ބޭރުގެ އިންވެސްޓްމަންޓާ ބެހޭ އައު ޤާނޫނުގެ ދަށުން ކަނޑައެޅި އުސޫލުތަކާ އެއްގޮތަށް ޢަމަލުކުރަމުން ނުދާ ބޭރުގެ 8 ކުންފުންޏެއްގެ ނަން އިކޮނޮމިކް މިނިސްޓްރީން މިއަދު ޢާންމުކޮށްފިއެވެ.

އެ ވުޒާރާއިން ނެރުނު އިޢުލާނުގައި ބުނެފައިވާ ގޮތުގައި 2024 ވަނަ އަހަރު ތަޞްދީޤުކުރެވުނު ފޮރިން އިންވެސްޓްމަންޓް ޤާނޫނުގެ ދަށުން ދިވެހީންނަށް ޚާއްޞަ ބައެއް ދާއިރާތަކުން ބޭރުގެ ވިޔަފާރިތައް ރާއްޖޭގައި ކުރުން ވަނީ މަނާވެފައެވެ. އެ ދާއިރާތަކުގެ ތެރޭގައި ހޯލްސޭލް އަދި ރީޓެއިލް ވިޔަފާރީގެ އިތުރުން ކާގޯ ސޭލްސް އޭޖެންޓް (ސީއެސްއޭ) އާއި ޖެނެރަލް ސޭލްސް އޭޖެންޓް (ޖީއެސްއޭ) އަދި ޕެސެންޖަރު ސޭލްސް އޭޖެންޓް (ޕީއެސްއޭ) ގެ ޚިދުމަތްތައް ހިމެނެއެވެ.

ޤާނޫނީގޮތުން މަނާކުރި ނަމަވެސް އަދިވެސް ބައެއް ކުންފުނިތަކުން ވިޔަފާރި ކުރަމުންދާކަން ވަނީ ފާހަގަކޮށްފައެވެ. އަދި މިނިސްޓްރީން ވަނީ އެފަދަ ބައެއް ކުންފުނިތަކުގެ ނަންތައް އާއްމުކޮށްފައެވެ.

މިނިސްޓްރީން ނަން އާއްމުކުރި 8 ކުންފުންޏަކީ:

- މެގަ ސްޕީޑްލައިނާސް (މޯލްޑިވްސް) ޕްރައިވެޓް ލިމިޓެޑް (C-0022/1994)

- އެސްލި މޯލްޑިވްސް ޕްރައިވެޓް ލިމިޓެޑް (C-0266/1995)

- އައިސޯލާ ކްރިއޭޝަން (މޯލްޑިވްސް) ޕްރައިވެޓް ލިމިޓެޑް (C-0217/1995)

- ދީނަމް މޯލްޑިވްސް ޕްރައިވެޓް ލިމިޓެޑް (C-0017/1985)

- ލެމިންޓަންސް ޖުވެލްސް (މޯލްޑިވްސް) ޕްރައިވެޓް ލިމިޓެޑް (C-0375/1996)

- އެމްޔޫކޭ އެޕަރަލްސް (މޯލްޑިވްސް) ޕްރައިވެޓް ލިމިޓެޑް (C-0079/1998)

- ލަކްގެމްސް (މޯލްޑިވްސް) ޕްރައިވެޓް ލިމިޓެޑް (C-0201/1999)

- އޯޝަން ވެލް ގާމެންޓްސް ޕްރައިވެޓް ލިމިޓެޑް (C-142/2000)

މި ދާއިރާތަކުގައި މަސައްކަތްކުރާ ބޭރުގެ ކުންފުނިތަކުން އަންނަ މަހުގެ އަށެއްގެ ކުރިން އެ ވިޔަފާރިތައް ހުއްޓައިލަންޖެހެއެވެ. އިންތިޤާލީ މަރުޙަލާގެ ކަންކަން ކުރިއަށް ގެންދިއުމުގެ ތެރެއިން ވުޒާރާގެ ރެކޯޑުތަކުގައި ހުރި މަޢުލޫމާތު ބޭނުންކޮށްގެން ގުޅުމަށް ކުރި މަސައްކަތުން އެ އަށް ކުންފުންޏާ ނުގުޅުނު ކަމަށް ވުޒާރާއިން ބުނެފައިވެއެވެ.

އެ ވުޒާރާއިން ވަނީ ނަން ޢާންމުކުރި ކުންފުނިތަކުގެ ޑައިރެކްޓަރުންނާއި ހިއްޞާދާރުން ނުވަތަ ހުއްދަ ލިބިފައިވާ މަންދޫބުން ވީ އެންމެ އަވަހަކަށް "އިންވެސްޓް މޯލްޑިވްސް"ގެ ފޮރިން އިންވެސްޓްމަންޓް ޔުނިޓާ މުޢާމަލާތުކުރުމަށް އެދިފައެވެ. ކަނޑައެޅިފައިވާ ސުންގަޑީގެ ތެރޭގައި އައު އުސޫލުތަކާ އެއްގޮތަށް ޢަމަލުކުރުމަށް ބޭނުންވާ ފިޔަވަޅުތައް ލަސްނުކޮށް އެޅުމަށް ވެސް ވުޒާރާއިން ވަނީ ހަނދާންކޮށްދީފައެވެ.