަވެސް، މޯޑާނާ ކުންފުނިން ވަނީ އެ ކުންފުނީގެ އެމް.އާރް.އެން.އޭ ވެކްސިން، ސްޕައިކްވެކްސް (Spikevax) އާ ގުޅިގެން ކުޑަކުދިންނަށް ނުވަތަ މާބަނޑު އަންހެނުންނަށް އެއްވެސް ނުރައްކަލެއް ނުވަތަ ކަންބޮޑުވުމެއް ނެތްކަމަށް ބުނެފައެވެ.

ހަމަ އެހެންމެ، ވެކްސިން އުފައްދާ ފައިޒަރ ކުންފުނިން ވަނީ އެ ކުންފުނިން އުފައްދާ ވެކްސިންގެ ރައްކާތެރިކަމުގެ ޔަގީންކަންދީފައެވެ.

ކަންމިހެން ހުރި ނަމަވެސް، އެމެރިކާގެ ސިއްހަތާ ބެހޭ ސެކްރެޓަރީ ރޮބަޓް އެފް ކެނެޑީ ޖޫނިއަރ ވަނީ ކޮވިޑް ވެކްސިންތަކާ ބެހޭ ސަރުކާރުގެ ސިޔާސަތަށް ބޮޑެތި ބަދަލުތަކެއް ގެނެސްފައެވެ.

އޭގެ ތެރޭގައި 65 އަހަރުން މަތީގެ މީހުންނާއި، ބޮޑެތި ބަލިތައް ހުންނަ މީހުންނަށް ވެކްސިންދޭ މިންވަރު ލިމިޓްކުރުން ހިމެނެއެވެ.

ވެކްސިންތަކާމެދު އަބަދުވެސް ޝައްކުތައް އުފައްދަމުން އައި ކެނެޑީ ވަނީ އެމެރިކާގެ ވެކްސިން ސިޔާސަތަށް ދުރު ރާސްތާގެ ބޮޑެތި ބަދަލުތަކެއް ގެނެސްފައެވެ.

މިގޮތުން، ޅަދަރިފުޅަށް ދެވޭ ހެޕަޓައިޓިސް ބީ ވެކްސިންގެ ފުރަތަމަ ޑޯޒް ދިނުމަށް ދެމުން އައި ލަފާ އުވާލައި، އެމް.އާރް.އެން.އޭ ވެކްސިންތަކަށް ކުރަމުން އައި ޚަރަދު ކުޑަކޮށް، އަދި ވެކްސިންތަކާއި އޮޓިޒަމާވެސް އޭނާ ވަނީ ގުޅުވައިފައެވެ.