ދިވެހި ސިނަމާއިން މިއަހަރު ފެނުނު އެންމެ ރީތި ފިލްމަކީ ކޮބައިހޭ އަހައިފިނަމަ, ހަމަ ޔަގީނުންވެސް ގިނަ ބައެއްގެ ޖަވާބަކަށްވާނީ އޮލިމްޕަހުގައި މިހާރު ދައްކަމުންދާ ޑާކްރެއިނުގެ އަލްވަދާޢު އެވެ. އެކަން އެނގެނީ މި ފިލްމާ ބެހޭގޮތުން ސޯޝަލް މީޑިއާގައި ގިނަބަޔަކު ފާޅުކުރަމުންދާ ހިޔާލް ތަކުންނެވެ. ހާއްސަ ގޮތެއްގައި މި ފިލްމުގެ ވާހަކަ، ފިލްމެއްގެ ގޮތުގައި ގެނެސްދީފައިވާލެއް ފުރިހަމަކަން ގިނަ ބަޔަކު ވަނީ ފާހަގަކޮށްފައެވެ. "އަލްވަދާއު" މި ފިލްމުގެ ސްކްރީން ޕްލޭ ގެނެސްދީފައިވަނީ ޝަހުދާ މަހްމޫދެވެ.

އަލްވަދާއު އަކީ ލޯބީގެ އަސަރުގަދަ ވާހަކައެއްގެ މައްޗަށް ބިނާކޮށް ތަފާތު ހާދިސާތަކެއް ފެނިގެންދާ ފިލްމެކެވެ. ބެލުންތެރިން މި ފިލްމް ބަލާފައި އެންމެބޮޑަށް ފާހަގަކޮށްފައިވަނީ ސްޓާރުންގެ ފަރާތުން ފެނިގެންދިޔަ އެކްޓެވެ. ފިލްމުގައި ވަކި ހިސާބަކުން މަރިޔަމް މަޖުދާ، މަޖޫ ފެނިގެންދަނީ ހާއްސައެހީއަށް ބޭނުންވާ މީހެއްގެ ރޯލެވެ. ލީޑް އެކްޓަރު ޝަރަފް ޢަބްދުﷲ ގެ ފަރާތުން ފެނިގެންގޮސްފައިވަނީ މީގެ ކުރިން އޭނާގެ ފަރާތުން ފެނިގެންނުދާވަރުގެ މޮޅު އެކްޓިންނެކެވެ. މި ދެ އެކްޓަރުންގެ އިތުރުން ޝީލާ ނަޖީބް، އަދި ސަޕޯޓިން ރޯލްތަކުން ފެނިގެންދިޔަ އެކްޓަރުންގެ ފަރާތުން ފެނިގެންދިޔަ އެކްޓިންވެސް އެހާމެ ފުރިހަމަ ކަމަށް އަލްވަދާއު ބެލި ގިނަ މީހުން ވަނީ ފާހަގަކޮށްފައެވެ.

މި ފިލްމުގައި ފެނިގެންދިޔަ އެންމެ ފުރިހަމަ މަންޒަރެއްގެ ގޮތުގައި ގިނަބަޔަކު ފާހަގަކޮށްފައިވަނީ އެކްސިޑެންޓްގެ މަންޒަރެވެ. ގިނަ ބަޔަކު ބުނެފައިވަނީ މިއީ ދިވެހި ފިލްމަކުން މިހާތަނަށް ފެނިގެންދިޔަ މިފަދަ އެންމެ ފުރިހަމަ މަންޒަރުކަމަށެވެ. މި މަންޒަރުން ޑާކްރެއިނުން ފިލްމު ބެލުންތެރިންނާ ހަމަޔަށް ގެނެސްދިނުމަށް ކޮށްފައިވާ މަސައްކަތްތައް ކިތަންމެހާވެސް ފުރިހަމަކަމަށް ގިނަބަޔަކު ދަނީ ފާަހަގަކުރަމުންނެވެ. 

 ޑާކްރެއިނުން ފިލްމްގެ ޝޯތައް ދެއްކުމަށް ނިންމާފައިވަނީ ޑިސެމްބަރުމަހުގެ 20 ވަނަ ދުވަހުގެ ނިޔަލާ ހަމައަށެވެ. އަލްވަދާޢުގެ ޓިކެޓް ގަތުމަށް ބޭނުންނަމަ 9911229 ނަމްބަރަށް ވައިބަރ ކުރުމުން އޮލިމްޕަހަށް ނުގޮސް ޓިކެޓް ގަނެވޭނޭ އިންތިޒާމް ވަނީ ހަމަޖައްސާފައެވެ.