ޤަވާއިދާ ހިލާފަށް ރާއްޖޭގެ ކަނޑުގެ ސަރަހައްދުގައި ހަރަކާތެރިވަމުންދިޔަ ދެ މަސްބޯޓެއް ކޯސްޓްގާޑުން އަތުލައިގަނެފިއެވެ.

މޯލްޑިވްސް ނެޝަނަލް ޑިފެންސް ފޯސް، އެމްއެންޑީއެފުން ބުނީ އަތުލައިގަނެފައިވަނީ އަވައްޓެރި ސްރީލަންކާއަށް ނިސްބަތްވާ ދެ ބޯޓު ކަމަށެވެ. 

މި ބޯޓުތައް ހިފަހައްޓާފައި ވަނީ، ސަރަހައްދީ ގައުމުތަކުން ހިއްސާކުރި މައުލޫމާތުގެ ޒަރިއްޔާއިން، އެއްކުރި މައުލޫމާތުގެ އަލީގައި އެމްއެންޑީއެފް ކޯސްޓްގާޑާއި، އެމްއެންޑީއެފް އެއަރ ކޯރއިން ހިންގި ސަރވެއިލަންސް އޮޕަރޭޝަނެއްގެ ތެރެއިންކަމަށް އެމްއެންޑީއެފުން ބުންޏެވެ.

ސްރީލަންކާއަށް ނިސްބަތްވާ މި ބޯޓުތައް އެމްއެންޑީއެފް ކޯސްޓްގާޑުގެ ބެލުމުގެ ދަށަށް ގެނެސްފައި ވަނީ ޑިސެންބަރު 17ވަނަ ދުވަހުގެ ހެނދުނު 08:30 ހާއިރު، ހއ. ކެލާގެ އިރުން 51 ނޯޓިކަލް މޭލު ބޭރުގައި ހަރަކާތްތެރިވަނިކޮށެވެ.

އެމްއެންޑީއެފުން ބުނީ މި ދެ ބޯޓު ކުޅުދުއްފުށީ ސިޓީ ބަނދަރަށް ވައްދައި ފުލުހުންނާ ހަވާލުކޮށްފައިވާކަމަށެވެ. އަދި މޯލްޑިވްސް ޕޮލިސް ސަރވިސްއިން މިކަމާ ގުޅޭ ތަހުޤީޤު ކުރިއަށްގެންދާކަމަށްވެސް ބުންޏެވެ.