ކުރިއަށްއޮތް ރަމަޟާންމަހު އުމްރާގެ އަޅުކަން އަދާކުރުމަށް ތައްޔާރުވަމުންދާ ފަރާތްތަކުން ވެކްސިން ފުރިހަމަކޮށް ނިންމުމަށް ދަމަނަވެށިން އިލްތިމާސްކޮށްފިއެވެ.

ދެމަނަވެށިން އާއްމުކުރި ބަޔާނެއްގައި ބުނީ، ރަމަޟާންމަހު ޢުމްރާއަށް ވަޑައިގަންނަވާ ފަރާތްތަކުން ރަމަޟާންމަސް ފެށުމުގެ ކުރިން ވެކްސިން ހަމަކުރަން ޖެހޭނޭކަމަށެވެ. އެގޮތުން އަންނަ އަހަރުގެ ފެބްރުއަރީމަހުގެ 10 ވަނަ ދުވަހުގެ ކުރިން ވެކްސިން ފުރިހަމަކޮށް ނިންމުމަށް ވަނީ އިލްތިމާސްކޮށްފައެވެ.

ދަމަނަވެށިން ބުނީ އެއްވެސް ސަބަބަކާއި ހުރެ ރަމަޟާންމަސް ފެށުމުގެ ކުރިން ވެކްސިން ނުޖެހޭ ފަރާތްތަކަށް، ރަމަޟާންމަހުގެ ރޭތަކުގެ ތެރެއިން ދަމަނަވެށިން ޚިދުމަތް ދިނުމަށް ކަނޑައަޅާ ގަޑިތަކުގައި ވެކްސިން ޖެހޭނެ އިންތިޒާމު ހަމަޖައްސައިދޭނޭކަމަށެވެ.

ޢުމްރާ ވެކްސިން ފުރިހަމަކުރުމަށް ދަމަނަވެއްޓަށް އަންނައިރު، އެފަރާތެއްގެ އައިޑީ، ޕާސްޕޯޓް އަދި ވޭތުވެދިޔަ 5 އަހަރު ޙައްޖު/ޢުމްރާ އަށް ދިއުމަށް ވެކްސިން ޖަހާފައިވާނަމަ، ވެކްސިން ޖެހި ކާޑު އަދި ކުޑައިރުގެ ވެކްސިން ކާޑު އޮތްނަމަ އެ ގެނައުމަށް ވަނީ އެދިފައެވެ.

ކުރިއަށްއޮތް ދުވަސްތަކުގައި ރާއްޖެއިން ގިނަ އަދަދެއްގެ މީހުން އުމްރާވުމަށް ދާނޭކަމަށް އިސްލާމިކް މިނިސްޓްރީން ވަނީ ބުނެފައެވެ. އެގޮތުން މިއަހަރުގެ ޑިސެމްބަރުމަހާއި ކުރިއަށްއޮތް ޖެނުއަރީމަހުގެ އުމްރާގެ އަޅުކަން އަދާކުރުމަށް 7،000 ހަށްވުރެ ގިނަ މީހުން މައްކާއަށް ދަތުރުކުރާނޭކަމަށް އިސްލާމިކް މިނިސްޓަރު ވަނީ ވިދާޅުވެފައެވެ. 

 މީގެ ކުރީއަހަރުތަކާ ހިލާފަށް މިފަހަރުގެ ސްކޫލް ބަންދު ޑިސެމްބަރާ ދިމާވުމުން ގިނަ މީހުން އުމްރާގެ އަޅުކަން އަދާކުރުމަށް މައްކާއަށް ދަތުރުކުރާކަން ފާހަގަކޮށްލެވެއެވެެ.