ސަރުކާރުގެ އޮފީސްތަކުގައި މަސައްކަތްކުރާ އަންހެން އަދި ފިރިހެން މުވައްޒަފުން ހެދުން އެޅުމުގައި ގެންގުޅެން ޖެހޭ މިންގަނޑުތަކާ ބެހޭ ޤަވާއިދު އިސްލާހްކޮށް ގެޒެޓްކޮށްފިއެވެ.

އެގޮތުން މި އިސްލާހްގައިވާގޮތުން އަންހެން މުވައްޒަފުން ރަސްމީ މަސައްކަތަށް ނުކުންނައިރު އަޅާހެދުން ހުންނަންޖެހޭނީ ބުޑު ނިވާވާ ގޮތަށް ފަލަމަސްގަނޑާ ހަމައަށެވެ. އަދި ކަރުވަޅުވެސް ހުންނަންވާނީ ނިވާ ކޮށްފައެވެ. 

މި ގަވާއިދުގައި އަންހެން އަދި ފިރިހެން މުވައްޒަފުން ވެސް ރަސްމީ މަސައްކަތަށް ނުކުންނަ އިރު ހެދުން ހުންނަން ޖެހޭ ގޮތް ސާފުކޮށް ބަޔާންކޮށްދީފަ އެވެ. 

• ގަމީހުގެ ގޮތުގައި އަތްދިގު ނުވަތަ އަތްކުރު ގަމީސް ނުވަތަ ބުސް ގަމީސް ބޭނުން ކުރެވިދާނެ. އެކަަމަކު ގަމީހުގެ އަތް ހުންނަންވާނީ އަތް ދިގު ގަމީހެއް ނަމަ އަތުގެ ކުޑަހުޅާ ހަމައަށް ކަމަށާއި އަދި އަތްކުރު ގަމީހެއް ނަމަ އަތް ހުންނަން ވާނީ އަތުގެ އުޅަނބޮށްޓަށް ވުރެ ދެ އިންޗި ކުރުނުވާ ވަރަށް.

• ފަޓުލޫނުގެ ގޮތުގައި ބޭނުންކުރަން ވާނީ ދިގު ފަޓުލޫނެއް ކަމަށާއި އެއީ އޮފީހުގެ މާހައުލާ ގުޅޭ ފޮއްޗަކުން ތައްޔާރު ކޮށްފައިވާ ފަޓުލޫނަކަށް ވާން ޖެހޭނެ.

• އޮފީސް ގަމީހުގެ ގޮތުގައި ފަހާފައި ހުންނަ އަތްދިގު ބުސް ގަމީސް ފިޔަވައި އެހެން ގަމީސްތައް ދަށަށް ޖަހަން ވާނެ. އަދި ދަށަށް ޖަހައިފައި ހުންނައިރު ހުންނަން ވާނީ ގަމީސް ދަށަށް ޖަހައި، ބެގީކުރުމުން އަޅައިފައި ހުންނަ ކަމަރު އެއްކޮށް ނުފޮރުވޭ ވަރަށް

• އަޅައިފައި ހުންނަ ކަމަރަކީ ރަސްމީ ހެދުންތަކާ އެކު، ބޭނުންކުރަން އެކަށީގެންވާ ކަމަރަކަށް ވާން ވާނެ

• ރަސްމީ ގަޑީގައި އަދި ރަސްމީ މަސައްކަތްތަކުގައި އަތްދިގު ގަމީހާއި އަތްކުރު ގަމީހާ އެކު ދަށަށް ޖަހައ،ި ޓައީ ބޭނުންކުރަން ވާނެ. ޓައީގައި އަހުލާގީ ގޮތުން އެކަށީގެން ނުވާ ފަދަ ބަސްތަކާއި މަންޒަރާއި ކުރެހުން އަދި ކާޓޫނު ނުވަތަ ފޮޓޯ ފަދަ އެހެން އެއްޗެއް ހުރެގެން ނުވާނެ.

• ސަޕޯޓް ސާވިސް ގިންތީގައި ހިމެނޭ ވަކި ޔުނިފޯމެއް ނުވަތަ ހެދުމެއް ކަނޑައެޅިފައި ނުވާ މަގާމުތަކުގައި މަސައްކަތްކުރާ މުވައްޒަފުންގެ ހެދުމަކީ ފަޓުލޫނާއި ގަމީހާއި ބޫޓު.

• އޮފީހަށް ހާޒިރުވާން ވާނީ ސާފުތާހިރުކަންމަތީ މުޖުތަމައުގެ އަހުލާގީ މިންގަނޑަށް. އެކަމަކު ފާޅުކަން ބޮޑު މޭކަޕެއް އަދި އަނގޮޓި ފިޔަވައި އެހެން ގަހަނާ ބޭނުންކުރުމަކީ ހުއްދަ ކަމެއް ނޫން. އަދި އެއްވެސް ގުނަވަނެއްގައި ގަހަނާއަކަށްވާ އެއްޗެއް ލާފައި ހުރުމަކީ ހުއްދަ ކަމެއް ނޫން

• އަންހެން މުވައްޒަފުންގެ ހެދުމުގެ ގޮތުގައި ދިގު ހެދުން ނުވަތަ ދިވެހި ލިބާސް ނުވަތަ އޮފީސް ހެދުން ލެވިދާނެ. އެ ހެދުން ހުންނަންވާނީ ފައިގެ ތަނބިކަށްޓަށް ވުރެ ކުރުނުވާ ގޮތަށާއި އަދި މި ހެދުމަކީ އޮފީހުގެ މާހައުލާ ގުޅޭ ފޮއްޗަކުން ތައްޔާރުކުރެވިފައިވާ ހެދުމެއްކަމުގައި ވާން ވާނެ.

• ފަޓުލޫނު އަދި ހަރުވާޅު ނުވަތަ ޖެކެޓާއެކު ލާ ފަޓުލޫނު ނުވަތަ ހަރުވާޅަކީ އޮފީހުގެ މާހައުލާ ގުޅޭ ފޮއްޗަކުން ތައްޔާރުކޮށްފައިވާ އެއްޗެހިކަމުގައި ވުން.

• ކޮންމެ ބާވަތެއްގެ ހެދުމެއްގެ ވެސް ކަރު ހުންނަންވާނީ މުޖުތަމައުގެ އަދަބާ ހިލާފު ނުވާގޮތަށް ކަރުވަޅު ނިވައިވާ ގޮތަށް. އަދި އަތްކުރު ހެދުމެއް ނަމަ އަތް ހުންނަންވާނީ އެ މީހެއްގެ ކޮނޑުހުޅާއި އުޅަބޮއްޓާއި ދެމެދަށް ވުރެ ކުރުނުވާ ގޮތަށް. އަތްދިގު ހެދުމެއް ނަމަ، ހެދުމުގެ އަތް ހުންނަންވާނީ އަތުގެ ކުޑަހުޅަށް ވުރެ ދިގުނުވާ ވަރަށް.

• ހެދުމުގެ މަތީބައި ގަމީސް އަދި ސޫޓު ޖެކެޓުގެ މަތީބައިގެ އަރިމަތިން ކުރިމަތިން ފުރަގަހުން އަދި ތިރިން ފަޅާފައި ހުންނަ ނަމަ ފަޅާފައި ހުންނަބައި ހުންނަން ވާނީ މައްޗަށް އަތް ދަމާލުމުން އުނަގަނޑުން ތިރީބަޔާއި އުނަގަނޑުން މަތީބަޔާ ދެމެދުން ހަށިގަނޑުގެ އެއްވެސް ތަނެއް ނުފެންނަ ވަރަށް. އެ ހެދުމުގެ ދިގު މިން ހުންނަން ވާނީ ބުޑުގެ ތިރީ ކައިރިން ފެށިގެން މައްޗަށް ދެ އިންޗިއަށް ވުރެ ހެދުން ކުރުނުވާ ވަރަށް.

• އޮފީހުގައި އުޅޭއިރު ނުވަތަ ރަސްމީ މަސައްކަތުގައި އުޅޭއިރު ތިބެންވާނީ އޮފީސް ބޫޓުގައި ނުވަތަ އޮފީހާ އެކަށީގެންވާ ފައިވާނުގައި.

• ސަޕޯޓް ސާވިސް ގިންތީގައި ހިމެނޭ ވަކި ޔުނިފޯމެއް ނުވަތަ ހެދުމެއް ކަނޑައެޅިފައި ނުވާ މަގާމުތަކުގައި މަސައްކަތްކުރާ އަންހެން މުވައްޒަފުންގެ ހެދުމަކީ އެ ބައިގައި ބަޔާންކުރެވިފައިވާ ޒާތުގެ ހެދުމާއި އެކަށީގެންވާ ބޫޓު ނުވަތަ އެކަށީގެންވާ ފައިވާނެއް.

• އޮފީހަށް ހާޒިރުވާން ވާނީ ސާފުތާހިރުކަންމަތީ މުޖުތަމައުގެ އާންމު އަހުލާގީ މިންގަނޑުތަކާ އެއްގޮތަށް. އަދި ޒީނަތްތެރިވުމުގެ ގޮތުން އަންހެނުން ގަހަނާ އެޅުމާއި މޭކަޕް ކުރުމަކީ ހުއްދަ ކަމެއް.

• މީގެ އިތުރުން އިސްތަށިގަނޑު ބަހައްޓަން ވާނީ ރީތިކޮށް ކަމަށާއި އެކަމަކު ކަޅު ފިޔަވައި ފާޅުކަން ބޮޑު ކުލަ ނުވަތަ ކުލައިން ޝޭޑްކޮށް ހައިލައިޓްކުރުމަކީ ހުއްދަ ކަމެއް ނޫން.