ފުޓްބޯޅަކުޅުން ހުއްޓާލާނީ ކެރިއަރުގައި 1،000 ލަނޑާ ހަމަޔަށް ވާސިލްވުމުންކަމަށް ސައުދީގެ އަލް ނަސްރަށް ކުޅެމުން އަންނަ ޕޯޗްގަލްގެ ލެޖެންޑް ކްރިސްޓިއާނޯ ރޮނާލްޑޯ ބުނެފިއެވެ.
މެދުއިރުމަތީގެ އެންމެ މޮޅު ކުޅުންތެރިޔާގެ މަޤާމް ހޯދުމަށްފަހު މީޑިއާތަކާ ވާހަކަދައްކަމުން ރޮނާލްޑޯ ބުނީ، އޭނާގެ ފުޓްބޯޅަ ކެރިއަރު ހުއްޓާލުމަށް ނިންމާފައިވަނީ 1،000 ލަނޑު ޖެހުމަށްފަހު ކަމަށެވެ. ރޮނާލްޑޯ ބުނީ އެއީ އުނދަގޫވާނެ ކަމެއްކަންވެސް އެނގޭކަމަށާއި، ނަމަވެސް މިހާރު ހުރީ ހިތްވަރާއެކު އެ އަޒުމުގައި ކަމަށެވެ.
އުމުރުން 40 އަހަރުގެ ކުޅުންތެރިޔާ އެންމެފަހުން ނަސްރަށް ކުޅެދިން މެޗްގައިވެސް ވަނީ ދެ ލަނޑު ކާމިޔާބުކޮށްފައެވެ. އެއާއެކު އޭނާ ކެރިއަރުގައި ޖެހި ލަނޑުގެ އަދަދު ވަނީ 956 އަށް އަރާފައެވެ. ރޮނާލްޑޯ ބުނީ، ކޮންމެ ތަނެއްގައި ކުޅެންޖެހުނު ނަމަވެސް އޭނާއަށް އެއީ މައްސައެއް ނޫންކަމަށާއި، އެގޮތުން ބޭނުންވަނީ މިގޮތުގައި ކުރިއަށްދާން ކަމަށެވެ.
ކުޅިވަރުގައި އަދިވެސް އިތުރު ކާމިޔާބީތައް ހާސިލްކުރަން ބޭނުންވާކަން ފާހަގަކުރަމުން ރޮނާލްޑޯ ބުނީ އަނިޔާ ނުވެ މިގޮތުގައި ކުރިއަށް ހިނގައްޖެނަމަ، 1،000 ލަނޑު ޖެހުމަކީ ކުރެވިދާނެ ކަމެއްކަމަށެވެ.
ރޮނާލްޑޯ ވަނީ މި ސީޒަނުގައި ނަސްރަށް ކުޅެދިން 14 މެޗްގައި 13 ގޯލް ޖަހާފައެވެ. ރޮނާލްޑޯ އަކީ މިހާރުވެސް ޕޯޗްގަލް އަށް އެންމެގިނަ ލަނޑު ޖެހި ކުޅުންތެރިޔާއެވެ. އޭނާ ވަނީ ޤައުމީޓީމަށް 143 ލަނޑު ކާމިޔާބުކޮށްދީފައެވެ.
Advertisement
This content is created and paid for by advertisers and does not involve Voice Journalists
