ކޮންމެ ލީގެއްގައި ކުޅުނަސް ކުޅުން ހުއްޓާލާނީ اللهގެ އިރާދަފުޅާއެކު އޭނާގެ ޓާގެޓް ކަމަށްވާ 1000 ގޯލު ޖަހާފައި ކަމަށް ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ބުނެފި އެވެ.
ގްލޯބަލް ސްޕޯޓްސް އެވޯޑް ހަފުލާގައި މެދުއިރުމަތީގެ އެންމެ މޮޅު ކުޅުންތެރިޔާގެ އެވޯޑް ލިބިގަތުމަށްފަހު ވާހަކަދައްކަމުން ރޮނަލްޑޯ ބުނީ، އޭނާގެ ޓާގެޓަކީ ކޮބައިކަން އެންމެންނަށްވެސް އެނގޭނެ ކަމަށެވެ. އަދި އެންޖެރީއެއް ފަދަ ކަމެއް ދިމާ ނުވެއްޖެ ނަމަ، ކުޅުން ހުއްޓާލާނީ އޭނާގެ ޓާގެޓް ހާސިލްކުރުމަށްފަހު ކަމަށްވެސް ބުންޏެވެ.
"އަހަރެންގެ އަމާޒަކީ ކޮބައިކަން ތިބޭފުޅުންނަށްވެސް އެނގޭނެ. އަހަރެން ބޭނުންވަނީ ތަށިތައް ކާމިޔާބުކޮށް، އެ އަދަދު [1,000 ގޯލު] ހަމަކުރަން. އަނިޔާއެއް ނުލިބިއްޖެނަމަ، ޔަގީނުންވެސް އަހަރެން އެ އަދަދު ހަމަކުރާނަން. އިންޝާ الله."
ރޮނަލްޑޯ
ރޮނާލްޑޯ ވަނީ އެކަން ކުރުމަށްޓަކައި ފަހަރުގައި ޔޫރަޕުގެ ލީގެއްގައި ވެސް ކުޅެން ޖެހިދާނެ ކަމުގެ އިޝާރާތެއް ދީފަ އެވެ.
"މެދުއިރުމަތި ނުވަތަ ޔޫރަޕުގައި ވެސް ވިޔަސް މައްސަލައެއް ނެތް. އަހަރެންގެ ޓާގެޓަކީ އެކަން ކުރުން. ދެން ޔަގީން މި އަންނަ ވޯލްޑް ކަޕަކީ އަހަރެންގެ ފަހު މުބާރާތް. ދެން އަހަރު ނިމުމުގެ ކުރިން މި އެވޯޑް ލިބުމަކީ ވަރަށް ބޮޑު ހިތްހަމަ ޖެހުމެއް. މިއީ ލިބުނު ރަނގަޅު އިނާމެއް " އުމުރުން 40 އަހަރުގެ ކުޅުންތެރިޔާ ބުންޏެވެ.
މެންޗެސްޓާ ޔުނައިޓެޑަށް ދެ ފަހަރު، އަދި ރެއާލް މެޑްރިޑާއި ޔުވެންޓަސް އަށް ވެސް ކުޅުނު ފޯވަޑް މިހާރު ކުޅެމުންދަނީ ސައުދީ އަރަބިއްޔާގެ އައް ނަސްރަށެވެ. އޭނާ މިހާތަނަށް ޖަހާފައިވަނީ 952 ގޯލެވެ.
މިދިޔަ މަހު ޕިއަރސް މޯގަންއަށް ދިން އިންޓަވިއުއެއްގައި ރޮނާލްޑޯ ވަނީ، އޭނާ ވަރަށް އަވަހަށް ފުޓްބޯޅައިން ރިޓަޔާ ކުރުމަށް ރާވާފައިވާކަން ހާމަކޮށްފައެވެ.
Advertisement
This content is created and paid for by advertisers and does not involve Voice Journalists
