ޤަވާއިދާ ޚިލާފަށް ވިޔަފާރިކުރި ބިދޭސީއެެއް، އެކައުންޓް މެދުވެރިކޮށް މިލިއަނުން މުޢާމަލާތްކުރި
ދިވެހިރާއްޖޭގައި ގަވައިދާ ޚިލާފަށް ވިޔަފާރިކުރި, ބިދޭސީއެެއް ހައްޔަރުކޮށް ބަންދުގެ މުއްދަތު އިތުރުކޮށްފިއެވެ.
މި މައްސަލާގައި ހައްޔަރު ކޮށްފައިވަނީ, ބަންގްލަދޭޝްގެ ރައްޔިތެއް ކަމަށްވާ, މުޙައްމަދު އިމޮން ކަޒި, 32 އެކެވެ. އޭނާއަށް ކުރެވެނީ ލައިސެންސް ނުނަގާ ވިޔަފާރި ކުރާ މައްސަލައިގެ ތުހުމަތެވެ.
އޭނާގެ ބަންދު އަމުރުގައިވާގޮތުން، ސީނަށް ދިޔަ ފުލުހުންގެ ބަޔާނާއި ތަފްސީލީ އިންޓަލިޖެންސް ރިޕޯޓަށް ބަލާއިރު ތުހުމަތުކުރެވޭ މިންވަރަށް ހެކި ވަނީ ހުށަހަޅާފައެވެ.
އަދި އިންޓަލިޖެންސް ރިޕޯޓުގައި އެ ބިދޭސީ މީހާގެ ބޭންކް އެކައުންޓް މެދުވެރިކޮށް މިލިޔަނުން ފައިސާގެ މުޢާމަލާތު ހިންގާފައިވާކަމަށް ބަޔާންކޮށްފައިވާ ކަމަށްވެސް އަމުރުގައިވެއެވެ.
މީގެ އިތުރުން އެ އިންޓަލިޖަންސް ރިޕޯޓަށް ބާރުދޭ އިތުރު ޑިޕޮސިޓް ސިލްޕް ފަދަ ތަކެތިވެސް ހިމަނާފައި ހުރިކަން ފާހަގަކޮށްފައިވެއެވެ.
އަދި މި މައްސަލައަކީ އިތުރު ބަޔަކު ބައިވެރިވެގެން ހިންގާފައިވާ އަމަލެއްކަމުގައި ފުލުހުން ތުހުމަތުކުރާ ކަމަށްވެސް ބަންދު އަމުރުގައިވެއެވެ.
ކްރިމިނަލް ކޯޓުން އިއްޔެ ވަނީ އޭނާގެ ބަންދަށް 15 ދުވަސް ޖަހައިފައެވެ.
Advertisement
This content is created and paid for by advertisers and does not involve Voice Journalists
