ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ޤާނޫނުގެ ދަށުން މިހާތަނަށް ގޭންގު ކަނޑައެޅުމުގެ މައްސަލައެއް ޕްރޮސެކިއުޓަރ ޖެނެރަލްގެ އޮފީހަށް ހުށަހަޅާފައިވާ ކަމަށް ފުލުހުން ބުނެފިއެވެ. 

ފުލުހުންގެ ފަރާތުން މިއަދު ނޫސްވެރިންގެ ބައްދަލުވުމުގައި ވާހަކަދައްކަވަމުން ގޭންގް ކްރައިމް އިންވެސްޓިގޭޝަން ހިންގުމާ ހަވާލުވެ ހުންނެވި ސުޕްރިންޓެންޑެންޓް އޮފް ޕޮލިސް އިސްހާގު އާދަމް ވިދާޅުވީ، ގޭންގު ކުށްތައް ހުއްޓުވުމުގެ ޤާނޫނު ތަސްދީޤުކުރެވި، މިދިޔަ އޮގަސްޓް އެ ގާނޫނަށް ޢަމަލުކުރަންފެށިފަހުން ޖަމާޢަތް ހަދައިގެން، އެކި ގޭންގު ތަކުގެ ސިފާގައި ކުށްކުރުރުމުގެ ރިކޯޑް އޮންނަ ކުށްކުރާ ފަރާތްތަކުގެ ހަރަކާތްތައް އަތޮޅު ތެރޭއިންނާއި މާލެއިންވެސް ވަރަށް މަދުވެފައިވާ ކަމަށެވެ. 

އަދި އެފަދަ ކަންކަން ހުއްޓުވުމަށް 24/7 ފުލުހުން މަސައްކަތް ކުރަމުންދާ ކަމަށާ އެ މަސައްކަތުގެ ތެރެއިން ގޭންގުތައް އެއްވެ އުޅޭތަން ބަލައިފާސްކުރަމުންދާ ކަމަށް އިސްހާގު ވިދާޅުވުއެވެ.

އެގޮތުން މިހާތަނަށް 6 ތަނެއް ބަލައި ފާސްކޮށް، 7 މައްސަލައެއްގައި 11 މީހުން ހައްޔަރުކުރި ކަމަށާ އޭގެ ތެރެއިން ތެރޭގައި ހައްޔަރުގައި 2 މީހުން އެބަތިބި ކަމަށް އިސްހާގު ވިދާޅުވިއެވެ. އަދި، ދެ މައްސަލައެއްގައި ދައުވާ ކުރުމަށް މިހާރު ޕްރޮސެކިއުޓަރ ޖެނެރަލްގެ އޮފީހަށް ހުށަހަޅާފައިވާ ކަންވެސް ފާހަގަކުރެއްވިއެވެ.

ގޭންގު ކުށްތަކާ ގުޅޭ ޤާނޫނުގެ މަތިން ގޭންގު ކަނޑައެޅުން ބެހިފައިވަނީ އެކި މަރުހަލާތަކުގެ މައްޗަށެވެ. އެގޮތުން، ކޮމިޝަނަރ އޮފް ޕޮލިސް އެންޑޯސް ކުރައްވައި ޕްރޮސެކިއުޓަރ ޖެނެރަލް އޮފީހަށް ގޭންގު ކަނޑައެޅުމަށް ހުށަހެޅުއްވުމުން އެ އޮފީހުން ކޯޓަށް ހުށަހަޅަން ޖެހެއެވެ.

އެގޮތުން ހައި ކޯޓަށް އެ މައްސަލަ ހުށަހެޅުމުން އެއީ ގޭންގެއްކަމަށް ކަނޑައަޅާނީ ކޯޓުންނެވެ.

ގޭންގު ކުށްތައް ހުއްޓުވުމުގެ ޤާނޫނުގެ ދަށުން ކުށެއް ކުރާ ގްރޫޕެއް އުފައްދައިފިނަމަ ނުވަތަ ހިންގައިފިނަމަ 25 އަހަރުގެ ޖަލު ހުކުމަކާއެކު 200،000 ރުފިޔާއާ 10 މިލިޔަން ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.

އަދި އެފަދަ ކުށެއް ކުރަން އުޅެފިނަމަ ނުވަތަ އެހީތެރިވެއްޖެނަމަ 18 އަހަރުގެ ޖަލު ހުކުމަކާއެކު 100،000 ރުފިޔާއާއި 5 މިލިޔަން ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.