މިދިޔަ އަހަރު އެމްޕީއެލް ބަނދަރުގައި ހުއްޓައި ގެއްލުނު 13 މިލިއަނަށް ވުރެ ގިނަ ސިނގިރޭޓުން މަންފާ ނަގައި، އެ ވައްކަމުގައި ބައިވެރިވީ މީހުން ފައިސާ ބޭނުން ކުރީ ޖުވާ ކުޅުމަށްކަމަށާ ނަމަވެސް އެކަމުން ހޯދި ފައިސާ ގެއްލިފައިވާ ކަމަށް ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަހުމަދު ނާޒިމް ވިދާޅުވެއްޖެ އެވެ.
ނާޒިމް މިކަން ހާމަކުރެއްވީ، މިއަދު ދައުރުން ބޭރުން ބޭއްވި މަޖިލީހުގެ ޖަލްސާގައި ޖުވާ ކުޅުމާއި ޖުވާ ކުޅޭތަނެއް ހިންގުމަކީ ޖިނާއީ ކުށެއްގެ ގޮތުގައި ކަނޑައަޅައި އެއް އަހަރާއި ހަތަރު އަހަރާއި ދެމެދުގެ ޖަލު އަދަބެއް ދެވޭ ގޮތަށް ގާނޫނުއަސާސީއަށް ހުށަހަޅާފައިވާ އިސްލާހަށް ބަހުސް ކުރައްވަމުންނެވެ.
އެގޮތުން ނާޒިމް ވިދާޅުވީ ޖުވާ ކުޅުމާ ބެޓް ކުރުމަކީ މިހާރު ރާއްޖޭގައިވެސް ވަރަށް ފުޅާ ދާއިރާއެއްގައި ކުރަމުން އަންނަ ކަމެއް ކަމަށެވެ.
އެކަން އަޅުގަނޑުމެންނަށް އެނގިފައު އެބައޮތް ދާދިފަހުން ހިނގައިދިޔަ ވައްކަންތަކުންވެސް. އެންމެ ބޮޑު ވައްކަމެއްގެ ގޮތުގައި މި ފާހަގަކުރެވުނު ސިނގިރޭޓުގެ ވަގުކަމުގެ ތެރޭގައިވެސް އަޅުގަނޑުމެންނަށް މައުލޫމާތު ލިބިފައިވާ ގޮތުގައި އެކަމުގެ ފައިސާ ލިބުނު ފަރާތްތަކުން ވަނީ އެ ފައިސާ ބެޓްކޮށް އަދި ޖުވާ ކުޅެ އޭގެން ނަފާ ހޯދަން މަސައްކަތްކޮށް އެ ހުރިހާ ފައިސާއެއް ގެއްލިފައި. އަދި އެފަރާތްތަކުން އެ ޖުވާކުޅެގެން އެފަރާތްތަކަށް ލިބުނު ފައިދާ އެ ފަރާތްތަކުގެ އެކައުންޓުތަކަށް ޖަމާކޮށްދޭން ވެސް ވަކި ކުންފުނިތަކެއް ހަދާފަ ޖުވާކުޅޭ މީހުން ހުރިކަންވެސް އެކަމުގެ ތެރެއިން އެނގިފައިވޭ. މީގެއިން އަޅުގަނޑުމެންނަށް އެނގޭ އެއްޗަކީ ވަރަށް ފުޅާ ދާއިރާއެއްގައި މި އަދި އަޅުގަނޑުމެންގެ މުޖުތަމައުގަ އަޅުގަނޑުމެންގެ ލޯމައްޗަށް މި ފެންނަ ވަރަށްވުރެ މާ ފުންކޮށް އެކަން ހިނގަމުންދާކަން…
މެންބަރު ނާޒިމް
ލޖުވާކުޅެގެން ލިބޭ މި ފައިސާ ޖަމާކުރުމަށް ރާއްޖޭގައި ރަޖިސްޓްރީކޮށްފައިވާ ކުންފުނިތައް ބޭނުންކުރަމުން އަންނަ ކަމަށާ، އެ ކުންފުނި ތަކުން ފައިސާ ޖަމާކުރަމުންދަނީ ބޭންކުތަކަށް ފާހަގަނުވާނެހެން ކުދިކުދި އަދަދުތަކުން ކަމަށް ނާޒިމް ވިދާޅުވި އެވެ.
މި މައްސަލަތައް ހައްލުކުރުމަށްޓަކައި ބޭންކުންވެސް އެފަދަ ސައިޓްތައް މެދުވެރިކޮށް ކުރާ މުޢާމަލާތްތައް ހުއްޓުމަށް މަސައްކަތްކުރާކަން ނާޒިމް ފާހަގަކުރެއްވިއެވެ. ނަމަވެސް ގާނޫނުގައި ”ސްކޭމް“ އަކީ ކޮބައިކަމާއި، އެކަން ކުރާ ފަރާތްތަކަށް ދެވޭނެ އަދަބުތައް ސާފުކޮށް ބަޔާންކޮށްފައި ނެތުމުން ދަތިތަކާ ކުރިމަތިވާ ކަމަށާ، ހުށަހެޅިފައިވާ ގާނޫނާއެކު އެކަން ހައްލުވާނެ ކަމަށް އޭނާ ވިދާޅުވިއެވެ.
މި ގާނޫނުގައި އެ ކުށަކީ ކޮބައިކަން ބަޔާންކުރެވިފައި ނެތުމުގެ ސަބަބުން މި ޕްރޮސެކިއުޓް ކުރުމުގެ ދާއިރާގައި މަސައްކަތްތަކަށް ހައްލެއް ގެނެސްދިނުން މީގެ ބޭނުމަކީ.
މެންބަރު ނާޒިމް
ވަގަށް އެތެރެ ކުރަން އުޅުނު މި ސިނގިރޭޓު ކޮންޓެއިނަރުން ދައުލަތަށް ޑިއުޓީއެއްގެ ގޮތުގައި ލިބެން ޖެހޭ އަދަދު 122 މިލިއަން ރުފިޔާއަށް އަރާއިރު ގެއްލުނު ސިނގިރޭޓަށް ވީނުވީއެއް އަދިވެސް ނޭނގެ އެވެ.
މި މައްސަލައިގައި މަޝްހޫރު ދެ ވިޔަފާރިވެރިއަކު ހިމެނޭ ގޮތަށް ގިނަ ބަައެއްގެ މައްޗަށް ވަނީ ދައުވާ ވެސް އުފުލާފަ އެވެ.
Advertisement
This content is created and paid for by advertisers and does not involve Voice Journalists
