އޮސްޓްރޭލިއާގެ ބޮންޑައި ބީޗްގައި މިއަދު ދިން ބަޑީގެ ހަމަލާ ހުއްޓުވާލި ހީރޯއަކީ މުސްލިމެއްކަމަށް އެޤައުމުގެ މީޑިއާތަކުން ރިޕޯޓްކޮށްފިއެވެ.
ބޮންޑައި ބީޗްގައި މިއަދު ބަޑިހިފައިގެން ތިބި ބަޔަކު ވަނީ އެތަނުގައި ތިބި ބަޔަކަށް ބަޑިން ހަމަލާދީ އެތައްބަޔަކު މަރާލާފައެވެ. މި ހަމަލާތަކުގައި 12 މީހަކު މަރުވެފައިވާަކަމަށް ނިއުސައުތު ވޭލްސްގެ ފުލުހުން ވަނީ ބުނެފައެވެ. އަދި އެތައް ބަޔަކު ވަނީ ޒަހަމްވެފައެވެ.
ފުލުހުން ބުނެފައިވަނީ ހަމަލާދިން މީހުން އެމީހުންގެ ހަމަލާތައް އަމާޒުކޮށްފައިވަނީ އެވަގުތު ބީޗްގައި ތިބި ޔަހޫދީންނަށެވެ. އެމީހުން ހަމަލާތައް ދިނީ އެކި ތަންތަނުގައި ތިބެގެންނެވެ.
ސޯޝަލް މީޑިއާގައި މި ހަމަލާގެ ވީޑިއޯތައް ދައުރުވަމުންދާއިރު، އެންމެބޮޑަށް ވައިރަލް ވެފައިވަނީ ބަޑިހިފައިގެން ހަމަލާދެމުންދިޔަ މީހަކު ހުއްޓުވުމަށް އާދައިގެ ހެދުމެއްގައި ހުރި މީހަކު ހަރަކާތްތެރިވި ވީޑިއޯއެކެވެ. އޮސްޓްރޭލިއާގެ ދަ ސިޑްނީ މޯނިން ނޫހުން ބުނެފައިވަނީ މި ހާދިސާގައި ހީރޯއެއްގެ ގޮތުގައި ފާހަގަކުރެވުނު އެމީހަކީ އަރަބި މުސްލިމެއްކަމަށްވާ އަހުމަދު އަލް އަހުމަދެވެ.
ބަޑިހިފައިގެން މީހުންގެ ތެރެއަށް ޖަހަމުންދަނިކޮށް އަހުމަދު އެމީހާގެ އަތުން ބަޑިއަތުލާފައިވަނީ ފަހަތުންގޮސް ވަރަށް ހުށިޔާރުކަމާއެކުގައެވެ. އެމީހާއަތުން ބަޑިއަތުލުމާއެކު އެވަގުތު އެހެން މީހަކު ވަނީ އަހުމަދަށް ބަޑިން ހަމަލާދީފައެވެ. މި ހަމަލާގައި އަހުމަދަށް ޒަހަމްތަކެއް ލިބުނުނަމަވެސް އޭނާ ވަނީ ބަޑިޖަހަން އުޅުނު މީހާގެ މަސައްކަތް ނާކާމިޔާބުކޮށްލާފައެވެ.
ބަޑިން ހަމަލާތައް ދެމުންދިޔަ މީހުންގެ އެ އަމަލު އެހާއަވަހަށް ހުއްޓި ތަނުގެ ކޮންޓްރޯލް ފުލުހުން ނެގީ އަހުމަދުގެ ޖެހިލުންކުޑަކަމުންކަމަށް އޮސްޓްރޭލިއާގެ މީޑިއާތަކުން ވަނީ ފާހަގަކޮށްފައެވެ. ސޯޝަލް މީޑިއާގައި މީހުންތައް ދަނީ އަހުމަދުގެ ކެރުމަށް ވަރަށްބޮޑަށް ތައުރީފްކުރަމުންނެވެ. އެގޮތުން ބަޑިހިފައިގެން ތިބި މީހުން ދެމުންދިޔަ ހަމަލާތައް ހުއްޓުނީ އޭނާގެ ހިތްވަރުގަދަ އަމަލުގެ ސަބަބުންކަމަށް ބައެއް މީހުން ވަނީ ބުނެފައެވެ.
މި ހާދިސާގައި އަހުމަދަށް ލިބުނު އަނިޔާތަނަށް ހޮސްޕިޓަލުން ފަރުވާ ހޯދާފައިވާކަމަށް މީޑިއާތަކުން ވަނީ ބުނެފައެވެ. އަހުމަދަކީ ސިޑްނީގެ މޭވާ ވިއްކާ ފިހާރައެއް ހިންގާ މީހެކެވެ.
އޮސްޓްރޭލިއާގެ ނިއު ސައުތު ވޭލްސްގެ ފުލުހުން މައްސަލަ ތަހުގީގުކުރަމުންދާއިރު، ފުލުހުން ބުނީ އަދި މިހާތަނަށް ބަޑިން ހަމަލާދިންކަމަށް ފާހަގަކުރެވުނީ ދެމީހުން ކަމަށެވެ. އަލްޖަޒީރާއިން ބުނެފައިވަނީ މި ހަމަލާދިން ދެމީހުންގެ ތެރެއިން އެކަކު މަރުވިއިރު އަނެއް މީހާއޮތީ ވަރަށް ސީރިއަސް ހާލަތެއްގައިކަމަށެވެ.
އޮސްޓްރޭލިއާ ސަރުކާރުން މި ހަމަލާ ސިފަކޮށްފައިވަނީ ޓެރަރިސްޓް ހަމަލާއެއްގެ ގޮތުގައެވެ.
Advertisement
This content is created and paid for by advertisers and does not involve Voice Journalists
