ބ.ތުޅާދޫ ހައުސިން ޔުނިޓްތަކުގެ މައްސަލައަށް ސަރުކާރުން ވަނީ ކުރިއަށްއޮތް ލޯކަލް ކައުްނސިލް އިންތިހާބަށް ނުފޫޒު ފޯރުވަންކަމަށް އިދިކޮޅޫ މައި ޕާޓީ، އެމްޑީޕީން ބުނެފިއެވެ.
ހައުސިން މިނިސްޓްރީގެ ބެލުމުގެ ދަށަށް ތުޅާދޫ ހައުސިން ޔުނިޓްތައް ނެގި މައްސަލާގައި އެމްޑީޕީން ނެރުނު ބަޔާނުގައި މިއަދު ބުނީ, ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުންހިންގުމުގެ ޤާނޫނުގެ ދަށުން އެމްޑީޕީގެ ވެރިކަމުގައި ކައުންސިލްތަކަށް މުހިންމު ބާރުތަކާ ވަސީލަތްތައް ފަހިކޮށްދީފައި ވާނޭކަމަށެވެ. ނަމަވެސް ޕީއެންސީގެ ސަރުކާރު އައިފަހުން ލާމަރުކަޒީ ނިޒާމުގެ ބާރު ކަނޑުވާލުމަށް މަސައްކަތް ފަށާފައިވާކަން ފާހަގަކުރަމުން އެމްޑީޕީން ބުނީ ލާމަރުކަޒީ ނިޒާމުގެ ބާރު ކަނޑުވައިލައި، އިދާރީ ހިންގުމުގެ ބާރުތައް ވުޒާރާތަކަށް ޖަމާކުރުމުގެ މަސައްކަތް ސަރުކާރުން ފަށާފައިވާކަމަށެވެ.
އެމްޑީޕީން ނެރުނު ބަޔާނުގައި ވަނީ ސަރުކާރުން ތުޅާދޫގައި ބިނާކޮށް ނިންމައިފައިވާ 100 ހައުސިންގ ޔުނިޓު، އޭގެ ހައްގުވެރިންނަށް ދިނުމުގެ މަސައްކަތްތައް ރަށުކައުންސިލުން ކުރަމުން ދަނިކޮށް، ކޯޓު އަމުރެއްގެ ދަށުން ހުއްޓުވައިފައިވާ ދަނޑިވަޅެއްގައި، ހައުސިން ޔުނިޓްތައް ހައުސިން މިނިސްޓްރީއަށް ނަގާފައިވާކަން ފާހަގަކޮށްފައެވެ.
އެގޮތުން ހައުސިން ޔުނިޓްތަކަށް އަތްގަދަކޮށް ޔުނިޓްތައް އަލުން ދޫކުރަން މިނިސްޓްރީން ހުޅުވައިލުމަކީ ސީދާ ޤާނޫނޫއަސާސީއާއި ލާމަރުކަޒީ ޤާނޫނާ ހިލާފަށް އަދި ލާމަރުކަޒީ ނިޒާމުގެ ރޫހާ ކަނޑައެޅިގެން ދެކޮޅަށް ސަރުކާރުން ކުރަމުން އަންނަ ކަމެެއްކަމަށް އެމްޑީޕީން ވަނީ ބުނެފައެވެ. އަދި މިއީ ކުރިޔަށް އޮތް ލޯކަލް ކައުންސިލްތަކުގެ އިންތިޚާބަށް ނުފޫޒު ފޯރުވުމަށްމަކަރުވެރި ރޭވުމެއްގެ ތެރެއިން ސަރުކާރުން ކުރާ ކަމެއްކަމަށާއި އެކަން ހުއްޓައިލުމަށް އެމްޑީޕީން ވަނީ ސަރުކާރަށް ގޮވާލާފައެވެ.
ސަރުކާރުގެ އެ އަމަލުތައް ހުއްޓުވުމަށް ކުރެވެން އޮތް ކޮންމެ ކަމެއް ކުރުމަށް ތުޅާދޫ ކައުންސިލަށް ގޮވާލަމުން އެމްޑީޕީން ބުނީ އެ މަސައްކަތުގައި އެ ޕާޓީގެ ފުރިހަމަ އެއްބާރުލުން ލިބެމުންދާނޭކަމަށެވެ.
މައްސަލަބޮޑުވެފައިވާ ތުޅާދޫ ހައުސިން ޔުނިޓްތަކުގެ މައްސަލާގައި އެރަށު ކައުންސިލުން ވަނީ، މާދަމާ ހާއްސަ ބައްދަލުވުމެއް ބޭއްވުމަށް ނިންމާފައެވެ.
Advertisement
This content is created and paid for by advertisers and does not involve Voice Journalists
